'ഹണി ട്രാപ്പിൽ കുടുക്കി, ജാതീയമായി അധിക്ഷേപിച്ചു'; ഇൻഫോസിസ് സഹസ്ഥാപകൻ ക്രിസ് ​ഗോപാലകൃഷ്ണനെതിരെ കേസ്

ബെം​ഗളൂരു: ഇൻഫോസിസ് സഹസ്ഥാപകൻ ക്രിസ് ​ഗോപാലകൃഷ്ണനെതിരെ കേസെടുത്ത് പോലീസ്. ബെം​ഗളൂരു പോലീസാണ് കേസെടുത്തിരിക്കുന്നത്. എസ് സി / എസ് ടി അതിക്രമം തടയൽ നിയമപ്രകാരമാണ് കേസെടുത്തിരിക്കുന്നത്. ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ് മുൻ ഡയറകട്ർ ബലറാം അടക്കം 16 പേർ കൂടി കേസിൽ പ്രതികളാണ്. സിറ്റി സിവിൽ ആൻഡ് സെഷൻസ് കോടതിയുടെ നിർദ്ദേശ പ്രകാരമാണ് ബെം​ഗളൂരു സദാശിവ ന​ഗർ പോലീസ് കേസ് രജിസ്റ്റർ ചെയ്തിരിക്കുന്നത്.

ഐ ഐ എസ് സിയിൽ സെന്റർ ഫോർ സസ്‌റ്റൈനബിൾ ടെക്നോളജിയിൽ ഫാക്കൽറ്റി അം​ഗമായിരുന്ന ആദിവാസി ബോവി വിഭാ​ഗത്തിൽ പെട്ട ദുർ​ഗപ്പയാണ് പരാതിക്കാരൻ. 2014 ൽ തന്നെ വ്യാജമായി ഹണി ട്രാപ്പ് കേസിൽ കുടുക്കിയെന്നും തുടർന്ന് സർവീസിൽ നിന്ന് പിരിച്ചുവിട്ടെന്നും പരാതിയിൽ പറയുന്നു. താൻ ജാതീയമായ അധിക്ഷേപത്തിനും ഭീഷണിക്കും വിധേയനായെന്നും പരാതിയിൽ ആരോപിക്കുന്നു.

ക്രിസ് ​ഗോപാലകൃഷ്ണനും ബലറാമിനും പുറമെ ​ഗോവിന്ദൻ രം​ഗരാജൻ, ശ്രീധർ വാര്യർ, സന്ധ്യാ വിശ്വേശ്വരൈ, ഹരി കെ വി എസ്, ദാസപ്പ, പി ബലറാം, ഹേമലതാ മിഷി, കെ ചാട്ടോപാദ്യായ, പ്രദീപ് ഡി സാവ്കർ, മനോ​ഹരൻ എന്നിവർ കേസിലെ പ്രതികളാണ്. ഐ ഐ എസ് സി ബോർജ് ട്രസ്റ്റിൽ അം​ഗം കൂടിയാണ് ഇൻഫോസിസ് സഹ സ്ഥാപകനായ ക്രിസ് ​ഗോപാലകൃഷ്ണൻ. സംഭവത്തിൽ ഐ ഐ എസ് സിയോ ക്രിസ് ​ഗോപാലകൃഷ്ണനോ ഇതുവരെ പ്രതികരിച്ചിട്ടില്ല.