ജിയാ ഖാന്റെത് ആത്മഹത്യ തന്നെയാണെന്ന് സിബിഐ റിപ്പോര്‍ട്ട്

മുംബൈ: ബോളിവുഡ് നടി ജിയാ ഖാന്റെ മരണം ആത്മഹത്യ തന്നെയെന്ന് സ്ഥിരീകരിച്ച് സി.ബി.ഐ. ജിയാഖാന്റെ മരണം സംബന്ധിച്ച് അന്വേഷിച്ച സിബിഐ കഴിഞ്ഞദിവസം സെഷന്‍സ് കോടതിയില്‍ കുറ്റപത്രം സമര്‍പ്പിച്ചിരുന്നു. ഈ റിപ്പോര്‍ട്ടിലാണ് ജിയാഖാന്റെ മരണം ആത്മഹത്യയാണെന്ന് ഫോറന്‍സിക് റിപ്പോര്‍ട്ട് ചൂണ്ടുക്കാട്ടി സിബിഐ വ്യക്തത വരുത്തുന്നത്.

അതേസമയം, ജിയയുടെ കാമുകന്‍ സൂരജ് പഞ്ചോളിക്കെതിരെ ആത്മഹത്യാ പ്രേരണയ്ക്ക് കുറ്റം ചുമത്തിയിട്ടുണ്ട്. സൂരജുമായുള്ള പ്രശ്‌നങ്ങളാണ് ജിയയുടെ ആത്മഹത്യയിലേക്ക് നയിച്ചതെന്ന് സിബിഐ കണ്ടെത്തി. ജിയയുടെതെന്ന് കരുതുന്ന ആത്മഹത്യാ കുറിപ്പ് നേരത്തെ കണ്ടെത്തിരുന്നു. അതേസമയം, ജിയയുടേത് ആത്മഹത്യയാണെന്ന് വ്യക്തമായതോടെ ആദിത്യയ്‌ക്കെതിരെ കൊലക്കുറ്റം ചുമത്തുന്നത് ഒഴിവാകും.

അമേരിക്കന്‍ പൗരത്വമുള്ള ജിയാ ഖാന്‍ 2013 ജൂണ്‍ മൂന്നിനാണ് അപ്പാര്‍ട്ട്‌മെന്‍രിലെ ഫാനില്‍ തൂങ്ങിമരിച്ച നിലയില്‍ കണ്ടെത്തിയത്. പ്രാഥമിക അന്വേഷണത്തില്‍ ആത്മഹത്യയാണെന്ന് പോലീസ് കണ്ടെത്തിയെങ്കിലും മകള്‍ കൊല്ലപ്പെട്ടതാണെന്ന് ആരോപിച്ച് ജിയാഖാന്റെ അമ്മ റാബിയ ബോംബെ ഹൈക്കോടതിയെ സമീപിക്കുകയായിരുന്നു. ഇതേ തുടര്‍ന്നാണ് കേസില്‍ സി.ബി.ഐ അന്വേഷണം തുടങ്ങിയത്.

ജിയയും സൂരജും തമ്മില്‍ ഏറെനാളായി പ്രണയത്തിലായിരുന്നു. എന്നാല്‍ മരണത്തിന് തൊട്ടുമുന്‍പ് സൂരജ് ജിയയെ ഉപേക്ഷിക്കുകയാണെന്ന് സൂചിപ്പിച്ചതോടെ ജിയ വിഷാദരോഗത്തിലേക്ക് വീഴുകയും പിന്നീട് ആത്മഹത്യയില്‍ അഭയം തേടുകയുമായിരുന്നു. മരണദിവസം സൂരജ് ജിയയെ സന്ദര്‍ശിച്ചതായും റിപ്പോര്‍ട്ടുകളുണ്ടായിരുന്നു.

English summary

CBI Concludes Actor Jiah Khan Committed Suicide