സെറോ ടൈപ്പ്- 2 ഡെങ്കി വൈറസ് അപകടകാരി: കേരളമടക്കം 11 സംസ്ഥാനങ്ങൾക്ക് കേന്ദ്ര മുന്നറിയിപ്പ്, യുപിയിൽ രോഗവ്യാപനം

Updated: Sunday, September 19, 2021, 20:57 [IST]

ദില്ലി: കൊവിഡ് വ്യാപനത്തിനിടെ അത്യന്തം മാരകമായ സെറോ ടൈപ്പ്- 2 ഡെങ്കി വൈറസിനെതിരെ മുന്നറിയിപ്പുമായി കേന്ദ്രസർക്കാർ. കേരളം അടക്കം 11 സംസ്ഥാനങ്ങൾക്കാണ് കേന്ദ്രം മുന്നറിയിപ്പ് നൽകിയിട്ടുള്ളത്. കേരളത്തിന് പുറമേ ആന്ധ്രാപ്രദേശ്, ഗുജറാത്ത്, കർണ്ണാടക, മധ്യപ്രദേശ്, ഉത്തർപ്രദേശ്, മഹാരാഷ്ട്ര, ഒഡിഷ, രാജസ്ഥാൻ, തമിഴ്നാട്, തെലങ്കാന എന്നീ സംസ്ഥാനങ്ങളിലാണ് നിലവിൽ സെറോ ടൈപ്പ്-2 ഡെങ്കി റിപ്പോർട്ട് ചെയ്തിട്ടുള്ളത്. ഈ സാഹചര്യത്തിലാണ് കേന്ദ്രസർക്കാർ മുന്നറിയിപ്പ് നൽകിയിട്ടുള്ളത്. കേരളം അടക്കം വിവിധ സംസ്ഥാനങ്ങളുമായി കേന്ദ്രസർക്കാർ അവലോകന നടത്തിയിരുന്നു. യോഗത്തിലാണ് കേന്ദ്ര ആരോഗ്യ സെക്രട്ടറി 11 സംസ്ഥാനങ്ങൾക്ക് മുന്നറിയിപ്പ് നൽകിയിട്ടുള്ളത്. നേരത്തെ, ആരോഗ്യ മന്ത്രാലയം ഈ സംസ്ഥാനങ്ങൾക്ക് ആഗസ്റ്റിലും സെപ്റ്റംബർ 10 നും ജാഗ്രതാ നിർദേശം നൽകിയിരുന്നു.

കേസുകൾ നേരത്തേ കണ്ടെത്തുന്നതിനും പനി ഹെൽപ്പ് ലൈനുകൾ ആരംഭിക്കുന്നതിനും ആവശ്യമായ ടെസ്റ്റിംഗ് കിറ്റുകൾ, ലാർവിസൈഡുകൾ, ഡെങ്കി ചികിത്സയ്ക്കാവശ്യമായ മരുന്നുകൾ എന്നിവ സംഭരിക്കുന്നതിനും നടപടികൾ കൈക്കൊള്ളാൻ കേന്ദ്രം സംസ്ഥാനങ്ങളോട് ഈ സാഹചര്യത്തിൽ ആവശ്യപ്പെട്ടിട്ടുണ്ട്. അതേ സമയം ഉത്സവകാലത്തിന് മുന്നോടിയായി ജനക്കൂട്ടം ഒഴിവാക്കുന്നത് സംബന്ധിച്ച നിർദേശങ്ങൾ നൽകാനും കേന്ദ്രം അവലോകന യോഗത്തിൽ നിർദേശം നൽകിയിട്ടുണ്ട്. ആഘോഷങ്ങളിൽ ആളുകൾ കൂടിച്ചേരുന്ന സാഹചര്യങ്ങൾ ഒഴിവാക്കണമെന്നും മാളുകൾ, മാർക്കറ്റുകൾ, ആരാധനാലയങ്ങൾ എന്നിവിടങ്ങളിൽ പാലിക്കേണ്ട നിർദേശങ്ങൾ കൃത്യമായി പാലിക്കേണ്ടതുണ്ടെന്നും കേന്ദ്രം ആവശ്യപ്പെട്ടിട്ടുണ്ട്. മറ്റ് രോഗങ്ങളെക്കാൾ അപകടകാരികളായ വൈറസാണ് സെറോ ടൈപ്പ് 2 ഡെങ്കി. ഗുരുതരമായ ഈ പ്രശ്നം എളുപ്പത്തിൽ മറികടക്കാൻ സംസ്ഥാനങ്ങൾ മുന്നൊരുക്കങ്ങൾ നടത്തണമെന്നാണ് പ്രധാന നിർദേശങ്ങളിലൊന്ന്.

ഗ്ലാമറസ് വിട്ട് ഒരു കളിയുമില്ല; ട്രെന്‍ഡിംഗായി പാര്‍വ്വതി നായരുടെ ഫോട്ടോഷൂട്ട്

അടുത്തിടെ ഉത്തർപ്രദേശിൽ ഡെങ്കിപ്പനി ബാധിച്ച് കുട്ടികൾ അടക്കം നൂറിലധികം പേർ മരണമടഞ്ഞിരുന്നു. ഫിറോസാബാദ് ജില്ലയിലായിരുന്നു കൂടുതൽ കേസുകൾ റിപ്പോർട്ട് ചെയ്തത്. 12000 പേർ പനി ബാധിച്ച് നിലവിൽ ചികിത്സയിൽ കഴിഞ്ഞ് വരുന്നുമുണ്ട്. ഇതിൽത്തന്നെ പലരുടെയും നില ഗുരുതരമാണ് എന്നതാണ് ആശങ്കാകരമായ വസ്തുത. സംസ്ഥാനത്ത് 64 ക്യാമ്പുകൾ ഡെങ്കി കേസുകളിൽ വർധനവുണ്ടായതോടെ ആരംഭിച്ചിട്ടുണ്ട്. മലേറിയ, ചെള്ളുപനി, എലിപ്പനി എന്നീ പകർച്ചാ വ്യാധികളും ഇതിന് പുറമേ സംസ്ഥാനത്ത് റിപ്പോർട്ട് ചെയ്തിട്ടുണ്ട്.