പിറകിലേക്ക് തിരിയുന്ന സമയം കൃത്യമായി കാണിക്കുന്ന ക്ലോക്കുമായി യുവാവ്
ഛണ്ഡീഗഡ്: ഹരിയാണയിലെ ഗ്രാമവാസിയായ ഒരു യുവാവ് അത്ഭുതകരമായ ഒരു ക്ലോക്കിന്റെ കണ്ടുപിടുത്തം നടത്തിയിരിക്കുകയാണ്. സാധാരണ രീതിയില് മുന്നോട്ടു തിരിയുന്ന ക്ലോക്കുകള് വിപണിയില് സുലഭമാണെങ്കിലും ബല്വിന്ദര് സിങ് രൂപകല്പന ചെയ്ത ക്ലോക്ക് തിരിയുന്നത് പിറകിലോട്ടാണ്. എന്നാല്, സമയമാകട്ടെ കൃത്യവും.
ബല്വിന്ദറിന്റെ ക്ലോക്ക് കൃത്യസമയം കാണിക്കുന്നതിനൊപ്പം പിറകിലേക്ക് തിരിയുകകൂടി ചെയ്യുന്നത് കാഴ്ചക്കാരെ അത്ഭുതപ്പെടുത്തിയിരിക്കുകയാണ്. ആറു മാസത്തെ തന്റെ പ്രയത്നത്തിന്റെ ഫലമാണിതെന്ന് ബല്വിന്ദര് പറയുന്നു. ഒരു ബന്ധുവിന്റെ വെല്ലുവിളിയാണ് ക്ലോക്കിന്റെ കണ്ടുപിടുത്തത്തിലേക്ക് നയിച്ചതെന്നും അദ്ദേഹം പറഞ്ഞു.
ബട്ടര്ല ഗ്രാമത്തിലെ സെക്ടര് 41ാണ് ബല്വിന്ദറിന്റെ താമസം. പഴയ ഒരു ക്ലോക്കിന്റെ മെക്കാനിസം ഉപയോഗിച്ചാണ് പിറകിലേക്ക് തിരിയുന്ന ക്ലോക്ക് നിര്മിച്ചിരിക്കുന്നത്. പിറകിലേക്ക് തിരിയുന്ന ക്ലോക്ക് നിര്മിക്കുക അത്ര പ്രയാസകരമുള്ള കാര്യമല്ല. എന്നാല് സാധാരണ രീതിയില് തിരിയുന്ന ക്ലോക്കുമായി സമയം കൃത്യമാക്കുക എന്നത് അത്യധ്വാനത്തിലൂടെ മാത്രമേ സാധിക്കൂ എന്ന് ബല്വിന്ദര് പറഞ്ഞു.
ചെറിയ മെക്കാനിക് ജോലികള്കൊണ്ട് നേരത്തെയും ബല്വിന്ദര് ശ്രദ്ധേയനായിരുന്നു. ഏറ്റവും ചെറിയ പെഡല്സ്റ്റല് ഫാന് ആണ് ഇതില് ശ്രദ്ധയാകര്ഷിച്ചത്. കേവലം 0.8 ഇഞ്ച് ആണ് ബല്വിന്ദറിന്റെ ക്ലോക്കിന്റെ ഉയരം. ചില കണ്ടുപിടുത്തങ്ങള് കൂടി പുരോഗമിക്കുകയാണെന്നും അടുത്തതന്നെ അവ പുറത്തുവിടുമെന്നും യുവാവ് പറഞ്ഞു.