സഹോദരിയുടെ പഠനത്തിനായി സ്വന്തം പഠനം ഉപേക്ഷിച്ച് സഹോദരന്‍, ആ സ്‌നേഹത്തിന് ലഭിച്ച സമ്മാനം ഇങ്ങനെ

Updated: Monday, May 29, 2023, 3:12 [IST]

ദില്ലി: രാജസ്ഥാനില്‍ സഹോദരിക്കായി സ്വന്തം വിദ്യാഭ്യാസത്തിനുള്ള അവസരം ത്യജിച്ച് സഹോദരന്‍. ആ സഹോദരിയാകട്ടെ ഇന്ന് നാടിന്റെ അഭിമാനമായി മാറിയിരിക്കുകയാണ്. രാജസ്ഥാനിലെ ഒരു ചെറിയ ഗ്രാമത്തില്‍ നിന്നുള്ള ലക്ഷ്മി എന്ന വിദ്യാര്‍ത്ഥിനിയുടെ അതിഗംഭീരമായ ഒരു വിജയഗാഥയാണിത്. രാജസ്ഥാന്‍ സെക്കന്‍ഡറി എജുക്കേഷന്‍ ബോര്‍ഡ് പരീക്ഷയില്‍ ലക്ഷ്മി നേടിയിരിക്കുന്നത് വലിയ വിജയമാണ്.

പന്ത്രണ്ടാം ക്ലാസ് പരീക്ഷായിലാണ് സഹോദരന്റെ ത്യാഗത്തിന് തന്റെ പഠനം കൊണ്ട് ലക്ഷ്മി സമ്മാനം നല്‍കിയത്. ജീവിതത്തില്‍ ഒരുപാട് കഷ്ടപ്പാടുകളെ മറികടന്നാണ് ലക്ഷ്മി ഈ നേട്ടം കൈവരിച്ചത്. 96.60ര ശതമാനം മാര്‍ക്കാണ് ലക്ഷ്മി നേടിയത്. ജില്ലയില്‍ ഏറ്റവും കൂടുതല്‍ മാര്‍ക്ക് വാങ്ങിയ വിദ്യാര്‍ത്ഥിനിയാണ് ലക്ഷ്മി.

ജലോറെ ജില്ലയില്‍ നിന്നുള്ള സര്‍നാവു പഞ്ചായത്ത് സമിതിയുടെ പരിധിയിലാണ് ലക്ഷ്മിയും കുടുംബവും താമസിക്കുന്നത്. കുടുംബത്തില്‍ വലിയ ദാരിദ്ര്യമാണ്. പഠനത്തിന് പോലും സൗകര്യമൊരുക്കാന്‍ കുടുംബത്തിലുള്ളവര്‍ക്ക് സാധിക്കുന്നില്ല. ലക്ഷ്മിയുടെ പിതാവ് പത്ത് വര്‍ഷം മുമ്പേ മരിച്ച് പോയതാണ്.

അതുകൊണ്ട് കുടുംബത്തിന് കാര്യമായ വരുമാനവും ഇല്ലായിരുന്നു. ലക്ഷ്മിയുടെ അമ്മയായിരുന്നു എല്ലാ കാര്യങ്ങളും നോക്കിയിരുന്നത്. നാല് കുട്ടികളെ വളര്‍ത്തുക എന്നത് അങ്ങേയറ്റം ദുഷ്‌കരമായ കാര്യമായിരുന്നു അവർക്ക്. അങ്ങനെയുള്ള കുടുംബത്തില്‍ ലക്ഷ്മിക്ക് വിദ്യാഭ്യാസത്തിനുളള അവസരം ലഭിച്ചത് സഹോദരൻ വിശാല മനസ്സ് കാണിച്ചതോട് കൂടിയാണ്.

ലക്ഷ്മിയുടെ സഹോദരന്‍ പുരോഗമന ചിന്താഗതിക്കാരനായിരുന്നു. വിദ്യാഭ്യാസത്തിന്റെ പ്രാധാന്യം എന്താണെന്ന് സഹോദരന് നന്നായി അറിയാമായിരുന്നു. അതുകൊണ്ട് അവന്‍ ത്യാഗം ചെയ്തത് കുടുംബത്തെ മുഴുവന്‍ അമ്പരപ്പിച്ച് കളഞ്ഞു. സ്വന്തം പഠനം പാതിവഴിയില്‍ നിര്‍ത്തി, പകരം സഹോദരിയെ പഠിക്കാന്‍ അയച്ചു.

സഹോദരന്‍ മുംബൈയില്‍ ജോലിക്കും പോയി. ഇവിടെ നിന്നുള്ള പണം കൊണ്ട് സഹോദരിയുടെ പഠന കാര്യങ്ങള്‍ നോക്കുകയും ചെയ്യും. ലക്ഷ്മി പഠിച്ചതെല്ലാം ഇവിടെ തന്നെയുള്ള സര്‍ക്കാര്‍ സ്‌കൂളിലായിരുന്നു. എല്ലാ വെല്ലുവിളികളെയും അതിജീവിച്ചായിരുന്നു ബോര്‍ഡ് എക്‌സാമിനായി ലക്ഷ്മി തയ്യാറെടുത്തത്. ആ കഠിനാധ്വാവും, കുടുംബത്തിന്റെ പ്രാര്‍ത്ഥനയും ഫലം കണ്ടിരിക്കുകയാണ്. നാടിന് മൊത്തം അഭിമാനിക്കാവുന്ന ഫലമാണ് ലക്ഷ്മി സ്വന്തമാക്കിയിരിക്കുന്നത്. രാജസ്ഥാന്‍ പന്ത്രണ്ടാം ക്ലാസ് ഫലത്തില്‍ ഒന്നാം സ്ഥാനവും ലക്ഷ്മിക്കാണ്.

ഇതോടെ നിരവധി പുതിയ അവസരങ്ങളാണ് ലക്ഷ്മിയെ തേടിയെത്തുന്നത്. ഒരു വലിയ ഓഫീസറാവണമെന്നാണ് ലക്ഷ്മിയുടെ ആഗ്രഹം. പക്ഷേ കുട്ടിയുടെ കുടുംബ സാഹചര്യം അതിന് അനുവദിക്കുന്നില്ല. പഠനത്തിനുള്ള സാമ്പത്തിക സഹായം തേടി കൊണ്ടിരിക്കുകയാണ് ലക്ഷ്മി.