കശ്മീരില് പിഡിപി-ബിജെപി സഖ്യം പൊളിഞ്ഞു; പിന്തുണ പിന്വലിച്ച് ബിജെപി, മെഹ്ബൂബ രാജിവച്ചു
ശ്രീനഗര്: വിചിത്ര നീക്കങ്ങളുമായി കശ്മീരില് ബിജെപി. പിഡിപി-ബിജെപി സഖ്യം പിരിഞ്ഞു. മെഹ്ബൂബ മുഫ്തി സര്ക്കാരിനുള്ള പിന്തുണ ബിജെപി പിന്വലിച്ചു. പിഡിപിയുമായി ചേര്ന്ന് മുന്നോട്ട് പോകാന് സാധിക്കില്ലെന്ന് ബിജെപി ജനറല് സെക്രട്ടറി രാം മാധവ് പിന്തുണ പിന്വലിച്ച് വ്യക്തമാക്കി. കശ്മീരില് രാഷ്ട്രപതി ഭരണം വേണമെന്നും അദ്ദേഹം ആവശ്യപ്പെട്ടു. ബിജെപി പിന്തുണ പിന്വലിച്ചതിന് പിന്നാലെ മെഹ്ബൂബ മുഖ്യമന്ത്രി പദം രാജിവച്ചു.
കശ്മീരില് ഗവര്ണര് ഭരണം വേണമെന്നു രാം മാധവ് ആവശ്യപ്പെട്ടു. പിഡിപിയുമായി ഒരുമിച്ച് ഇനിയും മുന്നോട്ട് പോകാന് സാധിക്കില്ലെന്ന് അദ്ദേഹം പറഞ്ഞു. ബിജെപി പിന്തുണ പിന്വലിച്ച സാഹചര്യത്തില് രാഷ്ട്രപതി ഭരണം ഏര്പ്പെടുത്തിയേക്കുമെന്നാണ് വിവരം.
ബിജെപി പ്രഖ്യാപനം വന്നതിന് പിന്നാലെ പിഡിപി നേതാക്കള് യോഗം ചേര്ന്നു. സംസ്ഥാനത്തെ രാഷ്ട്രീയ സ്ഥിതിഗതികള് യോഗം ചര്ച്ച ചെയ്തു. മെഹ്ബൂബ മാധ്യമങ്ങളെ കണ്ട് രാഷ്ട്രീയ നിലപാട് വ്യക്തമാക്കും. സംസ്ഥാനത്തിന്റെ എല്ലാ ഭാഗങ്ങള്ക്കും തുല്യമായ പങ്ക് ലഭിക്കുന്നില്ലെന്നും ബിജെപി ആരോപിച്ചു.
തീവ്രവാദ വിരുദ്ധ നടപടികള് റമദാന് ശേഷം പുനരാരംഭിക്കാന് കേന്ദ്രസര്ക്കാര് തീരുമാനിച്ചതാണ് പുതിയ പ്രശ്നങ്ങള്ക്ക് കാരണം. കത്വ സംഭവത്തില് ബിജെപി നേതാക്കള് പ്രതികളുടെ പക്ഷം പിടിച്ചതിനെതിരെ പിഡിപി രംഗത്തുവന്നിരുന്നു. തീവ്രവാദ വിരുദ്ധ നടപടികളുടെ പശ്ചാത്തലത്തില് ഭിന്നത കൂടുതല് ശക്തിപ്പെടുകയായിരുന്നു.
89 അംഗ നിയമസഭയാണ് കശ്മീരിലേത്. ഇതില് ബിജെപിക്ക് 25 ഉം പിഡിപിക്ക് 28 ഉം അംഗങ്ങളാണുള്ളത്. സര്ക്കാരിനുള്ള പിന്തുണ പിന്വലിക്കുന്നതിന് മുമ്പ് കശ്മീരിലെ ബിജെപി നേതാക്കളുമായി പാര്ട്ടി ദേശീയ അധ്യക്ഷന് അമിത് ഷാ ദില്ലിയില് ചര്ച്ച നടത്തിയിരുന്നു.