‘ഒരു ദിവസം അവധിയെടുത്ത് ജന്മദിനം ആസ്വദിക്കൂ സർ’; മോദിക്ക് ജന്മദിന ആശംസകളുമായി ഷാരൂഖ് ഖാൻ

Updated: Saturday, September 17, 2022, 18:43 [IST]

പ്രധാനമന്ത്രി നരേന്ദ്ര മോദിക്ക് ജന്മദിന ആശംസകൾ നേർന്ന് ബോളിവുഡ് താരം ഷാരൂഖ് ഖാൻ. നരേന്ദ്ര മോദിയുടെ ഔദ്യോഗിക ട്വിറ്റർ അക്കൗണ്ട് ടാഗ് ചെയ്താണ് ഷാരൂഖ് ഖാൻ ജന്മദിന ആശംസ നേർന്നത്. 'ഒരു ദിവസം അവധിയെടുത്ത് ജന്മദിനം ആസ്വദിക്കൂ സർ' എന്നാണ് താരം ട്വിറ്ററിൽ കുറിച്ചത്.

എല്ലാ ലക്ഷ്യങ്ങളും നേടിയെടുക്കാൻ ശക്തിയും ആരോഗ്യവും ഉണ്ടാകട്ടെ എന്നും ഷാരൂഖ് ഖാൻ തന്റെ ട്വീറ്റിൽ കുറിച്ചു. ജനങ്ങളുടെയും രാജ്യത്തിൻറെയും ക്ഷേമത്തിനായുള്ള അങ്ങേയുടെ സമർപ്പണം വലിയ വിലമതിക്കുന്നതാണെന്ന് പറഞ്ഞ താരം ജന്മദിനം ആസ്വദിക്കാൻ ഒരു ദിവസം അവധിയെടുക്കൂ എന്നും ട്വിറ്ററിലൂടെ ആവശ്യപ്പെട്ടു.

ഷാരൂഖ് ഖാൻറെ ട്വീറ്റിന്റെ പൂർണ രൂപം

'നമ്മുടെ രാജ്യത്തിൻറെയും ജനങ്ങളുടെയും ക്ഷേമത്തിനായുള്ള നിങ്ങളുടെ സമർപ്പണം വളരെ വിലമതിക്കുന്നു. നിങ്ങളുടെ എല്ലാ ലക്ഷ്യങ്ങളും നേടിയെടുക്കാൻ നിങ്ങൾക്ക് ശക്തിയും ആരോഗ്യവും ഉണ്ടാകട്ടെ. ഒരു ദിവസം അവധിയെടുത്ത് നിങ്ങളുടെ ജന്മദിനം ആസ്വദിക്കൂ സർ. ജന്മദിനാശംസകൾ നരേന്ദ്ര മോദി'

ബോളിവുഡ് താരങ്ങളായ അക്ഷയ് കുമാർ, കങ്കണ റണൗട്ട്, അമിതാഭ് ബച്ചൻ, അനുപം ഖേർ, അനിൽ കപൂർ, അജയ് ദേവഗൺ, കരൺ ജോഹർ, സിദ്ധാർത്ഥ് മൽഹോത്ര തുടങ്ങിയവരും പ്രധാനമന്ത്രിക്ക് പിറന്നാൾ ആശംസകൾ നേർന്ന് രംഗത്തുവന്നു. ചലചിത്ര മേഖലയെ കൂടാതെ രാഷ്ട്രീയ സാമൂഹിക രംഗത്തെ പ്രമുഖരും പ്രധാനമന്ത്രിക്ക ജന്മദിന ആശംസകൾ നേർന്നിരുന്നു.

അതേസമയം പ്രധാനമന്ത്രി നരേന്ദ്രമോദിയുടെ ജന്മദിനത്തോട് അനുബന്ധിച്ച് ബി.ജെ.പി. തമിഴ്നാട് ഘടകം ചെന്നൈയിലെ ആര്‍.എസ്.ആര്‍.എം.ആശുപത്രിയില്‍ ജനിക്കുന്ന കുട്ടികൾക്ക് സ്വർണ മോതിരം സമ്മാനിച്ചു. മോദിയുടെ ജന്മദിനത്തില്‍ സേവനപ്രവര്‍ത്തനങ്ങള്‍ നടത്താന്‍ ബി.ജെ.പി. കേന്ദ്രനേതൃത്വം സംസ്ഥാനഘടകങ്ങള്‍ക്ക് നിര്‍ദേശം നല്‍കിയിരുന്നു. രക്തദാനക്യാമ്പുകളും ശുചീകരണപ്രവര്‍ത്തനങ്ങളുമെല്ലാം പല സംസ്ഥാനങ്ങളിലും നടത്തുന്നുണ്ട്.