ചന്ദ്രയാൻ-3 വിക്രം ലാന്ററിന്റെ ചിത്രങ്ങൾ പകർത്തി ചന്ദ്രയാൻ- 2 ഓർബിറ്റർ; പങ്കുവെച്ച് ഐഎസ്ആർഒ

Updated: Saturday, September 9, 2023, 17:41 [IST]

ബെംഗളൂരു:ചന്ദ്രയാൻ-2 ഓർബിറ്റർ പകർത്തിയ ചന്ദ്രയാൻ മൂന്നിന്റെ വിക്രം ലാന്ററിന്റെ ചിത്രം പങ്കുവെച്ച് ഐ എസ് ആർ ഒ. ചന്ദ്രയാൻ-2 ഓർബിറ്ററിലെ ഡ്യുവൽ-ഫ്രീക്വൻസി സിന്തറ്റിക് അപ്പേർച്ചർ റഡാർ (DFSAR) ക്യാമറയാണ് ചിത്രങ്ങൾ പകർത്തിയത്. 2019 ലാണ് ഇന്ത്യ ചന്ദ്രയാൻ-2 വിക്ഷേപിച്ചത്. ദൗത്യം പരാജയമായിരുന്നുവെങ്കിലും ഇപ്പോഴും പേടകത്തിന്റെ ഓർബിറ്റർ പ്രവർത്തിക്കുന്നണ്ട്.

അതേസമയം ഡ്യുവൽ-ഫ്രീക്വൻസി സിന്തറ്റിക് അപ്പേർച്ചർ റഡാർ സാധാരണ റഡാർ മാത്രമല്ലെന്ന് ഐ എസ് ആർ ഒ പറയുന്നു. ഈ റഡാർ എൽ-, എസ്-ബാൻഡ് ഫ്രീക്വൻസികളെ ട്രാൻസ്മിറ്റ് ചെയ്യുകയും സ്വീകരിക്കുകയും ചെയ്യുമ. മാത്രമല്ല ഇവയ്ക്ക് സോളാർ പ്രകാശത്തിന്റെ ആവശ്യമില്ലാതെ തന്നെ പ്രവർത്തിക്കാൻ സാധിക്കും.ചന്ദ്രോപരിതലത്തിൽ ഏതാനും മീറ്ററുകൾ വരെ തുളച്ചുകയറാൻ ഇവയ്ക്ക് കഴിവുണ്ട്. ചന്ദ്രയാൻ -3 യുടെ മിഴിവുള്ള ചിത്രങ്ങൾ പകർത്താനും ഇവയ്ക്ക് സാധിക്കും. റഡാർ മൂന്നാം ചാന്ദ്ര ദൗത്യത്തിന്റെ ഭാവിയിലും ഏറെ നിർണായകമാണെന്നും ഐ എസ് ആർ ഒ വ്യക്തമാക്കുന്നു.

2023 ജുലൈ 14 നാണ് ഇന്ത്യയുടെ മൂന്നാം ചാന്ദ്ര ദൗത്യമായ ചന്ദ്രയാൻ-3 വിക്ഷേപിച്ചത്. ഓഗസ്റ്റ് 23 നായിരുന്നു ചന്ദ്രയാൻ-3 ചന്ദ്രന്റെ ദക്ഷിണ ധ്രുവത്തിൽ സോഫ്റ്റ ലാന്റ് ചെയ്തത്. ഇതോടെ ചന്ദ്രോപരിതലത്തിൽ ഇറങ്ങുന്ന നാലാമത്തെ രാജ്യമായി ഇന്ത്യ മാറി. ചന്ദ്രന്റെ ദക്ഷിണ ധ്രുവത്തിലിറങ്ങിയ ആദ്യ രാജ്യം എന്ന നേട്ടവും ഇന്ത്യ സ്വന്തമാക്കി.

14 ദിവസത്തിന് ശേഷം സപ്റ്റംബർ 3 ന് റോവറും ലാൻ്ററും പ്രവർത്തനം അവസാനിപ്പിച്ചതായി ഐ എസ് ആർ ഒ അറിയിച്ചിരുന്നു. ഒരു ചാന്ദ്ര ദിവസം അവസാനിപ്പിച്ചതിന് പിന്നാലെയായിരുന്നു ഇത്. റോവറിനെ സുരക്ഷിത സ്ഥാനത്തേക്ക് മാറ്റി നിർത്തിയതായും സ്ലീപ് മോഡിലേക്ക് മാറ്റിയതായും ഐ എസ് ആർ ഒ അറിയിച്ചിരുന്നു. ചന്ദ്രനില്‍ പകല്‍ അവസാനിച്ചതിനാലായിരുന്നു ഇത്.

പൂര്‍ണ്ണമായി ബാറ്ററി ചാര്‍ജുള്ളതാണ് റോവറിന്റെ സോളാര്‍ പാനലുകള്‍ .അടുത്ത സൂര്യോദയമായ സെപ്റ്റംബര്‍ 22-ന് വെളിച്ചം ലഭിക്കാന്‍ പാകത്തിലാണ് ഇവ ക്രമീകരിച്ചിരിക്കുന്നത്. വെളിച്ചം ലഭിക്കുന്നതോടെ റോവർ പ്രവർത്തിച്ച് തുടങ്ങുമെന്ന പ്രതീക്ഷയിലാണ് ഐ എസ് ആർ ഒ. ഇനി ഇവ പ്രവർത്തിച്ചില്ലെങ്കിൽ ഇന്ത്യയുടെ ചാന്ദ്ര ദൗത്യങ്ങളുടെ അംബാസിഡറായി അത് എക്കാലവും അവിടെ നിലനിൽക്കുമെന്നും ഐ എസ് ആർ ഒ വ്യക്തമാക്കിയിരുന്നു.