ബിപ്ലബ് കുമാർ ദേബ് ത്രിപുരയിലെ ആദ്യ ബിജെപി മുഖ്യമന്ത്രി! സത്യപ്രതിജ്ഞ വെള്ളിയാഴ്ച...

വെള്ളിയാഴ്ച രാവിലെ 10.30ന് നടക്കുന്ന സത്യപ്രതിജ്ഞാ ചടങ്ങിൽ പ്രധാനമന്ത്രി നരേന്ദ്രമോദി, കേന്ദ്രമന്ത്രിമാർ, വിവിധ സംസ്ഥാനങ്ങളിലെ ബിജെപി മുഖ്യമന്ത്രിമാർ തുടങ്ങിയവർ പങ്കെടുക്കും.

അഗർത്തല: ബിജെപി സംസ്ഥാന പ്രസിഡന്റ് ബിപ്ലബ് കുമാർ ദേബിനെ ത്രിപുരയിലെ മുഖ്യമന്ത്രിയായും, ജിഷ്ണു ദേബ് ബർമ്മനെ ഉപമുഖ്യമന്ത്രിയായും പ്രഖ്യാപിച്ചു. ബിജെപി ദേശീയ നേതാവും കേന്ദ്രമന്ത്രിയുമായ നിതിൻ ഗഡ്കരിയാണ് ത്രിപുരയിലെ പുതിയ മുഖ്യമന്ത്രിയെ പ്രഖ്യാപിച്ചത്.

ബിജെപി ത്രിപുര സംസ്ഥാന പ്രസിഡന്റായ ബിപ്ലബ് കുമാർ ദേബ് മാർച്ച് ഒമ്പത് വെള്ളിയാഴ്ച മുഖ്യമന്ത്രിയായി സത്യപ്രതിജ്ഞ ചെയ്യും. വെള്ളിയാഴ്ച രാവിലെ 10.30ന് നടക്കുന്ന സത്യപ്രതിജ്ഞാ ചടങ്ങിൽ പ്രധാനമന്ത്രി നരേന്ദ്രമോദി, കേന്ദ്രമന്ത്രിമാർ, വിവിധ സംസ്ഥാനങ്ങളിലെ ബിജെപി മുഖ്യമന്ത്രിമാർ തുടങ്ങിയവർ പങ്കെടുക്കും.

ഉപമുഖ്യമന്ത്രി...

ബിജെപി സംസ്ഥാന പ്രസിഡന്റ് ബിപ്ലബ് കുമാർ ദേബ് മുഖ്യമന്ത്രിയായി അധികാരമേൽക്കുമ്പോൾ ജിഷ്ണു ദേബ് ബർമ്മനാണ് ഉപമുഖ്യമന്ത്രി. ബിജെപിയുടെ സഖ്യകക്ഷിയായ ഐപിഎഫ്ടിയുടെ ആവശ്യം പരിഗണിച്ചാണ് ആദിവാസി നേതാവായ ജിഷ്ണു ദേബ് ബർമ്മനെ ഉപമുഖ്യമന്ത്രിയായി പ്രഖ്യാപിച്ചത്.

ഐപിഎഫ്ടി...

മുഖ്യമന്ത്രി സ്ഥാനത്തേക്ക് ആദിവാസി വിഭാഗത്തിൽപ്പെട്ടയാളെ തിരഞ്ഞെടുക്കണമെന്ന് ഐപിഎഫ്ടി നേരത്തെ ആവശ്യപ്പെട്ടിരുന്നു. എന്നാൽ ഇക്കാര്യത്തിൽ ബിജെപി ചർച്ച നടത്തിയതോടെ ഐപിഎഫ്ടി നിലപാട് മയപ്പെടുത്തി. ഉപമുഖ്യമന്ത്രി സ്ഥാനത്തേക്ക് ആദിവാസി വിഭാഗത്തെ പരിഗണിക്കാമെന്ന ഉറപ്പിലാണ് ഐപിഎഫ്ടി അയഞ്ഞത്.

‌ബിജെപി സംസ്ഥാന പ്രസിഡന്റ്...

ത്രിപുരയിലെ ചരിത്ര വിജയത്തിന് ചുക്കാൻ പിടിച്ച ബിജെപി സംസ്ഥാന പ്രസിഡന്റായ ബിപ്ലബ് കുമാർ ദേബിനെ മുഖ്യമന്ത്രിയാക്കുമെന്ന് നേരത്തെ തന്നെ റിപ്പോർട്ടുകളുണ്ടായിരുന്നു. ആർഎസ്എസിലൂടെ രാഷ്ട്രീയ രംഗത്ത് പ്രവേശിച്ച ബിപ്ലബ് കുമാറായിരുന്നു ബിജെപിയുടെ തിരഞ്ഞെടുപ്പ് പ്രചാരണങ്ങൾ നയിച്ചത്.

ജിം ഇൻസ്ട്രക്ടർ...

15 വർഷം മുൻപ് ഉന്നത പഠനത്തിനായി ദില്ലിയിലെത്തിയ ബിപ്ലബ്, പിന്നീട് തലസ്ഥാനം കേന്ദ്രീകരിച്ചായിരുന്നു പ്രവർത്തിച്ചിരുന്നത്. ദില്ലിയിലെ ജീവിതകാലത്ത് ജിം ഇൻസ്ട്രക്ടറായും അദ്ദേഹം ജോലി ചെയ്തിരുന്നു.

ത്രിപുരയിലേക്ക്...

മധ്യപ്രദേശിലെ എംപി ഗണേഷ് സിങിന്റെ അസിസ്റ്റന്റായി പ്രവർത്തിക്കുന്നതിനിടെയാണ് ബിപ്ലബ് കുമാറിനെ പാർട്ടി ത്രിപുരയിലേക്ക് അയച്ചത്. ബിപ്ലബിന്റെ വരവോട് ത്രിപുരയിലെ ബിജെപിക്ക് ശക്തി വർദ്ധിച്ചു.

സഖ്യം...

ഐപിഎഫ്ടിയുമായുള്ള സഖ്യ രൂപീകരണത്തിലും ബിപ്ലബ് തന്നെയാണ് നിർണ്ണായക പങ്ക് വഹിച്ചത്. നിയമസഭ തിരഞ്ഞെടുപ്പിൽ സംസ്ഥാനത്തൊട്ടാകെ പ്രചാരണത്തിന് നേതൃത്വം നൽകിയ അദ്ദേഹം, ബനാമലിപൂരിൽ മത്സരിച്ച് വൻ ഭൂരിപക്ഷത്തിലാണ് ജയിച്ചുകയറിയത്.

കുടുംബം...

ത്രിപുരയിൽ ഇന്നേറ്റവും ജനപ്രീതിയുള്ള നേതാവായി മാറിയ ബിപ്ലബിനെ മുഖ്യമന്ത്രിയാക്കുമെന്ന് ബിജെപി നേതാക്കൾ നേരത്തെ തന്നെ വ്യക്തമാക്കിയിരുന്നു. ദില്ലി പാർലമെന്റ് ഹൗസ് എസ്ബിഐ ബ്രാഞ്ചിൽ ഡെപ്യൂട്ടി മാനേജറായി ജോലി ചെയ്യുന്ന ഭാര്യയും രണ്ട് കുട്ടികളുമടങ്ങുന്നതാണ് ബിപ്ലബിന്റെ കുടുംബം.

English summary

bjp announced biplab kumar deb to be next cm of tripura.