ബെംഗളൂരുവിൽ ഒറ്റയ്ക്ക് താമസിക്കുന്ന യുവതിക്ക് മാസചെലവ് 60,000; ചെലവ് കണക്ക് വൈറൽ

ബെംഗളൂരുവിലെ ജീവിതച്ചെലവ് കഴിഞ്ഞ കുറച്ച് വർഷങ്ങളായി സോഷ്യൽ ലോകത്ത് വലിയ ചർച്ചാ വിഷയമാണ്. വാടക, ഭക്ഷണം, യാത്ര, ഫിറ്റ്നസ് തുടങ്ങി ദൈനംദിന ആവശ്യങ്ങൾക്കായി വലിയ തുക ചെലവഴിക്കേണ്ടി വരാറുണ്ടെന്നാണ് നഗരത്തിൽ ഒറ്റയ്ക്ക് താമസിക്കുന്ന പല യുവ പ്രൊഫഷണലുകളും പങ്കുവെയ്ക്കാറുള്ളത്. ഇപ്പോഴിതാ ഇത്തരത്തിൽ ഒരു യുവതി തൻ്റെ ചെലവുകളെ കുറിച്ച് പങ്കുവെച്ച കുറിപ്പാണ് ശ്രദ്ധ നേടുന്നത്.

ബെംഗളൂരുവിലെ എച്ച്എസ്ആർ ലേഔട്ടിൽ ഒറ്റയ്ക്ക് താമസിക്കുന്ന ശ്രദ്ധി എന്ന യുവതിയാണ് വാടക ഉൾപ്പെടെ തനിക്ക് വരുന്ന ചെലവുകൾ വിവരിച്ച് കുറിപ്പ് പങ്കുവെച്ചത്. താൻ താമസിക്കുന്ന 1 ബിഎച്ച്കെ ഫ്ലാറ്റിന് പ്രതിമാസം 36,000 രൂപയാണ് വാടക വരുമെന്നാണ് അവർ റയുന്നത്. വീട്ടുപകരണങ്ങൾക്കും ഫർണിച്ചറുകൾക്കും വാടകയായി ഏകദേശം 5,000 രൂപ കൂടി ചെലവാകും. ഇതിന് പുറമെ ഹൗസ് കീപ്പിംഗ് സേവനങ്ങൾക്കും വൈദ്യുതി ബില്ലിനുമായി ഏകദേശം 4,000 രൂപയും പ്രതിമാസം ചെലവാകുന്നതായി യുവതി വ്യക്തമാക്കി.

ഭക്ഷണത്തിനായി പ്രതിമാസം 7,000 മുതൽ 8,000 രൂപ വരെയാണ് ചെലവ്. മിക്ക ഭക്ഷണവും വീട്ടിൽ തന്നെ പാചകം ചെയ്യുന്നതിനാൽ ചെലവ് നിയന്ത്രിക്കാനാകുന്നുണ്ടെന്നും ആരോഗ്യകരമായ ഭക്ഷണരീതിയാണ് പിന്തുടരുന്നതെന്നും അവർ പറഞ്ഞു. യാത്രാച്ചെലവായി 4,000 മുതൽ 5,000 രൂപ വരെ എല്ലാ മാസവും ചെലവാകുന്നുണ്ട്.

ഫിറ്റ്നസിന് തൻ്റ ജീവിതത്തിൽ വളരെ പ്രാധാന്യമുണ്ട്. അതിനാൽ ജിം അംഗത്വം, പിലേറ്റ്സ് ക്ലാസുകൾ, മറ്റ് വർക്ക്‌ഔട്ട് സെഷനുകൾ എന്നിവയ്ക്കായി ഏകദേശം 5,000 രൂപയാണ് മാസം ചെലവഴിക്കുന്നതെന്നും ശ്രിദ്ധി പറഞ്ഞു. കാപ്പി, പുറത്തുനിന്നുള്ള ഭക്ഷണം, രാത്രി വൈകിയുള്ള ഓർഡറുകൾ എന്നിവയുടെ ചെലവ് ഓരോ മാസവും വ്യത്യാസപ്പെടാറുണ്ടെന്നും അത് താൻ ചിലവുകൾ എങ്ങനെ നിയന്ത്രിക്കുന്നു എന്നതിനെ ആശ്രയിച്ചിരിക്കുന്നുവെന്നും അവർ പറഞ്ഞു.

അതേസമയം ഷോപ്പിങ്ങിനും മറ്റും എത്ര ചെലവാകും എന്ന് ശ്രിദ്ധി പറഞ്ഞില്ല. 'ബെംഗളൂരുവിലെ അഡൾട്ടിങ് രസകരമാണ്. പക്ഷേ എന്റെ ബാങ്ക് അക്കൗണ്ടിന് അതിനോട് യോജിപ്പുണ്ടാകണമെന്നില്ല' എന്ന കുറിപ്പോടെയാണ് അവർ വീഡിയോ പങ്കുവെച്ചത്.

വീഡിയോ വൈറലായതോടെ നിരവധി പേരാണ് വീഡിയോക്ക് താഴെ കമൻ്റ് ചെയ്യുന്നത്. യുവതിയുടെ ചെലവുകൾ യാഥാർഥ്യത്തോട് ചേർന്നതാണെന്ന് ചിലർ അഭിപ്രായപ്പെട്ടപ്പോൾ, പ്രതിമാസം ഏകദേശം 60,000 രൂപയോളം ജീവിതച്ചെലവിനായി മാറ്റിവെയ്ക്കുന്നത് വളരെ അധിക കൂടുതലാണെന്ന് മറ്റുചിലർ ചൂണ്ടിക്കാട്ടുന്നത്. മികച്ച സാമ്പത്തിക ആസൂത്രണത്തിലൂടെ ചെലവ് കുറയ്ക്കാനാകുമെന്ന നിർദേശങ്ങളും ചിലർ മുന്നോട്ടുവെച്ചു.

എച്ച്എസ്ആർ ലേഔട്ടിന് പകരം വാടക കുറഞ്ഞ സമീപ പ്രദേശങ്ങളിൽ താമസിച്ചാൽ ആ ചെലവ് കുറയ്ക്കാനാകുമെന്നായിരുന്നു ചിലരുടെ അഭിപ്രായം. അതേസമയം ഒരു പ്രത്യേക പ്രദേശത്തിന്റെ സൗകര്യങ്ങളും ജീവിതശൈലിയും തിരഞ്ഞെടുക്കുമ്പോൾ അതിനനുസരിച്ചുള്ള ചെലവും സ്വാഭാവികമാണെന്ന് മറ്റുചിലർ അഭിപ്രായപ്പെട്ടു.