ചന്ദ്രയാൻ-3 വിക്ഷേപണം നാളെ; തിരുപ്പതിയിൽ പ്രാർത്ഥന നടത്തി ഐഎസ്ആർഒ ശാസ്ത്രജ്ഞർ

ബാംഗ്ലൂർ: ഇന്ത്യയുടെ മൂന്നാം ചാന്ദ്ര പര്യവേഷണ ദൗത്യമായ ചന്ദ്രയാൻ-3 നാളെ വിക്ഷേപണം നടത്താനിരിക്കെ തിരുപ്പതി വെങ്കാടചല ക്ഷേത്രത്തിലെത്തി ഐ എസ് ആർ ഒ ശാസ്ത്ര സംഘം. ചന്ദ്രയാൻ -3ന്റെ മിനിയേച്ചർ പതിപ്പുമായെതിയാണ് ശാസ്ത്രജ്ഞരുടെ സംഘം പ്രാർത്ഥന നടത്തിയത്. പ്രധാന ദൗത്യങ്ങൾക്ക് മുൻപ് ശാസ്ത്രജ്ഞരുടെ സംഘം തിരുപ്പതി ക്ഷേത്രം സന്ദർശിക്കാറുണ്ട്.

'ഇത് ചന്ദ്രനിലേക്കുള്ള ഞങ്ങളുടെ ചന്ദ്രയാൻ-3 ദൗത്യമാണ്. നാളെയാണ് വിക്ഷേപണം', ക്ഷേത്ര ദർശനത്തിന് പിന്നാലെ ശാത്രജ്ഞർ പറഞ്ഞു. ശ്രീഹരിക്കോട്ടയിലെ സതീഷ് ധവാൻ സ്പേസ് സെന്ററിൽ നിന്നും വെള്ളിയാഴ്ച ഉച്ചയ്ക്ക് 2.35 നാണ് ചന്ദ്രയാൻ-3 വിക്ഷേപണം. പദ്ധതിയുടെ അന്തിമഘട്ട അവലോകനമായ മിഷൻ റെഡിനസ് റിവ്യൂ പൂർത്തിയായതായി ഐ എസ് ആർ ഒ അറിയിച്ചു. ഇന്ന് ഉച്ചയ്ച്ച് 2.35 നാണ് കൗണ്ട് ഡൗൺ തുടങ്ങുക.

ഐ എസ് ആർ ഒയുടെ മൂന്നാമത്തെ ചന്ദ്രദൗത്യമാണ് ചന്ദ്രയാന്‍-3. ചന്ദ്രോപരിതലത്തിലുള്ള രാസ, പ്രകൃതി മൂലകങ്ങൾ, മണ്ണ്, ജലം എന്നിവയുടെ പര്യവേക്ഷണമാണ് ചന്ദ്രയാൻ- 3 ദൗത്യത്തിലൂടെ ഐ എസ് ആർ ഒ ലക്ഷ്യം വെയ്ക്കുന്നത്. എൽ വി എം-3 (LVM-3) ആണ് ചന്ദ്രയാൻ-3 യെ ബഹിരാകാശത്തേക്ക് വഹിച്ച് പറക്കുന്നത്.

ചന്ദ്രയാൻ- 2 ദൗത്യത്തിന്റെ പരാജയത്തിൽ നിന്നും പാഠം ഉൾക്കൊണ്ട് കൊണ്ടാണ് പുതിയ ദൗത്യത്തിന് ഐ എസ് ആർ ഒ ഒരുങ്ങുന്നത്. സോഫ്റ്റ് ലാന്റിംഗ് നടത്താൻ സാധിക്കാതിരുന്നതോടെയായിരുന്നു ചന്ദ്രയാൻ-2 ദൗത്യം പരാജയപ്പെട്ടത്. ചന്ദ്രോപരിതലത്തിന് 2.1 കിമി ഉയരത്തിൽ വെച്ച് ഓർബിറ്ററുമായുള്ള ബന്ധം ലാൻഡറിന് നഷ്ടമാകുകയായിരുന്നു. അതുകൊണ്ട് തന്നെ ചന്ദ്രയാൻ-2 ന്റെ പോരായ്മകൾ പരിഹരിച്ച് കൊണ്ടാണ് ചന്ദ്രയാൻ-3 രൂപകൽപന ചെയ്തിരിക്കുന്നത്.

ലാന്‍ഡര്‍, റോവര്‍, പ്രോപ്പല്‍ഷന്‍ മൊഡ്യൂള്‍ എന്നിങ്ങനെ മൂന്ന് ഭാഗങ്ങളാണ് ചന്ദ്രയാൻ -3 യിൽ ഉള്ളത്. ചിലവ് ചുരുക്കുന്നതിന്റെ ഭാഗമായി പുതിയൊരു ഓര്‍ബിറ്റര്‍ ചന്ദ്രയാന്‍ 3 യ്ക്ക് ഇല്ല. പകരം ചന്ദ്രയാന്‍ 2 ഓര്‍ബിറ്റര്‍ തന്നെയാണ് ഉപയോഗിക്കുന്നത്.. ഓഗസ്റ്റ് 23 നായിരിക്കും ചന്ദ്രയാൻ-3 സോഫ്റ്റ് ലാന്റിങ് നടക്കുക. ദൗത്യം വിജയിച്ചാൽ ചന്ദ്രനിൽ സോഫ്റ്റ് ലാന്റിംഗ് നടത്തുന്ന നാലാമത്തെ രാജ്യമാകും ഇന്ത്യ.

English summary

Chandrayaan-3 to launch tomorrow; ISRO scientists offered prayers at Tirupati