സോനു നിഗമിന് ഛോട്ടാ ഷക്കീലിന്റെ ഭീഷണി

Updated: Thursday, October 3, 2013, 12:11 [IST]

മുംബൈ: ബോളിവുഡിന്റെ പ്രിയ ഗായകനും നടനുമായ സോനു നിഗമിന് അധോലോക നായകന്‍ ഛോട്ടാ ഷക്കീലിന്റെ ഭീഷണി. ഷക്കീലില്‍ നിന്നും ഭീഷണി സന്ദേശങ്ങള്‍ ലഭിച്ചു എന്ന് പരാതിപ്പെട്ട് താരം തന്നെയാണ് പോലീസില്‍ പരാതിയുമായി എത്തിയിരിക്കുന്നത്.

ദാവൂദ് ഇബ്രാഹം സംഘത്തിലെ പ്രധാനിയായ ഛോട്ടാ ഷക്കീല്‍ തനിക്ക് നിരവധി തവണ ഭീഷണി സന്ദേശങ്ങള്‍ അയച്ചു എന്നും ഭീഷണിപ്പെടുത്തി ഫോണ്‍ വിളിച്ചു എന്നുമാണ് സോനു നിഗം പരാതിപ്പെടുന്നത്. പ്രശസ്ത ഈവന്റ് മാനേജ്‌മെന്റ് കമ്പനിയുമായി സോനുവിനുള്ള കരാര്‍ റദ്ദ് ചെയ്യണം എന്നാവശ്യെപ്പെട്ടായിരുന്നത്രെ ഭീഷണി.

തങ്ങളുടെ ആവശ്യം അംഗീകരിച്ചില്ലെങ്കില്‍ സോനുവിന്റെ ഇമേജ് നശിപ്പിക്കും എന്നാണ് അധോലോക സംഘത്തിന്റെ ഭീഷണി. മുംബൈ സ്വദേശിനിയുമായി സോനു നിഗമിനുള്ള ബന്ധം പരസ്യപ്പെടുത്തുമെന്നും ഇവര്‍ ഭീഷണിപ്പെടുത്തുന്നു. സോനു നിഗം പരിപാടിയുമായി പുറത്താണ് എന്നും താരത്തിന്റെ മൊഴി രേഖപ്പെടുത്തിയിട്ടില്ല എന്നും മുംബൈ പോലീസ് പറഞ്ഞു.

സോനു നിഗമിനെ വെച്ച് ഒരു അന്താരാഷ്ട്ര പരിപാടിയുമായി ടൂര്‍ സംഘടിപ്പിക്കാനാണ് അധോലോക നേതാവിന്റെ പരിപാടി എന്നറിയുന്നു. ഇതുമായി സഹകരിക്കാന്‍ വേണ്ടിയാണത്രെ മറ്റു കരാറുകളില്‍ നിന്നും വിട്ടുനില്‍ക്കാന്‍ ഇവര്‍ താരത്തോട് ആവശ്യപ്പെട്ടത്. ദുബായ് സ്വദേശിയായ അല്‍ത്താഫുമായി കരാറില്‍ തുടരണമെന്നും സോനു നിഗമിനോട് ഛോട്ടാ ഷക്കീല്‍ ആവശ്യപ്പെടുന്നു.

ബോളിവുഡ് താരങ്ങളുടെ വിദേശ ടൂറുകളും സ്‌റ്റേജ് ഷോകളും നിയന്ത്രിക്കുന്നത് പലപ്പോഴും അധോലോകവും കള്ളപ്പണവുമാണ് എന്നാണ് പോലീസ് നല്‍കുന്ന സൂചന. ഇത്തരം പരിപാടികളില്‍ അധോലോക നായകരുടെ സാന്നിധ്യവും സാധാരണയാണ്. എന്തായാലും ആവശ്യമെങ്കില്‍ സോനു നിഗമിന് സംരക്ഷണം ഏര്‍പ്പെടുത്താനാണ് പോലീസ് തിരുമാനം.