ബെംഗളൂരു-തുമകുരു റൂട്ടിൽ മെട്രോ വേണോ ആർആർടിഎസ് വേണോ?; ചർച്ചകൾ സജീവം

ബെംഗളൂരുവിനും തുമകുരുവിനും ഇടയിൽ റീജിയണൽ റാപ്പിഡ് ട്രാൻസിറ്റ് സിസ്റ്റം (ആർആർടിഎസ്) നടപ്പിലാക്കണമെന്ന കർണാടക സർക്കാരിന്റെ പുതിയ നിർദ്ദേശം സംസ്ഥാനത്ത് വലിയ ചർച്ചകൾക്ക് വഴിവെച്ചിരിക്കുന്നത്. ഇതോടെ സമീപ നഗരമായ തുമകുരുവിലേക്ക് നമ്മ മെട്രോ നീട്ടണമെന്ന ദീർഘകാല ആവശ്യം വീണ്ടും സജീവമായിരിക്കുകയാണ്. നഗരങ്ങൾ തമ്മിലുള്ള ദീർഘദൂര ഗതാഗതത്തിന് ഏറ്റവും അനുയോജ്യമായ സംവിധാനം ഏതാണ് എന്നതാണ് നിലവിലെ പ്രധാന ചർച്ചാവിഷയം.

ബെംഗളൂരു-തുമകുരു പോലുള്ള ദീർഘദൂര റൂട്ടുകൾക്ക് ആർആർടിഎസ് ആണ് കൂടുതൽ അനുയോജ്യമെന്നാണ് ഗതാഗത വിദഗ്ധർ ചൂണ്ടിക്കാണിക്കുന്നത്. ഉയർന്ന വേഗതയും കുറഞ്ഞ സ്റ്റോപ്പുകളും ഉൾക്കൊള്ളുന്ന ഈ സംവിധാനം അന്തർനഗര യാത്രകൾക്കായി പ്രത്യേകമായി രൂപകൽപ്പന ചെയ്തതാണ്. മറുവശത്ത്, നഗരത്തിനുള്ളിലെ ചെറിയ ദൂരയാത്രകൾക്കും കൂടുതൽ സ്റ്റേഷനുകളുള്ള കണക്റ്റിവിറ്റിക്കുമാണ് മെട്രോ സംവിധാനം കൂടുതൽ അനുയോജ്യമെന്നും വിദഗ്ധർ ചൂണ്ടിക്കാട്ടുന്നു.

യാത്രാ ആവശ്യകത അനുസരിച്ച് ഗതാഗത സംവിധാനം തിരഞ്ഞെടുക്കണമെന്ന നിലപാടാണ് ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസിലെ (ഐഐഎസ്‌സി) സുസ്ഥിര ഗതാഗത ലബോറട്ടറി കൺവീനർ പ്രൊഫ. ആശിഷ് വർമ്മ പങ്കുവെയ്ക്കുന്നത്. ചുരുങ്ങിയ ദൂര നഗരയാത്രകൾക്ക് മെട്രോ ഏറ്റവും അനുയോജ്യമാണ്. എന്നാൽ ബെംഗളൂരുവിൽ നിന്ന് തുമക്കൂരു പോലുള്ള ദീർഘദൂര യാത്രകൾക്ക് ആർആർടിഎസ് കൂടുതൽ കാര്യക്ഷമമായ പരിഹാരമാകുമെന്നും അദ്ദേഹം വ്യക്തമാക്കി.

നിലവിൽ ബെംഗളൂരുവിൽ നിന്ന് തുമകുരുവിലേക്ക് ദിവസേന ജോലി, വിദ്യാഭ്യാസ ആവശ്യങ്ങൾക്കായി യാത്ര ചെയ്യുന്ന വലിയൊരു ജനവിഭാഗമുണ്ട്. റോഡ് ഗതാഗതത്തിലും പരിമിതമായ റെയിൽ സൗകര്യങ്ങളിലും ആശ്രയിച്ചാണ് ഇവരുടെ യാത്രകൾ നടക്കുന്നത്. ഈ സാഹചര്യത്തിൽ അതിവേഗവും വിശ്വാസയോഗ്യവുമായ ഒരു പൊതുഗതാഗത സംവിധാനം അനിവാര്യമാണെന്നാണ് വിദഗ്ധരുടെ വിലയിരുത്തൽ. ഇതാണ് ആർആർടിഎസ് പോലുള്ള പദ്ധതികൾക്ക് പ്രാധാന്യം വർധിപ്പിക്കുന്നതെന്നും അവർ പറയുന്നു

മെട്രോയും ആർആർടിഎസും വ്യത്യസ്ത ആവശ്യങ്ങൾക്കായി രൂപകൽപ്പന ചെയ്ത ഗതാഗത സംവിധാനങ്ങളാണ്. നഗരത്തിനുള്ളിൽ ഉയർന്ന ഫ്രീക്വൻസിയോടെ സർവീസ് നടത്തുന്ന മെട്രോ ചെറിയ ദൂരയാത്രകൾക്കാണ് അനുയോജ്യം. എന്നാൽ 50 മുതൽ 100 കിലോമീറ്റർ വരെ ദൂരം ഉൾക്കൊള്ളുന്ന അന്തർനഗര യാത്രകൾക്കായി ഉയർന്ന വേഗതയിൽ പ്രവർത്തിക്കുന്ന സംവിധാനമാണ് ആർആർടിഎസ്. കുറഞ്ഞ സ്റ്റോപ്പുകൾ, കൂടുതൽ സീറ്റിംഗ് സൗകര്യം, ലഗേജ് സൗകര്യം തുടങ്ങിയവ ഇതിന്റെ പ്രത്യേകതകളാണ്.

ബെംഗളൂരു-തുംകുരു റൂട്ടിൽ ആർആർടിഎസ് നടപ്പിലാക്കിയാൽ യാത്രാസമയം ഗണ്യമായി കുറയുകയും നഗര-ഉപനഗര ബന്ധം കൂടുതൽ ശക്തമാകുകയും ചെയ്യും. അതേസമയം മെട്രോ വിപുലീകരണത്തിന് പകരം ആർആർടിഎസ് മുന്നോട്ടുവയ്ക്കുന്നതിനെക്കുറിച്ച് ജനപ്രതിനിധികളും യാത്രക്കാരും വ്യത്യസ്ത അഭിപ്രായങ്ങൾ പ്രകടിപ്പിക്കുന്നുണ്ട്.

ഐടി നഗരമായ ബെംഗളൂരുവിലെ ഗതാഗതക്കുരുക്ക് കുറയ്ക്കുന്നതിനും ഉപനഗരങ്ങളിലേക്കുള്ള വികസനം പ്രോത്സാഹിപ്പിക്കുന്നതിനും ഇത്തരം ദീർഘദൂര അതിവേഗ ഗതാഗത പദ്ധതികൾ നിർണായകമാണെന്ന് വിലയിരുത്തപ്പെടുന്നു. പരീക്ഷണാടിസ്ഥാനത്തിൽ ബെംഗളൂരു-തുംകുരു റൂട്ടിൽ പദ്ധതി വിജയകരമായാൽ സംസ്ഥാനത്തെ മറ്റ് സമാന നഗര ബന്ധങ്ങളിലേക്കും ഇത് വ്യാപിപ്പിക്കാനാകും. സുസ്ഥിര നഗരവികസനവും കാര്യക്ഷമമായ ഗതാഗത സംവിധാനവും ലക്ഷ്യമിട്ട് സർക്കാർ അന്തിമ തീരുമാനത്തിലേക്ക് നീങ്ങുമെന്നാണ് സൂചന.