ചെന്നൈ-ബെംഗളൂരു എക്‌സ്പ്രസ് വേയില്‍ മേല്‍പ്പാലം വരുന്നു; ഈ മേല്‍പ്പാലത്തിനൊരു പ്രത്യേകതയുണ്ട്

ചെന്നൈ-ബെംഗളൂരു എക്‌സ്പ്രസ് വേയില്‍ പുതിയ മേല്‍പ്പാലം വരുന്നു. എന്നാല്‍ ഈ മേല്‍പ്പാലത്തിന് ഒരു പ്രത്യേകതയുണ്ട്. ഇത് മനുഷ്യര്‍ക്കു വേണ്ടിയുള്ളതല്ല, മൃഗങ്ങള്‍ക്കു വേണ്ടിയാണ്. വന്യമൃഗങ്ങളുടെ സുരക്ഷിതവും സുഗമവുമായ യാത്രയ്ക്കു വേണ്ടിയാണ് മേല്‍പ്പാലം നിര്‍മിക്കുന്നത്. ചെന്നൈ-ബെംഗളൂരു എക്‌സ്പ്രസ് വേയില്‍ വെല്ലൂരിനും റാണിപേട്ടിനും ഇടയിലുള്ള മഹിമണ്ഡലം റിസര്‍വ് വനമേഖലയിലാണ് നാഷണല്‍ ഹൈവേ അതോറിറ്റി ഓഫ് ഇന്ത്യ ഈ പ്രത്യേക പാലം നിര്‍മ്മിക്കുന്നത്.

വന്യമൃഗങ്ങള്‍ക്ക് സുരക്ഷിതമായി വനപാത മുറിച്ചുകടക്കാന്‍ സൗകര്യമൊരുക്കുക എന്ന ലക്ഷ്യത്തോടെയാണ് പുതിയ വന്യജീവി മേല്‍പ്പാലം നിര്‍മിക്കുന്നത്. റോഡപകടങ്ങളില്‍ വന്യമൃഗങ്ങള്‍ ചാവുന്നത് ഒഴിവാക്കാനും മനുഷ്യരും വന്യമൃഗങ്ങളും തമ്മിലുള്ള സംഘര്‍ഷം കുറയ്ക്കാനും ഈ പദ്ധതി വലിയ തോതില്‍ സഹായിക്കുമെന്നാണ് ദേശീയ പാത അതോറിറ്റി അധികൃതരുടെ പ്രതീക്ഷ. 90 മീറ്റര്‍ നീളവും 25 മീറ്റര്‍ വീതിയുമുള്ള ഈ മേല്‍പ്പാലത്തിലൂടെ പുള്ളിപ്പുലികള്‍, കാട്ടുപോത്തുകള്‍, കാട്ടുപന്നികള്‍, മാനുകള്‍ എന്നിവയ്ക്ക് തടസമില്ലാതെ വനത്തിന്റെ ഇരുവശങ്ങളിലേക്കും സഞ്ചരിക്കാന്‍ സൗകര്യമൊരുക്കും. റോഡില്‍ നിന്ന് 5.5 മീറ്റര്‍ ഉയരത്തിലായിരിക്കും പാലം നിര്‍മ്മിക്കുക.

പാലത്തിന് മുകളില്‍ സ്വാഭാവികമെന്നു തോന്നിപ്പിക്കുന്ന മനുഷ്യനിര്‍മ്മിതമായ പുല്‍മേടും വികസിപ്പിക്കുന്നുണ്ട്. തമിഴ്‌നാട് വനം വകുപ്പിന്റെ പിന്തുണയോടെയായിരിക്കും പുല്‍മേട് നിര്‍മിക്കുക. പുല്‍മേടുകളും ചെടികളും വച്ചുപിടിപ്പിക്കാന്‍ തമിഴ്‌നാട് വനംവകുപ്പിന്റെ സഹായത്തോടെ പ്രത്യേക പദ്ധതിയും ആവിഷ്‌കരിച്ചിട്ടുണ്ട്. മൃഗങ്ങള്‍ക്ക് ഇതൊരു കോണ്‍ക്രീറ്റ് പാലമാണെന്ന് തോന്നാത്ത രീതിയില്‍ വനത്തിന്റെ ഭാഗമായി തന്നെ മാറ്റാനാണ് ഇതിലൂടെ ലക്ഷ്യമിടുന്നത്. വികസനത്തോടൊപ്പം പരിസ്ഥിതി സംരക്ഷണത്തിനും പ്രാധാന്യം നല്‍കുമെന്ന് എന്‍എച്ച്എഐ അറിയിച്ചു.

ബെംഗളൂരുവിനെയും ചെന്നൈയെയും ബന്ധിപ്പിക്കുന്ന 258 കിലോമീറ്റര്‍ നീളമുള്ള ഈ എക്‌സ്പ്രസ് വേയില്‍ വന്യമൃഗങ്ങള്‍ വണ്ടികള്‍ക്കു കുറുകെച്ചാടുന്നതു മൂലമുള്ള അപകടങ്ങള്‍ ഒഴിവാക്കാന്‍ ഈ മേല്‍പ്പാലം സഹായകമാകും. 2022 മെയ് മാസത്തില്‍ പ്രധാനമന്ത്രി നരേന്ദ്ര മോദി തറക്കല്ലിട്ടതിന് ശേഷമാണ് എക്‌സ്പ്രസ് വേയുടെ നിര്‍മ്മാണം ആരംഭിച്ചത്.