ബിഎസ് 3 നിരോധനം; രാജ്യത്തെ ഇരുചക്രവാഹന നിര്മ്മാതാക്കള്ക്ക് 600 കോടി രൂപയുടെ നഷ്ടം!!
ബിഎസ് 4 ശ്രേണിയിലേക്ക് മാറ്റാത്ത മോഡലുകളാണ് വന് വിലക്കിഴിവില് വില്പ്പന നടത്തിയത്.
ദില്ലി: ബിഎസ് 3 ശ്രേണിയിലുള്ള വാഹനങ്ങള്ക്ക് ഏപ്രില് മുതല് സുപ്രീംകോടതി നിരോധനം ഏര്പ്പെടുത്തിയതോടെ രാജ്യത്തെ ഇരുചക്ര വാഹന നിര്മ്മാതാക്കള്ക്ക് കോടിക്കണക്കിന് രൂപയുടെ നഷ്ടം. ഡിസ്കൗണ്ടും വന് ഓഫറുകളും നല്കി മിക്ക വാഹനങ്ങളും വിറ്റഴിച്ചെങ്കിലും ഏകദേശം 600 കോടി രൂപയുടെ നഷ്ടമുണ്ടായെന്നാണ് റിപ്പോര്ട്ട്.
ഒരു ബൈക്ക് വാങ്ങിയാല് സ്കൂട്ടര് സൗജന്യം!2 ദിവസം,ഇരുചക്രവാഹന വിപണിയില് അഞ്ചിരട്ടി വില്പ്പന
ബിഎസ് 4 ശ്രേണിയിലേക്ക് മാറ്റാത്ത മോഡലുകളാണ് വന് വിലക്കിഴിവില് വില്പ്പന നടത്തിയത്. മോട്ടോര് ബൈക്കിനൊപ്പം സ്കൂട്ടര് സൗജന്യമായി നല്കിയും, വിവിധ മോഡലുകള്ക്ക് 30000 രൂപ വരെ വിലക്കിഴിവും നല്കിയാണ് പല കമ്പനികളും ബിഎസ് 3 മോഡലുകള് വിറ്റഴിച്ചത്. ഏപ്രില് മുതല് ബിഎസ് 3 ശ്രേണിയിലുള്ള വാഹനങ്ങള് വില്ക്കാനാവില്ലെന്ന് സുപ്രീംകോടതി ഉത്തരവിട്ടതോടെയാണ് ഓഫറുകളും പ്രഖ്യാപിച്ചത്.
രാജ്യത്തെ പ്രമുഖ വാഹനനിര്മ്മാതാക്കളായ ഹീറോ, ഹോണ്ട എന്നിവര്ക്കാണ് വന് നഷ്ടമുണ്ടായത്. ബജാജ്, യമഹ, തുടങ്ങിയവര് ജനുവരിയില് തന്നെ തങ്ങളുടെ മോഡലുകള് ബിഎസ് 4 ശ്രേണിയിലേക്ക് ഉയര്ത്തിയിരുന്നു. എന്നാല് ഹീറോ, ഹോണ്ട, ടിവിഎസ് കമ്പനികളുടെ ബിഎസ് 3 ശ്രേണിയിലുള്ള മോഡലുകള് കൂടുതല് സ്റ്റോക്ക് ചെയ്ത ഡീലര്മാര്ക്കാണ് സുപ്രീംകോടതി വിധി തിരിച്ചടിയായത്.
രാജ്യത്തെ ഇരുചക്ര വാഹന നിര്മ്മാതാക്കള്ക്ക് ബിഎസ് 3 നിരോധനം തിരിച്ചടിയായെങ്കിലും, കാര് നിര്മ്മാണ കമ്പനികള്ക്ക് വലിയ നഷ്ടമുണ്ടായില്ല. സുപ്രീംകോടതി ഉത്തരവിന് മുന്പ് ബിഎസ് 3 ശ്രേണിയിലുള്ള ആകെ 16000 യൂണിറ്റ് കാറുകള് മാത്രമേ വിപണിയില് സ്റ്റോക്ക് ഉണ്ടായിരുന്നുള്ളു. ഏപ്രില് ഒന്നിന് മുന്പ് ഈ കാറുകളില് ഭൂരിഭാഗവും വലിയ നഷ്ടമില്ലാതെ വിറ്റഴിക്കാനായെന്നാണ് റിപ്പോര്ട്ട്.