ഛത്തീസ്ഗഡ് തിരഞ്ഞെടുപ്പ് ഫലം: ഛത്തീസ്ഗഡില്‍ കോണ്‍ഗ്രസ് മുന്നില്‍, തൊട്ടുപിന്നിലെത്തി ബിജെപി

Updated: Monday, December 4, 2023, 2:16 [IST]

റായ്പൂര്‍: ഛത്തീസ്ഗഡില്‍ ആദ്യ ഘട്ട ഫലങ്ങള്‍ പുറത്തുവന്നപ്പോള്‍ കോണ്‍ഗ്രസിന് മുന്നേറ്റം. മുപ്പത് സീറ്റുകളിലാണ് കോണ്‍ഗ്രസ് മുന്നേറുന്നത്. എന്നാല്‍ തൊട്ടുപിന്നിലായി ബിജെപിയുണ്ട്. 25 സീറ്റുകളിലാണ് അവരുടെ മുന്നേറ്റം. അതേസമയം എക്‌സിറ്റ് പോളുകളില്‍ നിന്ന് വ്യത്യസ്തമായ ഫലമാണ് തുടക്കത്തില്‍ വന്നുകൊണ്ടിരിക്കുന്നത്.

അതേസമയം ആര്‍ക്ക് ഭൂരിപക്ഷം ലഭിക്കുമെന്ന കാര്യം തുടക്കത്തിലെ ട്രെന്‍ഡില്‍ നിന്ന് വ്യക്തമാവില്ലെന്ന് ഉറപ്പാണ്. മുഖ്യമന്ത്രി ഭൂപേഷ് ബാഗല്‍ കോണ്‍ഗ്രസ് 75 സീറ്റ് നേടുമെന്നാണ് പറഞ്ഞിരുന്നത്. അതേസമയം ബാഗല്‍ സ്വന്തം മണ്ഡലമായ പഠാനില്‍ പിന്നിലാണ്. സംസ്ഥാനത്താകെ 90 സീറ്റുകളാണ് ഉള്ളത്. കോണ്‍ഗ്രസ് ജയിക്കുമെന്ന് പ്രതീക്ഷ ഉള്ളതായി മന്ത്രി അമര്‍ജീത്ത് ഭാഗത്ത് ആത്മവിശ്വാസം പ്രകടിപ്പിച്ചിരുന്നു.

അതേസമയം നാലോളം എക്‌സിറ്റ് പോളുകള്‍ നേരത്തെ പ്രവചിച്ചിരുന്നത് കോണ്‍ഗ്രസ് ഭൂരിപക്ഷം നേടുമെന്നാണ്. 46 സീറ്റില്‍ കൂടുതല്‍ കോണ്‍ഗ്രസ് നേടുമെന്നും പ്രവചനമുണ്ടായിരുന്നു. മറ്റ് രണ്ട് സര്‍വേകള്‍ 42 മുതല്‍ 44 സീറ്റ് വരെയും, ബ ാക്കിയുള്ള മൂന്ന് സര്‍വേകള്‍ നാല്‍പ്പതില്‍ കൂടുതല്‍ സീറ്റും കോണ്‍ഗ്രസ് നേടുമെന്ന് പ്രവചിച്ചിരുന്നു.

9 എക്‌സിറ്റ് പോളുകളില്‍ രണ്ടെണ്ണം മാത്രമാണ് ബിജെപി ഛത്തീസ്ഗഡില്‍ വിജയിക്കുമെന്ന് പ്രവചിച്ചത്. അന്ധകാരം ഇല്ലാതായി, സൂര്യന്‍ ഉദിച്ച് കഴിഞ്ഞു. താമര വിടരുമെന്നായിരുന്നു വോട്ടെണ്ണല്‍ ആരംഭിക്കും മുമ്പ് ബിജെപി നേതാവും മുന്‍ മുഖ്യമന്ത്രിയുമായ രമണ്‍ സിംഗ് കുറിച്ചത്.

ഭൂപേഷ് ബാഗലിന്റെ ട്രാക്ക് റെക്കോര്‍ഡിലാണ് കോണ്‍ഗ്രസ് പ്രചാരണത്തില്‍ എല്ലാം പ്രതീക്ഷ വെച്ചിരുന്നത്. 2013ലെ മാവോവാദി ആക്രമണത്തില്‍ നേതാക്കള്‍ കൊല്ലപ്പെട്ട ശേഷം പാര്‍ട്ടിയെ സംസ്ഥാനത്ത് വളര്‍ത്തി കൊണ്ടുവന്നത് ബാഗലാണ്. മികച്ച ജനക്ഷേമ പദ്ധതികളും നടപ്പാക്കിയിരുന്നു.

രാജ്യത്ത് ആദ്യമായി കോണ്‍ഗ്രസും രാഹുല്‍ ഗാന്ധിയും വിഭാവനം ചെയ്ത ന്യായ് പദ്ധതി നടപ്പാക്കിയതും ഛത്തീസ്ഗഡിലായിരുന്നു. പിന്നീട് രാഹുല്‍ വിവിധ സംസ്ഥാനങ്ങളില്‍ ന്യായ് പദ്ധതിയെ കുറിച്ച് പ്രചാരണം നടത്തിയത് ഛത്തീസ്ഗഡ് മോഡല്‍ ഉയര്‍ത്തി കാണിച്ചായിരുന്നു. പക്ഷേ വന്‍ വിജയമാണ് സംസ്ഥാനത്ത് കോണ്‍ഗ്രസ് പ്രതീക്ഷിച്ചിരുന്നത്.

അതേസമയം കോണ്‍ഗ്രസ് മുന്നേറ്റമുണ്ടായെങ്കിലും ബിജെപി പതറിയിട്ടില്ല. അവരും തൊട്ടുപിന്നിലുണ്ട്. അവിടെ നേതാക്കളാരും ഇല്ലാതെയായിരുന്നു പ്രചാരണം. പ്രധാനമന്ത്രി നരേന്ദ്ര മോദിയായിരുന്നു ബിജെപിയുടെ പ്രചാരണായുധം. ഇത് കുറച്ചെങ്കിലും നേട്ടം ബിജെപിക്ക് സമ്മാനിച്ചിട്ടുണ്ട്. സംസ്ഥാനത്ത് ഉയര്‍ത്തി കാണിക്കാന്‍ പ്രത്യേകിച്ച് കാര്യങ്ങളൊന്നും ബിജെപിക്കില്ലായിരുന്നു.