ബിഎസ്പി എംപിയുടെ മകന്റെ ഭാര്യ വെടിയേറ്റു മരിച്ച നിലയില്
ഗാസിയാബാദ്: ബിഎസ്പി നേതാവും രാജ്യസഭാ എംപിയുമായ നരേന്ദ്ര കശ്യപിന്റെ മകന്റെ ഭാര്യ വീട്ടില് വെടിയേറ്റു മരിച്ച നിലയില്. നരേന്ദ്ര കശ്യപിന്റെ മൂത്തമകന് സാഗറിന്റെ ഭാര്യ ഹിമാനി കശ്യപിനെ (26) ഗാസിയാബാദിലെ കവി നഗറിലുള്ള സഞ്ജയ് നഗറിലെ വീട്ടിലെ കുളിമുറിയിലാണ് കണ്ടെത്തിയത്. വീട്ടുകാര് ആശുപത്രിയില് എത്തിച്ചെങ്കിലും രക്ഷിക്കാനായില്ല.
സാഗറിന്റെ പേരില് ലൈന്സന്സുള്ള തോക്ക് മൃതദേഹത്തിനു സമീപത്തുനിന്നു കണ്ടെടുത്തിട്ടുണ്ട്. ആരാണ് വെടിവെച്ചതെന്ന് വ്യക്തമല്ല. വെടിയൊച്ച കേട്ടയുടന് തന്നെ കുളിമുറിയില് എത്തിയപ്പോള് ഹിമാനി രക്തത്തില് കുളിച്ചു നില്ക്കുന്നതാണ് കണ്ടതെന്ന് വീട്ടുകാര് പോലീസിന് മൊഴി നല്കി. സംഭവം അന്വേഷിച്ചുവരികയാണ്.
സാഗറുമായി രണ്ടു വര്ഷം മുന്പാണ് ഹിമാനി വിവാഹിതയായത്. ഒരു വയസ്സായ മകനുണ്ട്. ആത്മഹത്യയാണോ എന്ന കാര്യത്തില് വ്യക്തതയില്ല. ആത്മഹത്യാക്കുറിപ്പൊന്നും കണ്ടെത്തിയിട്ടില്ല. ഹിമാനിയുടെ മരണം കൊലപാതകമാണെന്നാണ് പിതാവും ബിഎസ്പി മുന്മന്ത്രിയുമായ ഹിരാലാല് കശ്യപ് ആരോപിക്കുന്നത്.
സ്ത്രീധനം ആവശ്യപ്പെട്ട് മകളെ ഭര്തൃവീട്ടുകാര് പീഡിപ്പിക്കാറുണ്ടെന്നും അദ്ദേഹം പറഞ്ഞു. വീട്ടിലേക്ക് തിരികെ വരാനിരിക്കെയായിരുന്നു മരണം. ഭര്തൃവീട്ടുകാര്ക്കെതിരെ കേസ് കൊടുക്കുമെന്നും ഹിരാലാല് അറിയിച്ചു. ആത്മഹത്യയാണോ കൊലപാതകമാണോ എന്ന് ഇപ്പോള് പറയാനാകില്ലെന്നും അന്വേഷണം നടന്നുകൊണ്ടിരിക്കുകയാണെന്നും എസ്പി സല്മാന് താജ് പാട്ടീല് വ്യക്തമാക്കി.