എന്നെ ഇന്ത്യയിലേക്ക് കൊണ്ടുപോകൂ... ഛോട്ടാ രാജന്‍ സിബിഐയോട്!

ഇന്തോനേഷ്യയില്‍ പിടിയിലായ അധോലോക നേതാവ് ഛോട്ടാ രാജന് ഇന്ത്യയിലേക്ക് വരാന്‍ മോഹം. ഇന്ത്യയുടെ സുരക്ഷാ ഏജന്‍സികളോട് ഛോട്ടാ രാജന്‍ തന്നെ ഇന്ത്യയിലേക്ക് കൊണ്ടുപോകാന്‍ ആവശ്യപ്പെട്ടതായാണ് റിപ്പോര്‍ട്ടുകള്‍. ഛോട്ടാ രാജനെ ഇന്ത്യയിലേക്ക് കൊണ്ടുവരാനുള്ള ശ്രമങ്ങളുമായി സി ബി ഐയും മുംബൈ ക്രൈംബ്രാഞ്ചും ഇന്തോനേഷ്യയിലാണ്.

ചൊവ്വാഴ്ചയോടെ ഛോട്ടാ രാജനെ ഇന്ത്യയിലേക്ക് കൊണ്ടുവരും എന്നും സ്ഥിരീകരിക്കാത്ത റിപ്പോര്‍ട്ടുകളുണ്ട്. ഛോട്ടാ രാജനെ ഇന്ത്യയിലേക്ക് കൊണ്ടുവരുന്ന കാര്യത്തില്‍ നിയമപരമായ തടസ്സങ്ങളൊന്നും ഇല്ലെന്ന് ഉന്നത ഉദ്യോഗസ്ഥരിലൊരാള്‍ വണ്‍ ഇന്ത്യയോട് പറഞ്ഞു. മാത്രമല്ല, ഇന്ത്യയിലേക്ക് വരുന്നതില്‍ പ്രശ്‌നമൊന്നും ഇല്ലെന്ന് ഛോട്ടാ രാജന്‍ ഇന്ത്യയുടെയും ഇന്തോനേഷ്യയുടെയും ഉദ്യോഗസ്ഥരോടും വ്യക്തമാക്കിയിട്ടുണ്ട്.

ഛോട്ടാ രാജനെ ഇന്ത്യയില്‍ എവിടേക്കാണ് കൊണ്ടുവരിക എന്ന കാര്യത്തില്‍ അന്തിമ തീരുമാനം ആയിട്ടില്ല എന്നാണ് അറിയുന്നത്. തലസ്ഥാനമായ ദില്ലിയിലേക്കായിരിക്കും രാജനെ കൊണ്ടുവരിക എന്നാണ് അഭ്യൂഹങ്ങള്‍. ഛോട്ടാ രാജനെതിരായ കേസുകള്‍ അധികവും മുംബൈയില്‍ ആണ്. അതുകൊണ്ട് തന്നെ ദില്ലിയില്‍ കൊണ്ടുവന്നാലും രാജനെ മുംബൈയിലേക്ക് മാറ്റിയേക്കും. ഞായറാഴ്ചയാണ് ഇന്ത്യന്‍ അന്വേഷണ സംഘം ഇന്തോനേഷ്യയിലേക്ക് പോയത്.

English summary

Chhota Rajan has told the Indian authorities in Indonesia that he is not opposed to being in Indian custody.