ജിയാ ഖാന്റെ മരണം; സിബിഐ കുറ്റപത്രം സമര്പ്പിച്ചു
മുംബൈ: നടി ജിയാ ഖാന് ആത്മഹത്യ ചെയ്തതുമായി ബന്ധപ്പെട്ട് സിബിഐ നടത്തിയ അന്വേഷണത്തിന്റെ കുറ്റപത്രം കോടതിയില് സമര്പ്പിച്ചു. ബോളിവുഡ് നടന് സൂരജ് പഞ്ചോളിയെ പ്രതിയാക്കിയാണ് കുറ്റപത്രം സമര്പ്പിച്ചിരിക്കുന്നത് എന്നാണ് റിപ്പോര്ട്ട്. നടന് ആദിത്യ പഞ്ചോളിയുടെയും സറീന വഹാബിന്റെയും മകനാണ് സൂരജ്.
ജിയാ ഖാനും സൂരജും പ്രണയത്തിലായിരുന്നെന്നും സൂരജിന്റെ പ്രണയ വഞ്ചനയെ തുടര്ന്നാണ് ജിയാ ഖാന് ആത്മഹത്യ ചെയ്തതെന്നുമായിരുന്നു നേരത്തെ പുറത്തുവന്നിരുന്ന റിപ്പോര്ട്ട്. എന്നാല്, മകളുടെത് കൊലപാതകമാണെന്നുകാട്ടി അമ്മ റാബിയ നല്കിയ ഹര്ജി പരിഗണിച്ചാണ് ഹൈക്കോടതി സിബിഐ അന്വേഷണത്തിന് നിര്ദ്ദേശിച്ചത്. കേസില് സിബിഐ പുതുതായി എന്തെങ്കിലും കണ്ടെത്തിയോ എന്ന് വ്യക്തമല്ല.
2013 ജൂണ് മൂന്നിനായിരുന്നു ജുഹുവിലെ അപ്പാര്ട്ട്മെന്റില് ജിയയെ ആത്മഹത്യ ചെയ്ത നിലയില് കണ്ടെത്തിയത്. അമേരിക്കന് പൗരത്വമുള ജിയ ബോളിവുഡ് സിനിമകളില് അഭിനയിച്ചുവരികയായിരുന്നു. പ്രണയനഷ്ടത്തിനുശേഷം കടുത്ത നിരാശയിലായിരുന്നതാണ് ജിയയുടെ മരണത്തിന് കാരണമായി പറയുന്നത്. ജിയയുടെ ആത്മഹത്യാ കുറിപ്പിലും അതേക്കുറിച്ചുള്ള സൂചനയുണ്ട്.
ആത്മഹത്യാ കുറിപ്പ് കണ്ടെടുത്തതിന് പിന്നാലെ സൂരജിനെ പോലീസ് അറസ്റ്റ് ചെയ്യുകയും ചെയ്തിരുന്നു. ആത്മഹത്യാ പ്രേരണകുറ്റം ചുമത്തിയായിരുന്നു അറസ്റ്റ്. അടുത്തിടെ ബോളിവുഡ് സിനിമയില് നായകനായി അരങ്ങേറിയ സൂരജിനെ സംബന്ധിച്ചിടത്തോളം സിബിഐ കുറ്റപത്രം നിര്ണായകമാണ്. കേസ് സൂരജിന്റെ കരിയറിനെ തന്നെ ബാധിച്ചേക്കുമെന്നും റിപ്പോര്ട്ടുകളുണ്ട്.