ഇത് മോശം സമയം, ഒരു ദിവസം നിങ്ങള്‍ സ്വതന്ത്രനാവും, കുല്‍ദീപ് സെംഗാറിനെ പിന്തുണച്ച് ബിജെപി എംഎല്‍എ

ലഖ്‌നൗ: ഉന്നാവോ പീഡനക്കേസില്‍ പ്രധാന പ്രതി കുല്‍ദീപ് സിംഗ് സെംഗാറിന് ബിജെപിയില്‍ നിന്ന് പിന്തുണ വര്‍ധിക്കുന്നു. കഴിഞ്ഞ ദിവസം സെംഗാറിനെ ബിജെപി പാര്‍ട്ടിയില്‍ നിന്ന് പുറത്താക്കിയിരുന്നു. എന്നാല്‍ സാക്ഷി മഹാരാജിനെ പോലുള്ളവര്‍ കുല്‍ദീപിനെ ഇപ്പോഴും പിന്തുണയ്ക്കുന്നുണ്ട്. ബിജെപി എംഎല്‍എയായ ആശിഷ് സിംഗ് അശുവാണ് കുല്‍ദീപിന് പിന്തുണയുമായി എത്തിയിരിക്കുന്നത്.

ആശിഷ് സിംഗ് യുപിയിലെ മല്ലാവന്‍ മണ്ഡലത്തില്‍ നിന്നുള്ള എംഎല്‍എയാണ്. പാര്‍ട്ടി പരിപാടിക്കിടെയാണ് കുല്‍ദീപിനെ അനുകൂലിച്ച് ഇയാള്‍ സംസാരിച്ചത്. കുല്‍ദീപ് സെംഗാര്‍ വളരെ ബുദ്ധിമുട്ടേറിയ സാഹചര്യത്തിലൂടെയാണ് കടന്നുപോകുന്നത്. പക്ഷേ അദ്ദേഹത്തിന് നല്ല ദിവസങ്ങള്‍ വരും. ഒരു ദിവസം അദ്ദേഹം സ്വതന്ത്രനാവുമെന്നും ആശിഷ് സിംഗ് പറഞ്ഞു. അതേസമയം ഇതിനെ പാര്‍ട്ടിയിലെ ഒരംഗവും ഇതിനെ എതിര്‍ത്തിട്ടില്ല.

ഇന്ന് നമ്മുടെ സഹോദരന്‍ കുല്‍ദീപ് സിംഗ് നമുക്കിടയില്‍ ഇല്ല. നമുക്കറിയാം അദ്ദേഹം കഠിനമായ സാഹചര്യത്തിലൂടെയാണ് കടന്നുപോകുന്നത്. അദ്ദേഹം എല്ലാ ആരോഗ്യത്തോടെയും തിരിച്ചുവരാന്‍ പ്രാര്‍ത്ഥിക്കുന്നു. മോശം ദിവസങ്ങളെ അദ്ദേഹം മറികടക്കുമെന്നാണ് പ്രതീക്ഷ. അദ്ദേഹം എല്ലാത്തിനുമെതിരെ പോരാടും. സത്യം തെളിയിച്ച് അദ്ദേഹം മടങ്ങിവരും. ഞങ്ങള്‍ എല്ലാവരും നിങ്ങളുടെ കൂടെയുണ്ടെന്നും ആശിഷ് സിംഗ് പറഞ്ഞു.

അതേസമയം ബലാത്സംഗ കേസില്‍ കുല്‍ദീപ് ഒരു വര്‍ഷത്തിലേറെയായി ജയിലിലാണ്. എന്നാല്‍ ബിജെപി അദ്ദേഹത്തെ തള്ളിപ്പറയാന്‍ തീരുമാനിച്ചിട്ടില്ല. പല നേതാക്കളും അദ്ദേഹവുമായി ഇപ്പോഴും അടുപ്പം പുലര്‍ത്തുന്നുണ്ട്. ഉന്നാവോ പെണ്‍കുട്ടിക്കെതിരെയുള്ള ആക്രമണത്തില്‍ ഗൂഢാലോചന ഉണ്ടെന്നാണ് പ്രത്യക്ഷത്തില്‍ വ്യക്തമാകുന്നത്. ഇതില്‍ പെണ്‍കുട്ടി ഇപ്പോഴും ജീവന് വേണ്ടി മല്ലിട്ട് കൊണ്ടിരിക്കുകയാണ്. കഴിഞ്ഞ സിബിഐ അദ്ദേഹത്തിനെതിരെ കേസ് രജിസ്റ്റര്‍ ചെയ്തിരുന്നു.

English summary

bjp mla supports kuldeep sengar