ബെംഗളൂരുവിലെ രണ്ടാമത്തെ വിമാനത്താവളം; പരിഗണിക്കുന്നത് ഈ മൂന്ന് ഇടങ്ങൾ.. പ്രധാന വെല്ലുവിളികൾ ഇങ്ങനെ

ബെംഗളൂരുവിൽ രണ്ടാമതൊരു അന്താരാഷ്ട്ര വിമാനത്താവളം നിർമ്മിക്കുന്നതുമായി ബന്ധപ്പെട്ട്, എയർപോർട്ട്‌സ് അതോറിറ്റി ഓഫ് ഇന്ത്യ (AAI) കർണാടക സർക്കാരിന് പ്രാഥമിക സാധ്യത പഠന റിപ്പോർട്ട് സമർപ്പിച്ചു. വിമാനത്താവളത്തിനായി സ്ഥലം തിരഞ്ഞെടുക്കുന്നതിന് മുമ്പ് പരിഹരിക്കേണ്ട ചില പ്രധാന വെല്ലുവിളികൾ ഈ റിപ്പോർട്ടിൽ ചൂണ്ടിക്കാട്ടുന്നു.

ഹാരോഹള്ളിക്ക് സമീപം കനകപുര റോഡിലുള്ള 4,800 ഏക്കറും 5,000 ഏക്കറും വരുന്ന സ്ഥലങ്ങളും, നെലമംഗലക്ക് സമീപം കുനിഗൽ റോഡിലുള്ള 5,200 ഏക്കർ സ്ഥലവും ഉൾപ്പെടെ മൂന്ന് സ്ഥലങ്ങളാണ് എഎഐ പഠനത്തിനായി പരിഗണിച്ചത്. റിപ്പോർട്ട് ഒരു സ്ഥലത്തെയും തിരഞ്ഞെടുക്കുകയോ നിരസിക്കുകയോ ചെയ്യുന്നില്ല. പകരം ഓരോ സ്ഥലത്തിനുമുള്ള ബുദ്ധിമുട്ടുകൾ എടുത്തുപറയുക മാത്രമാണ് ചെയ്യുന്നത്.

ബന്നാർഘട്ട വനപ്രദേശത്തിന് സമീപത്താണ് നിർദ്ദേശിച്ച മൂന്ന് സ്ഥലങ്ങളും സ്ഥിതിചെയ്യുന്നത്. വിമാനം പറന്നുയരുമ്പോഴും താഴെയിറങ്ങുമ്പോഴും ഇത് സുരക്ഷാ പ്രശ്നങ്ങൾക്ക് കാരണമായേക്കാമെന്ന് ഉദ്യോഗസ്ഥർ പറയുന്നു. അതിനാൽ, വിശദമായ വ്യോമയാന പഠനങ്ങൾ ആവശ്യമായി വരും. നെലമംഗല, കുനിഗൽ എന്നിവിടങ്ങളിലെ ഭൂപ്രകൃതി പാറക്കെട്ടുകളും നിരപ്പില്ലാത്തതുമാണെന്ന് എഎഐ റിപ്പോർട്ടിൽ പറയുന്നു. ഇവിടെ വലിയ തോതിലുള്ള നിരപ്പാക്കൽ ജോലികൾക്ക് ആവശ്യമാണ്, ഇത് നിർമ്മാണച്ചെലവ് ഗണ്യമായി വർദ്ധിപ്പിക്കും.

ഹാൽ (HAL) വ്യോമമേഖലയുമായുള്ള ഓവർലാപ്പ് ആണ് മറ്റൊരു പ്രധാന വെല്ലുവിളി. തിരഞ്ഞെടുക്കപ്പെട്ട സ്ഥലങ്ങൾ ഹിന്ദുസ്ഥാൻ ഏറോനോട്ടിക്കൽ ലിമിറ്റഡിന്റെ വ്യോമമേഖലയിൽ ഉൾപ്പെടുന്നതാണ്. സിവിൽ, പ്രതിരോധ വ്യോമയാന അധികാരികൾ തമ്മിൽ ഒരe ഉടമ്പടി ഉണ്ടാക്കേണ്ടതുണ്ട്, ഇത് രണ്ട് പ്രവർത്തനങ്ങളും സുരക്ഷിതമായി കൈകാര്യം ചെയ്യാൻ സഹായിക്കും.

ഈ റിപ്പോർട്ട് നിഷ്പക്ഷമാണെന്നും ഒരു റഫറൻസിനായി മാത്രമുള്ളതാണെന്നും വ്യവസായ മന്ത്രി എം.ബി. പാട്ടീൽ പറഞ്ഞു. ഓരോ സ്ഥലത്തിനും അതിൻ്റേതായ ഗുണങ്ങളും ദോഷങ്ങളുമുണ്ട്. അന്തിമ തീരുമാനം എടുക്കുന്നതിന് മുമ്പ് ഞങ്ങൾ സ്വന്തമായി വിശദമായ സാങ്കേതിക, സാമ്പത്തിക പഠനങ്ങൾ നടത്തുമെന്നും പാട്ടീൽ വ്യക്തമാക്കി. സ്വകാര്യ ഡെവലപ്പർമാരെ ഉൾപ്പെടുത്തുന്നതിന് മുമ്പ് പ്രമുഖ അടിസ്ഥാന സൗകര്യ, വ്യോമയാന വിദഗ്ധരുമായി കൂടിയാലോചന നടത്താനും സർക്കാരിന് പദ്ധതിയിടുന്നുണ്ട്.

ബെംഗളൂരുവിലെ കെംപഗൗഡ അന്താരാഷ്ട്ര വിമാനത്താവളത്തിൽ യാത്രക്കാരുടെ എണ്ണത്തിൽ അതിവേഗ വർധനവാണ് ഉണ്ടായത്. വിമാനത്താവളത്തിന് ഉൾക്കൊള്ളാവുന്നതിലും അപ്പുറമാണ് ഇപ്പോഴത്തെ തിരക്ക്. അടുത്ത ദശകത്തിൽ യാത്രക്കാരുടെ എണ്ണം ഇരട്ടിയാകുമെന്നാണ് പ്രതീക്ഷിക്കുന്നത്. ഭാവിയിലെ യാത്രക്കാരുടെ തിരക്ക് കൈകാര്യം ചെയ്യാൻ ഒരു രണ്ടാമത്തെ വിമാനത്താവളം പരിഗണിക്കുന്നത് അതുകൊണ്ടാണ്. എന്നിരുന്നാലും, ബെംഗളൂരുവിൻ്റെ 100-120 കിലോമീറ്റർ ചുറ്റളവിൽ അനുയോജ്യമായ ഭൂമി കണ്ടെത്തുന്നത് എളുപ്പമല്ലെന്ന് AAI റിപ്പോർട്ട് സൂചിപ്പിക്കുന്നു. കൂടാതെ, ഈ പദ്ധതിക്ക് പരിസ്ഥിതി, സാമ്പത്തിക, വ്യോമമേഖലയുമായി ബന്ധപ്പെട്ട തടസ്സങ്ങൾ നേരിടേണ്ടി വരുമെന്നും റിപ്പോർട്ട് പറയുന്നു.

English summary

The Airports Authority of India submitted a report addressing challenges in selecting a site for Bengaluru's second international airport, focusing on environmental concerns and construction costs. The report highlights three potential locations and the need for further studies before final decisions.