ബോളിവുഡ് നടി ശിഖ കഴുത്തുമുറിച്ച് ആത്മഹത്യ ചെയ്തു

മുംബൈ: ബോളിവുഡ് നടിയും പ്രമുഖ മോഡലുമായ ശിഖ ജോഷി ആത്മഹത്യ ചെയ്തു. വെസ്റ്റ് അന്ധേരിയിലെ വീട്ടില്‍ വെച്ച് ശനിയാഴ്ചയാണ് ശിഖ ആത്മഹത്യയ്ക്ക് ശ്രമിച്ചത്. കൂടെ താമസിക്കുന്ന സുഹൃത്ത് ഉടന്‍ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല.

സംഭവവുമായി ബന്ധപ്പെട്ട് പോലീസ് പറയുന്നത് ഇങ്ങനെയാണ്, വെസ്റ്റ് അന്ധേരിയിലെ ന്യൂ മദാ കോളനിയില്‍ സുഹൃത്തിനൊപ്പമായിരുന്നു ശിഖ താമസിച്ചുവന്നിരുന്നത്. ശനിയാഴ്ച വൈകിട്ട് കുളിക്കാനെന്നു പറഞ്ഞ് ബാത്‌റൂമില്‍ കയറിയ ശിഖ ഏറെനേരം കഴിഞ്ഞും തിരിച്ചു വരാത്തതിനെ തുടര്‍ന്ന് സുഹൃത്ത് വാതില്‍ തള്ളിത്തുറക്കുകയായിരുന്നു.

കഴുത്തില്‍ നിറയെ രക്തവുമായി കുളിമുറിയില്‍ ബോധരഹിതയായ ശിഖയെ ഉടന്‍ കോകില ബെന്‍ ധീരൂഭായ് അംബാനി ആശുപത്രിയിലെത്തിച്ചെങ്കിലും അധികം താമസിയാതെ ജീവന്‍ വെടിഞ്ഞു. ആശുപത്രിയിലേക്കുള്ള യാത്രാമധ്യേ ശിഖ സുഹൃത്തിനോട് സംസാരിച്ചിരുന്നതായി വെര്‍സോവ പോലീസ് ഉദ്യോഗസ്ഥന്‍ രവീന്ദ്രനാഥ് പവാര്‍ പറഞ്ഞു.

അടുത്തിടെ അവസരങ്ങള്‍ കുറഞ്ഞതിലുള്ള വിഷമം മൂലമാണ് ആത്മഹത്യയ്ക്ക് ശ്രമിച്ചതെന്നാണ് ശിഖ സുഹൃത്തിനോട് പറഞ്ഞത്. ശിഖയുടെ കഴുത്തില്‍ മൂന്നു മുറിവുകള്‍ ഉണ്ടായിരുന്നതായി പോലീസ് വ്യക്തമാക്കി. രണ്ടുതവണ ചെറുതായി മുറിക്കുകയും പിന്നീട് വലിയ മുറിവുണ്ടാക്കുകയുമായിരുന്നു. ആരെങ്കിലും ആക്രമിക്കുകയായിരുന്നെങ്കില്‍ ഒറ്റ മുറിവ് മാത്രമേ ഉണ്ടാകുമായിരുന്നുള്ളുവെന്ന് പോലീസ് പറയുന്നു. അസ്വാഭാവിക മരണത്തിന് പോലീസ് കേസ് രജിസ്റ്റര്‍ ചെയ്തിട്ടുണ്ട്.

2012ല്‍ പുറത്തിറങ്ങിയ ബോളിവുഡ് സിനിമയായ ബിഎ പാസില്‍ ശിഖ അഭിനയിച്ചിട്ടുണ്ട്. മോഡലിങ് രംഗത്തും ടെലിവിഷന്‍ സീരിയലുകളിലും ശിഖ ചെറിയ റോളുകളില്‍ രംഗത്തെത്തിയിരുന്നു. എന്നാല്‍ ജോലിയില്‍ വിചാരിച്ച രീതിയിലുള്ള ഉയര്‍ച്ച ഉണ്ടാകാത്തതിനാല്‍ ശിഖ ഏറെ അസ്വസ്ഥയായിരുന്നു. ഇതുതന്നെയാകാം മരണകാരണമെന്ന് പോലീസും സൂചന നല്‍കി.

English summary

Bollywood actress Shikha Joshi commits suicide