ബെംഗളൂരു: വിദ്യാര്ത്ഥിയെക്കൊണ്ട് ഷൂ നക്കിച്ചു;വീട്ടുടമയ്ക്കെതിരെ കേസ്!!
ബെംഗളൂരു: ഉത്തരേന്ത്യന് വിദ്യാര്ത്ഥിയെ മര്ദിക്കുകയും ഷൂ നക്കിച്ച സംഭവത്തില് എഫ് ഐആര്. ഹിഗിയോ ടാമ എന്ന അരുണാചല് സ്വദേശിയെയാണ് വീട്ടുടമ മര്ദ്ദിക്കുകയും ഷൂസ് നക്കിയ്ക്കുകയും ചെയ്തത്. മാര്ച്ച് ആറിനായിരുന്നു സംഭവം. വെള്ളം ഉപയോഗിച്ചതിന് വീട്ടുടമയോട് മാപ്പപേക്ഷിച്ചിരുന്നുവെന്നും അദ്ദേഹം ഇത്തരത്തിലാണ് പ്രതികരിച്ചതെന്നുമാണ് ടാമയുടെ പരാതി.
തങ്ങളെ വീട്ടുടമ ക്രൂരമായി മര്ദിച്ചുവെന്നും നിയമനടപടികളുമായി മുന്നോട്ടുപോകുമെന്നും ടാമ വ്യക്തമാക്കി. മൂന്ന് വിദ്യാര്ത്ഥികള് ചേര്ന്ന് താമസിക്കുന്ന വീട്ടിലാണ് സംഭവം. വിദേശത്തുള്ള ഇന്ത്യന് വിദ്യാര്ത്ഥികളുടെ സുരക്ഷയെക്കുറിച്ച് സംസാരിക്കുന്ന ഇന്ത്യയില് ഇത്തരമൊരു സംഭവം നടന്നത് വേദനിപ്പിക്കുന്നുവെന്ന് കേന്ദ്ര ആഭ്യന്തര സഹമന്ത്രി കിരണ് റിജിജു പറഞ്ഞു. കേസുമായി മുന്നോട്ടുപോകുമെന്ന് അദ്ദേഹം വ്യക്തമാക്കി. ക്രൈസ്റ്റ് സര്വ്വകലാശാലയിലെ നാലാം സെമസ്റ്റര് വിദ്യാര്ത്ഥിയാണ് ടാമ. ഹേമന്ത് കുമാര് എന്നയാളാണ് ടാമയെ ആക്രമിച്ചതെന്ന് തിരിച്ചറിഞ്ഞിട്ടുണ്ട്.
ഉത്തരേന്ത്യന് വിദ്യാര്ത്ഥി സംഘടനാംഗമായ ടാമയ്ക്ക് സംഘടനയാണ് വൈദ്യസഹായവും നിയമസഹായവും ലഭ്യമാക്കിയത്. അഭിഭാഷകരുടെ നിര്ദേശം സ്വീകരിച്ച് പോലീസ് കമ്മീഷറെ നേരില്ക്കണ്ട് പരാതി നല്കിയിട്ടുണ്ട്. വെള്ളം അധികം ഉപയോഗിച്ചതിന് ആക്രമിച്ചതിന് പിന്നാലെ ഉടന് തന്നെ വീട് ഒഴിഞ്ഞുപോകണമെന്ന് ആവശ്യപ്പെട്ടിരുന്നുവെന്നും ടാമ പരാതിയില് ചൂണ്ടിക്കാണിക്കുന്നു.