മേഘ്നയുടെ നഗ്നപിന്തുണ ബിജെപിക്ക് വേണ്ട
മുംബൈ: ബിജെപിയുടെ തിരഞ്ഞെടുപ്പ് ചിഹ്നമായ താമരകൊണ്ട് നഗ്നത മറച്ച് നരേന്ദ്ര മോദിക്ക് പിന്തുണ പ്രഖ്യാപിച്ച ബോളിവുഡ് സുന്ദരിയായ മേഘ്ന പട്ടേല് പുലിവാല് പിടിക്കുമോ. സംഗതി മോദിയെ ആര് സപ്പോര്ട്ട് ചെയ്യുന്നതും ബി ജെ പിക്ക് ഇഷ്ടമാണെങ്കിലും ഇത് മാതിരിയുള്ള അശ്ലീലങ്ങളെ പാര്ട്ടി പ്രോത്സാഹിപ്പിക്കില്ല എന്നാണ് മഹാരാഷ്ട്രയിലെ ബി ജെ പി നേതാക്കള് പറയുന്നത്.
നരേന്ദ്ര മോദിയുടെ പേരില് ചുളുവില് പ്രശസ്തയാകാന് വേണ്ടി മേഘ്ന പട്ടേല് നടത്തിയ കലാപരിപാടിയാണ് ഈ ഫോട്ടോഷൂട്ട് എന്നും ആരോപണമുണ്ട്. അല്ലാതെ മോദിയെ പിന്തുണയ്ക്കാനാണെങ്കില് വേറെ എന്തൊക്കെ വഴികളുണ്ട്. മോദിയുടെ ഒരു റാലിയില് പങ്കെടുത്തുകൂടെ, നഗ്നയായി ഫോട്ടോയെടുത്ത് പ്രചരിപ്പിക്കണോ. ഇങ്ങനെ പോകുന്നു മഹാരാഷ്ട്രയിലെ ബി ജെ പി നേതാക്കളുടെ ചോദ്യങ്ങള്.
മേഘ്ന പട്ടേലിന്റെ പ്രവൃത്തിയെ പാര്ട്ടി അപലപിക്കുന്നതായി പാര്ട്ടി വക്താവ് മാധവ് ഭണ്ഡാരി പറഞ്ഞു. പാര്ട്ടിയെ അപമാനപ്പെടുത്താന് ശ്രമിക്കുന്ന മോഡലുകള്ക്കെതിരെ നിയമനടപടി സ്വീകരിക്കാന് പാര്ട്ടി നേതൃത്വത്തിന്റെ അനുമതി വാങ്ങാനും നേതാക്കള്ക്ക് പദ്ധതിയുണ്ട്. അങ്ങിനെ സംഭവിച്ചാല് ബി ജെ പി നിയമ നടപടി സ്വീകരിക്കുന്ന ആദ്യ മോഡലാകും മേഘ്ന പട്ടേല്.
പക്ഷേ തന്റെ പിന്തുണ അശ്ലീലമായിപ്പോയി എന്ന് സമ്മതിക്കാന് മേഘ്ന പട്ടേല് എന്തായാലും തയ്യാറല്ല. വര്ത്തമാനകാലത്തിന്റെ വക്താവാണ് മോദി. ധീരതയുടെ പ്രതീകമാണ് അദ്ദേഹം. ജനങ്ങളുടെ ഹൃദയങ്ങളില് മികച്ചൊരു സ്ഥാനം തന്നെയുണ്ട് അദ്ദേഹത്തിന്. ആത്മാര്ഥമായിത്തന്നെയാണ് താന് മോദിയെ പിന്തുണയ്ക്കുന്നത്. പോരാത്തതിന് നഗ്നയായിട്ടല്ല താന് ഫോട്ടോഷൂട്ടിന് നിന്നത്. വസ്ത്രം ധരിച്ചു തന്നെയാണ് - താരം പറയുന്നു.