ജനസംഖ്യ നിയന്ത്രിക്കാന് അബോര്ഷന് പ്രതിവിധിയെന്ന് 10ാം ക്ലാസ് പുസ്തകം
റായ്പുര്: ജനസംഖ്യ നിയന്ത്രിക്കാന് അബോര്ഷന് പ്രതിവിധിയാണെന്ന് കാട്ടിയുളള സ്കൂള് പാഠപുസ്തകം വിവാദത്തില്. ഛത്തീസ്ഗഡിലെ പത്താം ക്ലാസ് സോഷ്യല് സയന്സ് പാഠപുസ്തകമാണ് വിവാദത്തിലായത്. ജനസംഖ്യ നിയന്ത്രിക്കാന് അബോര്ഷന് നല്ലൊരു പ്രതിവിധിയാണെന്നാണ് പുസ്തകം സൂചിപ്പിക്കുന്നത്.
മതപരമായും അല്ലാതെയും അബോര്ഷനെതിരെ പലഭാഗത്തുനിന്നും എതിര്പ്പുകള് ഉയര്ന്നുവരവെയാണ് പുസ്തകത്തിലെ വിവാദ പരാമര്ശം. ഇത്തരത്തില് തെറ്റായ സന്ദേശം കുട്ടികളിലെത്തിച്ചതിന് സംസ്ഥാനത്തെ പ്രതിപക്ഷ കക്ഷിയായ കോണ്ഗ്രസ് രംഗത്തെത്തി. ബിജെപി സര്ക്കാരിന്റെ പിടിപ്പുകേടാണ് പാഠപുസ്തകത്തിലെ പരാമര്ശത്തിനിടയാക്കിയതെന്ന് കോണ്ഗ്രസ് നേതാക്കള് ആരോപിച്ചു.
ചെറു പ്രായത്തില് തന്നെ കുട്ടികളില് അബോര്ഷന് നല്ലതാണെന്ന തരത്തില് പ്രചരിപ്പിക്കപ്പെടുന്നത് ശരിയായ നടപടിയല്ല. പാഠപുസ്തകത്തില്
എന്തൊക്കെയാണ് ഉള്ക്കൊള്ളിക്കുന്നതെന്ന കാര്യത്തില് പരിശോധന നടത്തുന്നതില് വിദ്യാഭ്യാസ വകുപ്പ് പരാജയമാണ്. ബിജെപി സര്ക്കാരിന്റെ ഗൂഢനീക്കമാണോ ഇത്തരം സംഭവങ്ങള് ആവര്ത്തിക്കുന്നതിന് പിന്നിലെന്ന് സംശയിക്കുന്നതായും കോണ്ഗ്രസ് ആരോപിച്ചു.
ഇതാദ്യമായല്ല വിവാദ പാഠഭാഗം ഉള്ക്കൊള്ളിച്ചുകൊണ്ട് ഛത്തീസ്ഗഡ് വിദ്യാഭ്യാസ വകുപ്പ് വാര്ത്തയാകുന്നത്. സ്ത്രീകള് തൊഴില് ചെയ്യാന് ആരംഭിച്ചതോടെ ഇന്ത്യയില് തൊഴിലില്ലായ്മ വര്ധിച്ചുവെന്ന പത്താംക്ലാസിലെ പാഠഭാഗവും നേരത്തെ വിവാദമായിരുന്നു. കൂടാതെ ബലാത്സംഗക്കേസില് ജയിലില് കഴിയുന്ന ആശാറാം ബാപ്പുവിന്റെ പുസ്തകം സ്കൂളില് വിതരണം ചെയ്തതും വിവാദത്തിനിടയാക്കി.