ഇന്ന് ബ്ലെഡ് മൂണ്‍, 2026 ലെ ആദ്യ പൂർണ ചന്ദ്രഗ്രഹണം; എപ്പോൾ കാണാം? വിശദമായി അറിയാം

ഈ വർഷത്തെ ആദ്യ പൂര്‍ണ ചന്ദ്രഗ്രഹണം ഇന്ന്. ചുവന്ന നിറത്തിലുള്ള ചന്ദ്രനെ (ബ്ലഡ് മൂണ്‍) ആണ് ഇന്ന് കാണാൻ സാധിക്കുക. നഗ്നനേത്രങ്ങൾ കൊണ്ട് കാണാൻ സാധിക്കുന്നതാണ് ഈ ഗ്രഹണം. ഉച്ചയ്ക്ക് 2.14 നാണ് ഗ്രഹണം ആരംഭിക്കുന്നത്. അതുകൊണ്ടുതന്നെ ഗ്രഹണം ആരംഭം മുതല്‍ ഇന്ത്യയില്‍ കാണാന്‍ സാധിക്കില്ല. ഗ്രഹണം അവസാനിക്കാറുകുമ്പോഴായിരിക്കും ഇന്ത്യയിൽ ഈ പ്രതിഭാസം ദൃശ്യമാകുക.

സൂര്യനും ചന്ദ്രനുമിടയിൽ ഭൂമി നേർരേഖയിൽ വരുമ്പോഴാണ് സമ്പൂർണ്ണ ചന്ദ്രഗ്രഹണം സംഭവിക്കുന്നത്. ഭൂമിയുടെ നിഴലിൽ പൂർണ്ണമായി മറയുന്നതോടെ ചന്ദ്രന് കടും ചുവപ്പ് നിറം കൈവരും. ഈ തിളക്കമുള്ള ചുവപ്പ് നിറം കാരണമാണ് ഇതിനെ "രക്തചന്ദ്രൻ" (Blood Moon) എന്ന് വിളിക്കുന്നത്. സൂര്യനിൽ നിന്നുള്ള പ്രകാശരശ്മികൾ ഭൂമിയുടെ അന്തരീക്ഷത്തിലൂടെ കടന്നുപോകുമ്പോൾ, നീല കിരണങ്ങൾ ചിതറിപ്പോകുകയും ചുവപ്പ് കിരണങ്ങൾ മാത്രം വളഞ്ഞ് ചന്ദ്രനിലേക്ക് എത്തുകയും ചെയ്യുന്ന പ്രകാശ പ്രതിഭാസമാണ് ഈ ചുവപ്പ് നിറത്തിന് കാരണം.

വടക്കേ അമേരിക്ക, ഓസ്ട്രേലിയ, കിഴക്കൻ ഏഷ്യ എന്നിവിടങ്ങളിൽ ഈ സമ്പൂർണ്ണ ചന്ദ്രഗ്രഹണം വിവിധ ഘട്ടങ്ങളിലായി ദൃശ്യമാകും. ജ്യോതിശാസ്ത്ര വിവര പ്ലാറ്റ്‌ഫോമായ 'ടൈം ആൻഡ് ഡേറ്റ്' പ്രകാര, മൂന്ന് ബില്യണിലധികം ആളുകൾക്ക് ഈ പ്രതിഭാസത്തിന്റെ ഒരു ഭാഗമെങ്കിലും കാണാൻ അവസരം ലഭിക്കും.അടുത്ത ചന്ദ്രഗ്രഹണം കാണണമെങ്കിൽ 2029 വരെ കാത്തിരിക്കേണ്ടി വരും.

ഇന്ത്യൻ സമയം ഉച്ചയ്ക്ക് 4:34-ന് ആരംഭിച്ച് വൈകുന്നേരം 5:32-ന് അവസാനിക്കും. കിഴക്കൻ സമയ മേഖലയിൽ (EST) രാവിലെ 6:04 മുതൽ 7:02 വരെയാണ് പൂർണ്ണ ഗ്രഹണം (GMT 1104-നും 1202-നും ഇടയിൽ). ഇന്ത്യൻ കാലാവസ്ഥാ വകുപ്പ് (IMD) പ്രകാരം, ഗ്രഹണം ഉച്ചയ്ക്ക് 3:20-ന് ആരംഭിക്കും. പൂർണ്ണ ഗ്രഹണത്തിന്റെ ആദ്യഘട്ടം വൈകുന്നേരം 4:34-നും അവസാനഘട്ടം 5:33-നും നടക്കും. ഗ്രഹണം പൂർണ്ണമായി അവസാനിക്കുന്നത് വൈകുന്നേരം 6:48-നാണ്.

ഗ്രഹണത്തിന്റെ ആകെ ദൈർഘ്യം 5 മണിക്കൂർ 39 മിനിറ്റാണ്. ചന്ദ്രൻ ചുവപ്പ് നിറത്തിൽ ദൃശ്യമാകുന്ന പൂർണ്ണ ഗ്രഹണ ഘട്ടം ഏകദേശം 58 മിനിറ്റോളം നീണ്ടുനിൽക്കും. ഭാഗിക ഘട്ടങ്ങൾ 2 മണിക്കൂർ 29 മിനിറ്റും, പെനംബ്രൽ ഘട്ടങ്ങൾ 2 മണിക്കൂർ 12 മിനിറ്റുമായിരിക്കും. രാജ്യത്തിന്റെ മിക്ക ഭാഗങ്ങളിലും ഗ്രഹണത്തിന്റെ അവസാന ഘട്ടങ്ങൾ മാത്രമായിരിക്കും ദൃശ്യമാകുക. എന്നാൽഅസം, അരുണാചൽ പ്രദേശ്, മേഘാലയ, പശ്ചിമബംഗാൾ തുടങ്ങിയ വടക്കുകിഴക്കൻ സംസ്ഥാനങ്ങൾക്കും . ആൻഡമാൻ നിക്കോബാർ ദ്വീപുകൾക്കും പൂർണ്ണ ഗ്രഹണ ഘട്ടത്തിന്റെ അന്ത്യം തെളിഞ്ഞ കാലാവസ്ഥയാണെങ്കിൽ നേരിൽ കാണാൻ സാധിക്കും.

ഈ ആകാശവിസ്മയം കാണാൻ പ്രത്യേക ഉപകരണങ്ങളൊന്നും ആവശ്യമില്ലെന്നതും ശ്രദ്ധേയമാണ്. നഗ്നനേത്രങ്ങൾ കൊണ്ട് സുരക്ഷിതമായി ഇത് നിരീക്ഷിക്കാവുന്നതാണ്. കൂടുതൽ വ്യക്തവും മനോഹരവുമായ കാഴ്ചയ്ക്ക് ദൂരദർശിനികളോ ചെറിയ ടെലിസ്കോപ്പോ ഉപയോഗിക്കുന്നത് നല്ലതാണ്.