കേന്ദ്ര ബജറ്റ്: ചെറുകിട വ്യവസായങ്ങളും ഖാദിയും ശക്തിപ്പെടുത്തും, 10,000 കോടിയുടെ കൈത്താങ്ങ്

രാജ്യത്തെ സൂക്ഷ്മ, ചെറുകിട, ഇടത്തരം വ്യവസായ മേഖലയ്ക്കും പരമ്പരാഗത കരകൗശല മേഖലയ്ക്കും പുതിയ ഉത്തേജനം നൽകുന്ന പ്രഖ്യാപനങ്ങളുമായി ധനമന്ത്രി നിർമ്മല സീതാരാമൻ. ചെറുകിട മേഖലയ്ക്ക് പുതിയ ഫണ്ടുകൾ, ക്ലസ്റ്റർ പുനരുജ്ജീവന പദ്ധതികൾ, മെച്ചപ്പെട്ട വായ്പാ മാർഗ്ഗങ്ങൾ എന്നിവ ധനമന്ത്രി ബജറ്റിൽ പ്രഖ്യാപിച്ചു. ചെറുകിട വ്യവസായങ്ങൾക്ക് മൂലധനം, വിപണികൾ, വരുമാനം എന്നിവ മെച്ചപ്പെടുത്തുകയാണ് ബജറ്റ് പ്രഖ്യാപനത്തിന്റെ ലക്ഷ്യം.

കടബാധ്യതയും പഴയ സാങ്കേതികവിദ്യയും കാരണം തകർച്ച നേരിടുന്ന 200 പരമ്പരാഗത വ്യവസായ ക്ലസ്റ്ററുകൾ സർക്കാർ പുനരുജ്ജീവിപ്പിക്കും. കൂടുതൽ തൊഴിലവസരങ്ങൾ സൃഷ്ടിക്കാനും നിർമ്മാണ മേഖലകൾക്ക് ജീവൻ നൽകാനുമാണ് ഈ നീക്കം ലക്ഷ്യമിടുന്നത്.

ഉയർന്ന വളർച്ചാ സാധ്യതയുള്ള ചെറുകിട സ്ഥാപനങ്ങൾക്ക് 10000 കോടി രൂപയുടെ എസ്എംഇ ഗ്രോത്ത് ഫണ്ട് അവതരിപ്പിക്കുമെന്ന് ധനമന്ത്രി പ്രഖ്യാപിച്ചു. ഉൽപ്പാദനക്ഷമത, കയറ്റുമതി സാധ്യത എന്നിവയാണ് ഇതിനുള്ള പ്രധാന മാനദണ്ഡങ്ങൾ. കൂടാതെ ചെറുകിട സംരംഭങ്ങളെ പിന്തുണയ്ക്കാൻ സെൽഫ് റിലയന്റ് ഇന്ത്യ ഫണ്ടിന് 2000 കോടി രൂപയുടെ അധിക ധനസഹായം ലഭിക്കുമെന്നും ബജറ്റിൽ പ്രഖ്യാപനമുണ്ട്. വായ്പാ ഗ്യാരണ്ടി ഉണ്ടായിട്ടും മൂലധനക്ഷാമം നേരിടുന്നവർക്ക് ഇത് ഒരു കൈത്താങ്ങാകുമെന്നാണ് പ്രതീക്ഷിക്കുന്നത്.

ഖാദി, കൈത്തറി, കരകൗശല വസ്തുക്കൾ ശക്തിപ്പെടുത്തുന്നതിനായി 'മഹാത്മാഗാന്ധി ഗ്രാമസ്വരാജ്' പദ്ധതിയും ബജറ്റിൽ പ്രഖ്യാപിച്ചു. മാത്രമല്ല ടെക്സ്റ്റൈൽ രംഗത്തെ വളർച്ച വേഗത്തിലാക്കാൻ 'ചലഞ്ച് മോഡ്' വഴി മെഗാ ടെക്സ്റ്റൈൽ പാർക്കുകളും നിർമല സീതാരാമൻ പ്രഖ്യാപിച്ചു. ഈ നീക്കങ്ങൾ പരമ്പരാഗത വ്യവസായങ്ങൾക്ക് ഉത്തേജനം നൽകുമെന്ന് പ്രതീക്ഷിക്കുന്നുവെന്ന് ധനമന്ത്രി ബജറ്റ് പ്രസംഗത്തിൽ പറഞ്ഞു.