കൊവിഡ് വ്യാപനം രൂക്ഷം കേന്ദ്രസംഘം കേരളത്തിലേക്ക്: ആന്ധ്രയും മണിപ്പൂരുമടക്കം ആറ് സംസ്ഥാനങ്ങളിൽ സന്ദർശനം

ദില്ലി: ഇന്ത്യയിൽ കൊവിഡ് വ്യാപനം രൂക്ഷമാകുന്ന സാഹചര്യത്തിൽ സംസ്ഥാനങ്ങൾ സന്ദർശിക്കാൻ കേന്ദ്രസംഘം. കേരളം ഉൾപ്പെടെ കൊവിഡ് കേസുകൾ കൂടുതൽ റിപ്പോർട്ട് ചെയ്യുന്ന ആറ് സംസ്ഥാനങ്ങളാണ് ഇതോടെ കേന്ദ്ര സംഘം സന്ദർശിക്കുക. കേരളത്തിന് പുറമേ ആന്ധ്രപ്രദേശ്, അരുണാചൽ പ്രദേശ്, മണിപ്പൂർ, ത്രിപുര, ഒഡിഷ, ഛത്തീസ്ഗഡ് എന്നീ സംസ്ഥാനങ്ങളും കേന്ദ്രസംഘം സന്ദർശിക്കും. ഈ സംസ്ഥാനങ്ങളിലെ രോഗനിയന്ത്രണം, രോഗവ്യാപനത്തിന്റെ തോത് എന്നിവ പരിശോധിക്കുകയാണ് ലക്ഷ്യം.

രോഗവ്യാപനം കൂടുതലുള്ള സംസ്ഥാനങ്ങൾ നേരിടുന്ന പ്രശ്നങ്ങളും വെല്ലുവിളികളും മനസ്സിലാക്കി കൊവിഡ് പ്രതിരോധത്തിൽ അതാത് സംസ്ഥാനങ്ങളെ ശക്തിപ്പെടുത്താനാണ് പ്രധാനമായും ലക്ഷ്യമിടുന്നത്. ആരോഗ്യമന്ത്രാലയം വെള്ളിയാഴ്ചയാണ് ഇക്കാര്യം പ്രഖ്യാപിച്ചത്. ഉന്നതതല സംഘത്തിൽ പൊതു ആരോഗ്യ വിദഗ്ധനും ക്ലിനിഷ്യനും ഉൾപ്പെട്ട രണ്ടംഘ സംഘമാണ് സന്ദർശനത്തിനായെത്തുക.

ഉടനടി ആറ് സംസ്ഥാനങ്ങളും സന്ദർശിക്കുന്ന സംഘം ഓരോ സംസ്ഥാനങ്ങളും കൊവിഡ് കൈകാര്യം ചെയ്യുന്ന രീതി പരിശോധിക്കും. പ്രധാനമായും കൊവിഡ് പരിശോധനയിലാണ് ശ്രദ്ധയൂന്നുക. കൂടാതെ രോഗവ്യാപനം തടയുന്നതിനുള്ള പ്രവർത്തനങ്ങൾ, നിരീക്ഷണം, ആശുപത്രി കിടക്കകളുടെ ലഭ്യത, ആംബുലൻസ്, വെന്റിലേറ്റർ, മെഡിക്കൽ ഓക്സിജൻ എന്നിവയുടെ ലഭ്യതയും ഇതോടൊപ്പം വിലയിരുത്തും. കൊവിഡ് വാക്സിനേഷൻ നടപടികളും കേന്ദ്ര സംഘം പരിശോധിച്ച് വിലയിരുത്തും. എല്ലാ സാഹചര്യങ്ങളും നിരീക്ഷിച്ച ശേഷം ആവശ്യമായ പരിഹാരമാർഗ്ഗങ്ങളും നിർദേശിക്കുമെന്നും ആരോഗ്യമന്ത്രാലയം വ്യക്തമാക്കിയിട്ടുണ്ട്.

അഡീഷണൽ ഡിഡിജി& ഡയറക്ടർ ഈഎം ഡോ. എൽ സ്വാതിചരണിന്റെ , , നേതൃത്വത്തിലുള്ള സംഘമാണ് മണിപ്പൂരിലേക്കുള്ള സംഘത്തിലുള്ളത്. എഐഐഎച്ച്& പിച്ചിലെ പ്രൊഫസർ ഡോ. സഞ്ജയ് സാധു ഖാന്റെ നേതൃത്വത്തിലുള്ള സംഘം അരുണാചൽ പ്രദേശിലേക്കും എഐഐഎച്ച്& പിച്ചിലെ ഡയറക്ടറും പ്രൊഫസറുമായ ആർ എൻ സിൻഹയുടെ നേതൃത്വത്തിലുള്ള സംഘം ത്രിപുരയിലേക്കും എത്തും. കേരളത്തിലേക്ക് പബ്ലിക്ക് ഹെൽത്ത് സ്പെഷ്യലിസ്റ്റ് ഗ്രേഡ് II ഡോ. രുചി ജയിന്റെ നേതൃത്വത്തിലുള്ള സംഘമാണ് എത്തുക. ഒഡിഷയിലേക്ക് പബ്ലിക് ഹെൽത്ത് സ്പെഷ്യലിസ്റ്റ് എഐഐഎച്ച്& പിച്ചിലെ പ്രൊഫസർ ഡോ. എ ഡാന്റെ കീഴിലുള്ള സംഘമാണ് സന്ദർശിക്കാനെത്തുന്നത്. പബ്ലിക്ക് ഹെൽത്ത് സ്പെഷ്യലിസ്റ്റ് ഡോ. ദിബാക്കർ സാഹുവിന് കീഴിലുള്ള സഘം ഛത്തീസ്ഗഡിലേക്കും സന്ദർശനത്തിനായെത്തും.

English summary

Central Teams Rushed To 6 States Reporting Increased COVID Cases