കൂടംകുളം ആണവനിലയത്തില് പൊട്ടിത്തെറി
കൂടംകളം: കൂടംകുളത്തെ ആണവ നിലയത്തില് വന് പൊട്ടിത്തെറി നടന്നതായി റിപ്പോര്ട്ട്. ആറ് പേര്ക്ക് പരിക്കേറ്റതായാണ് വിവരം. ബോയ്ലര് പ്ലാന്റിലാണ് പൊട്ടിത്തെറി നടന്നത് എന്നാണ് പ്രാഥമിക വിവരം.
കൂടംകുളത്ത് ആണവ നിലയം തുടങ്ങുന്നതിനെ ശക്തമായ പ്രതിഷേധമാണ് അരങ്ങേറിയിരുന്നത്. ഇത് സംബന്ധിച്ച സമരങ്ങള് ഇപ്പോഴും അവസാനിച്ചിട്ടില്ല. അതിനിടെയാണ് പ്ലാന്റ് പ്രവര്ത്തനം തുടങ്ങി അധികകാലം കഴിയുന്നതിന് സ്ഫോടനം നടന്നിട്ടുള്ളത്.
എന്നാല് ബോയ്ലര് പ്ലാന്റില് അറ്റകുറ്റപ്പണി നടക്കുന്നതിനെ ഉണ്ടായ ചെറിയ അപകടം മാത്രമാണ് ഇപ്പോള് സംഭവിച്ചതെന്നാണ് പറയുന്നത്. ബോയ്ലര് പ്ലാന്റിലേക്കുള്ള സ്റ്റീം പൈപ്പിലുണ്ടായ ചോര്ച്ചയാണ് അപകടകാരണമെന്നാണ് ഔദ്യോഗിക വിവരം.
ആണവ നിലയത്തിന്റെ സുരക്ഷ സംബന്ധിച്ചുള്ള ആശങ്ക കൂട്ടുന്നതാണ് ഇപ്പോള് നടന്ന അപകടമെന്ന് കൂടംകുളം സമരസമിതി നേതാവ് ഉദയകുമാര് പറഞ്ഞു. നിലയത്തിന്റെ നിര്മാണത്തിന് ഉപയോഗിച്ചിട്ടുള്ള സാധനങ്ങള് നിലവാരമില്ലാത്തതാണ് എന്ന ആരോപണം തങ്ങള് ഉന്നയിച്ചിരുന്നു എന്ന് ഉദയകുമാര് പറഞ്ഞു. തിരഞ്ഞെടുപ്പ് ഫലം വരുന്നതിന് തൊട്ടുമുമ്പ് നടന്ന അപകടത്തിന് പിന്നില് ആസൂത്രിത ഗൂഢാലോചനയുണ്ടോ എന്ന് സംശയിക്കുന്നതായും ഉദയകുമാര് പറഞ്ഞു.