ക്രിക്കറ്റ് കളിക്കിടെ പന്തുതട്ടി ആറുവയസുകാരന് മരിച്ചു
ഹൈദരാബാദ്: കൂട്ടുകാര്ക്കൊപ്പം വീടിനടുത്ത് ക്രിക്കറ്റ് കളിച്ചുകൊണ്ടിരുന്ന ആറുവയസുകാരന് ദാരുണമായ അന്ത്യം. മുതിര്ന്ന കളിക്കൂട്ടുകാരന് അടിച്ച പന്ത് നെഞ്ചില്കൊണ്ടാണ് ബാലന് മരിച്ചത്. വ്യാഴാഴ്ച വൈകിട്ട് വനസ്ഥലിപുരത്തെ സഹാറാ എസ്റ്റേറ്റിലെ വീടിനു സമീപം ആയിരുന്നു സംഭവം. വംശി കൃഷ്ണ എന്ന കുട്ടിയാണ് മരിച്ചത്.
മുതിര്ന്ന കൂട്ടുകാര്ക്കൊപ്പം വംശി ക്രിക്കറ്റ് കളിക്കുന്നത് പതിവാണ്. സംഭവ ദിവസവും ബാറ്റ് ചെയ്യുന്നതിന്റെ അടുത്തായി വംശി ഫീല്ഡ് ചെയ്യുകയായിരുന്നു. എന്നാല് പതിനാലുകാരന് ശക്തിയോടെ അടിച്ച പന്ത് നെഞ്ചില്കൊണ്ട വംശി ഗ്രൗണ്ടില് കുഴഞ്ഞുവീണു. ഉടന് ആശുപത്രിയില് എത്തിച്ചു വിദഗ്ധ ചികിത്സ നല്കിയെങ്കില് ജീവന് രക്ഷിക്കാനായില്ല.
ബാറ്റു ചെയ്യുന്ന പതിനാലുകാരന്റെ അശ്രദ്ധയാണ് കുട്ടിയുടെ മരണത്തിന് ഇടയാക്കിയതെന്ന് ബന്ധുക്കള് ആരോപിച്ചു. പതിനാലുകാരനെതിരെ വംശിയ മാതാപിതാക്കള് പോലീസിന് പരാതി നല്കിയിട്ടുണ്ട്. പ്രാഥമിക അന്വേഷണം പോലീസ് ഒപ്പം കളിച്ചിരുന്ന കുട്ടികളില് നിന്നും മൊഴിയെടുത്തു.
അഞ്ചു ദിവസം മുന്പ് ഫീല്ഡിംഗിനിടെ പരിക്കേറ്റ പശ്ചിമ ബംഗാള് അണ്ടര് 19 ക്രിക്കറ്റ് ടീം മുന് ക്യാപ്റ്റന് അങ്കിത് കേസരി മരിച്ചിരുന്നു. സഹതാരവുമായി കൂട്ടിയിടിച്ച അങ്കിത്തിന് ഹൃദയാഘാതം സംഭവിക്കുകയായിരുന്നു. വലംകൈയ്യന് ബാറ്റ്സ്മാന് ആയിരുന്ന അങ്കിതിന്റെ മരണം ക്രിക്കറ്റ് ലോകത്തെ ഞെട്ടിച്ചിരുന്നു. അതിനിടയിലാണ് ക്രിക്കറ്റ് കളിക്കിടെ മറ്റൊരു മരണം കൂടി റിപ്പോര്ട്ട് ചെയ്യപ്പെടുന്നത്.