ബെംഗളൂരുവില്‍ നിന്ന് ഈ നഗരത്തിലേക്ക് പ്രത്യേക ട്രെയിന്‍ സര്‍വീസ്; ടിക്കറ്റുകള്‍ നേരത്തെ ബുക്ക് ചെയ്യണം

ബെംഗളൂരു: മഹാ ശിവരാത്രി ഉത്സവത്തോടനുബന്ധിച്ച് വലിയ മുന്നൊരുക്കങ്ങളാണ് ഇന്ത്യന്‍ റെയില്‍വേ നടത്തുന്നത്. തീര്‍ത്ഥാടകര്‍ ഉള്‍പ്പെടെയുള്ള യാത്രക്കാരുടെ വലിയ തിരക്കാണ് റെയില്‍വേ അധികൃതര്‍ പ്രതീക്ഷിക്കുന്നത്. യാത്രക്കാരുടെ തിരക്ക് കണക്കിലെടുത്ത് ബെംഗളൂരുവിനും കല്‍ബുര്‍ഗിക്കും ഇടയില്‍ പ്രത്യേക ട്രെയിന്‍ സര്‍വീസുകള്‍ നടത്തുമെന്ന് സൗത്ത് വെസ്റ്റേണ്‍ റെയില്‍വേ അറിയിച്ചു. ബെംഗളൂരുവിലെ യശ്വന്ത്പൂര്‍ ജംഗ്ഷനില്‍ നിന്നും കല്‍ബുര്‍ഗിയിലേക്കും തിരിച്ചുമുള്ള ഈ സര്‍വീസുകള്‍ തീര്‍ത്ഥാടകര്‍ക്കും മറ്റ് യാത്രക്കാര്‍ക്കും ഉത്സവ സീസണില്‍ ഏറെ ആശ്വാസകരമാകും. തിരക്ക് കുറയ്ക്കാന്‍ 20 കോച്ചുകളുമായാണ് ഈ പ്രത്യേക ട്രെയിനുകള്‍ ഓടിക്കുന്നത്.

യശ്വന്ത്പൂരില്‍ നിന്ന് കല്‍ബുര്‍ഗിയിലേക്കുള്ള ട്രെയിന്‍ (നമ്പര്‍ 06209) രാത്രി 10:40-ന് പുറപ്പെട്ട് അടുത്ത ദിവസം രാവിലെ 9:15-ന് ലക്ഷ്യസ്ഥാനത്ത് എത്തും. മടക്കയാത്രയില്‍ കല്‍ബുര്‍ഗിയില്‍ നിന്നുള്ള ട്രെയിന്‍ (നമ്പര്‍ 06210) രാവിലെ 10:15-ന് പുറപ്പെട്ട് രാത്രി 9:40-ഓടെ യശ്വന്ത്പൂരില്‍ തിരിച്ചെത്തും. യാത്രക്കാര്‍ക്ക് ഉപകാരപ്രദമായ രീതിയിലാണ് ഈ സമയക്രമം നിശ്ചയിച്ചിരിക്കുന്നത്.

ഈ പ്രത്യേക ട്രെയിനിന് യെലഹങ്ക, ഹിന്ദുപൂര്‍, ധര്‍മ്മവാരം, അനന്തപൂര്‍, ഗുണ്ടക്കല്‍, അഡോണി, മന്ത്രാലയ റോഡ്, റായ്ച്ചൂര്‍, കൃഷ്ണ, യാദ്ഗിര്‍, ഷഹാബാദ് എന്നീ സ്റ്റേഷനുകളില്‍ സ്റ്റോപ്പുകള്‍ ഉണ്ടായിരിക്കും. കൂടുതല്‍ കോച്ചുകള്‍ ഉള്ളതിനാല്‍ സാധാരണ ട്രെയിനുകളിലെ തിരക്ക് കുറയ്ക്കാനും യാത്രക്കാര്‍ക്ക് സുഖകരമായ യാത്ര ഉറപ്പാക്കാനും സാധിക്കുമെന്ന് റെയില്‍വേ അധികൃതര്‍ വ്യക്തമാക്കി.

ടിക്കറ്റുകള്‍ ഐആര്‍സിടിസി ഔദ്യോഗിക വെബ്‌സൈറ്റ് വഴിയോ അംഗീകൃത ടിക്കറ്റ് കൗണ്ടറുകള്‍ വഴിയോ മുന്‍കൂട്ടി ബുക്ക് ചെയ്യാവുന്നതാണ്. ഉത്സവ കാലമായതിനാല്‍ ടിക്കറ്റുകള്‍ വേഗത്തില്‍ തീരാന്‍ സാധ്യതയുള്ളതിനാല്‍ യാത്രക്കാര്‍ നേരത്തെ തന്നെ ബുക്കിങ് പൂര്‍ത്തിയാക്കണമെന്ന് നിര്‍ദ്ദേശമുണ്ട്. യാത്ര ചെയ്യുമ്പോള്‍ ഐഡി പ്രൂഫ് കൈവശം വെക്കാന്‍ പ്രത്യേകം ശ്രദ്ധിക്കണം.

കല്‍ബുര്‍ഗി നഗരത്തിലെ ശരണബസവേശ്വര ക്ഷേത്രത്തില്‍ മഹാ ശിവരാത്രിയോടനുബന്ധിച്ച് നടക്കുന്ന വലിയ തോതിലുള്ള പൂജകളും ആഘോഷങ്ങളും പതിനായിരക്കണക്കിന് ഭക്തരെ ആകര്‍ഷിക്കുന്നുണ്ട്. ഈ സമയത്ത് നടക്കുന്ന 'രഥോത്സവം' വളരെ ലോകപ്രസിദ്ധമാണ്. മഹാരാഷ്ട്ര, തെലങ്കാന എന്നീ അയല്‍ സംസ്ഥാനങ്ങളില്‍ നിന്നും ശിവരാത്രി നാളുകളില്‍ വലിയ തോതില്‍ ഭക്തര്‍ കല്‍ബുര്‍ഗിയില്‍ എത്താറുണ്ട്.