ഝാര്ഖണ്ഡില് രണ്ട് കന്നുകാലി വ്യാപാരികളെ തൂങ്ങി മരിച്ച നിലയില് കണ്ടെത്തി
ലത്തെഹാര്: ഝാര്ഖണ്ഡിലെ ലത്തെഹാര് ജില്ലയില് രണ്ട് കാലി വ്യാപാരികളെ മരത്തില് തൂങ്ങി മരിച്ച നിലയില് കണ്ടെത്തി. റാഞ്ചിയിലെ ലെത്തിഹാര് ജില്ലയിലെ ജാബര് ഗ്രാമത്തിലെ മുഹമ്മദ് മജിലോം, ആസാദ്ഖാന് എന്നിവരെയാണ് ക്രൂരമായി മര്ദ്ദിച്ച ശേഷം കൊന്നു കെട്ടി തൂക്കിയത്.
എട്ട് കന്നുകാലികളെയും കൊണ്ട് വെള്ളിയാഴ്ച കച്ചവടത്തിനു പോയതായിരുന്നു രണ്ടു പേരും. കൊലപാതകത്തിനു പിന്നില് ഹിന്ദു സംഗടനകളാണെന്നാണ് നാട്ടുകാര് പറയുന്നത്. കൊല്ലപെട്ട രണ്ടുപേരും കൊടിയ മര്ദ്ദനത്തിന് ഇരയായിട്ടുണ്ടെന്ന് പോലീസ് സൂപ്രണ്ട്അനൂപ് ബര്ത്തേര് പറഞ്ഞു.
മോഷണമോ വ്യക്തിപരമായ ശത്രുക്കളോ ആകാം എന്നും പോലീസ് അനുമാനിക്കുന്നുണ്ട്. തലസ്ഥാനമായ റാഞ്ചിയില് നിന്നും 100 കിലോമീറ്റര് അകലെയുള്ള ജില്ലയാണിത്. സംഭവത്തില് എഫ്ഐആര് രേഖപ്പെടുത്തിയിട്ടുണ്ട്. സംഭവത്തില് ഒരാളെ സംശയമുണ്ടെന്ന് പോലീസ് പറഞ്ഞു.
കഴിഞ്ഞ സെപ്തംബര്മാസം ഉത്തര്പ്രദേശിലെ ദാദ്രിയില് മധ്യവയസ്കനായ മുഹമ്മദ് അഖാലാക്കിനെ വീട്ടില് പശുവിറച്ചി സൂക്ഷിച്ചു എന്ന കാരണത്താല് ഒരു സംഘം ആളുകള് അക്രമിച്ചു കൊലപ്പെടുത്തിയിരുന്നു. ഈ സംഭവത്തിനു പിന്നില് ഹിന്ദു സംഘടനകള് ആയിരുന്നു. സംഭവത്തെ തുടര്ന്ന് പ്രദേശത്ത് സംഘര്ഷമുണ്ടായി. ജനങ്ങള് ദേശീയ പാത ഉപരോധിക്കുകയും പ്രതികളെ ഉടന് അറസ്റ്റ് ചെയ്യണമെന്ന് ആവശ്യപ്പെടുകയും ചെയ്തു.