ജനസംഖ്യാ അസന്തുലിതാവസ്ഥയ്ക്ക് പിന്നിൽ ആമിർഖാനെപ്പോലുള്ളവർ: കടന്നാക്രമിച്ച് ബിജെപി എംപി

മുംബൈ: ബോളിവുഡ് നടൻ ആമിർ ഖാനും കിരൺ റാവുവും വേർപിരിഞ്ഞതിന് പിന്നാലെ ആമിർ ഖാനെ കടന്നാക്രമിച്ച് ബിജെപി എംപി സുധീർ ഗുപ്ത. രാജ്യത്തെ ജനസംഖ്യാ അസന്തുലിതാവസ്ഥയ്ക്ക് പിന്നിൽ ആമിർ ഖാനെപ്പോലെയുള്ളവരാണെന്നും മന്ദ്സൌറിൽ നിന്നുള്ള ബിജെപി എംപിയായ സുധീർ ഗുപ്ത അവകാശപ്പെടുന്നു. ഞായറാഴ്ച നടന്ന ലോക ജനസംഖ്യാ ദിനത്തോടനുബന്ധിച്ച് മാധ്യമപ്രവർത്തകരുമായി സംവദിക്കുന്നതിനിടെയായിരുന്നു അദ്ദേഹത്തിന്റെ പ്രതികരണം.

രാജ്യത്തെ ജനസംഖ്യ 140 കോടിയിലെത്തിയപ്പോൾ ഒരു ഇഞ്ച് ഭൂമി വർദ്ധിക്കുന്നത് രാജ്യത്ത് കണ്ടിട്ടില്ലെന്നും അതുകൊണ്ട് തന്നെ ഇത് നല്ല വാർത്തയല്ലെന്നും ബിജെപി എംപി പറഞ്ഞു. വിഭജനകാലത്ത് പാകിസ്താനാണ് ഭൂപ്രദേശത്തിന്റെ ഏറിയ പങ്കും ലഭിച്ചതെങ്കിലും കുറച്ച് ജനങ്ങളാണ് പാകിസ്താന്റെ ഭാഗമായിരുന്നത്. വിഭജനത്തിന് ശേഷം വലിയൊരു ശതമാനം ജനങ്ങൾ ഇന്ത്യയിലേക്ക് തിരിച്ചു പോരാൻ നിർബന്ധിതരായിട്ടുണ്ട്.

"ഇന്ത്യൻ വീക്ഷണകോണിൽ പറഞ്ഞാൽ, ജനങ്ങളുടെ നായകൻ ആമിർ ഖാൻ (ബോളിവുഡ് താരം), അവരുടെ ആദ്യ ഭാര്യ റീനയെയും കുട്ടികളെയും രണ്ടാം ഭാര്യ കിരൺ റാവുവിനെയും മകനെയും ഉപേക്ഷിച്ച് മൂന്നാമതൊരു ഭാര്യയ്ക്ക് വേണ്ടിയുള്ള അന്വേഷണത്തിലാണെന്നും അദ്ദേഹം കൂട്ടിച്ചേർത്തു. ബോളിവുഡ് നടൻ ആമിർ ഖാനും കിരൺ റാവുവും തമ്മിൽ വേർപിരിഞ്ഞതായുള്ള പ്രഖ്യാപനം പുറത്തുവന്നതിന് പിന്നാലെയാണ് സുധീർ ഗുപ്ത അദ്ദേഹത്തിനെതിരെ രംഗത്തെത്തിയിട്ടുള്ളത്.

രാജ്യത്തെ ജനസംഖ്യാ അസന്തുലിതാവസ്ഥയ്ക്ക് ആമിർ ഖാനെപ്പോലുള്ളവർക്ക് പങ്കുണ്ട്. ആമിർ ഖാനെപ്പോലുള്ളവർക്ക് മുട്ട വിൽക്കുന്നതിനല്ലാതെയുള്ള ജോലിക്ക് തലച്ചോറില്ലെന്നാണ് ചിലർ അവകാശപ്പെടുന്നത്. ഫരീദാബാദ് സ്വദേശിയായ ജോജോ മരിച്ചത് എട്ടാമത്തെ കുഞ്ഞിന് ജന്മം നൽകിയതിന് ശേഷം സ്തനാർബുദം ബാധിച്ചാണ്. അവരുടെ എട്ട് കുഞ്ഞുങ്ങളും ലോകത്തിന് നല്ല സന്ദേശം നൽകുന്നത് കാണുമ്പോൾ അവർ സന്തോഷിക്കുന്നുണ്ടെന്നും ബിജെപി എംപി പറഞ്ഞു. നമുക്ക് ജനസംഖ്യാ നിയന്ത്രണത്തിനും ജനങ്ങളുടെ മാനസികാവസ്ഥ മാറ്റുന്നതിനുമുള്ള സമീപനങ്ങളും വേണമെന്നും അദ്ദേഹം പറഞ്ഞു.

English summary

BJP MP Sudhir Gupta criticizes Aamir Khan over population imbalance