ചിറ്റൂര്‍ മേയര്‍ അനുരാധയെ വെടിവെച്ചുകൊന്നു, ഭര്‍ത്താവ് അതീവ ഗുരുതരാവസ്ഥയില്‍!

ഹൈദരാബാദ്: ചിറ്റൂര്‍ മേയറായ അനുരാധയെ വെടിവെച്ചുകൊന്നു. ചൊവ്വാഴ്ച ഉച്ചയോടെയാണ് ഞെട്ടിപ്പിക്കുന്ന സംഭവം നടന്നത്. അയല്‍ സംസ്ഥാനമായ കര്‍ണാടകയില്‍ നിന്നും ഉളളവരാണ് കൊലയാളികള്‍ എന്നാണ് പ്രാഥമിക സൂചനകള്‍. ഹൈദരാബാദ് പോലീസ് അന്വേഷണം ആരംഭിച്ചിട്ടുണ്ട്.

അനുരാധയുടെ ഭര്‍ത്താവ് മോഹനും വെടിയേറ്റിട്ടുണ്ട്. ആശുപത്രിയില്‍ കഴിയുന്ന മോഹന്റെ നില അതീവ ഗുരുതരമാണ് എന്നാണ് ഡോക്ടര്‍മാര്‍ നല്‍കുന്ന വിവരം. അനുരാധയെയും ഭര്‍ത്താവ് മോഹനെയും അക്രമികള്‍ വെടിവെച്ച ശേഷം വാള് കൊണ്ട് വെട്ടുകയും ചെയ്തതായി ആന്ധ്രപ്രദേശ് എ ഡി ജി പി ആര്‍ പി താക്കൂര്‍ പറഞ്ഞു.

മുനിസിപ്പല്‍ കോര്‍പറേഷന്‍ ഓഫീസില്‍ കയറിയാണ് അനുരാധയെയും ഭര്‍ത്താവിനെയും ആക്രമിച്ചത്. ആന്ധ്രപ്രദേശ് മുഖ്യമന്ത്രി ചന്ദ്രബാബു നായിഡുവിന്റെ സ്വദേശമാണ് ചിറ്റൂര്‍. കൊല്ലപ്പെട്ട അനുരാധയാകട്ടെ, തെലുങ്കുദേശം പാര്‍ട്ടി നേതാവും. കുടുബപരമായ കാരണങ്ങളാകാം കൊലപാതകത്തിന് പിന്നിലെന്ന് പോലീസ് പറഞ്ഞു.

മേയര്‍ അനുരാധയെയും ഭര്‍ത്താവിനെയും ആക്രമിച്ച 5 പേരെ പോലീസ് തിരിച്ചറിഞ്ഞിട്ടുണ്ട്. ഇതില്‍ രണ്ടുപേര്‍ പോലീസിന് കീഴടങ്ങിയതായും വിവരമുണ്ട്. ഇവരെ ചോദ്യം ചെയ്താല്‍ കൂടുതല്‍ വിവരങ്ങള്‍ ലഭ്യമാകും എന്ന പ്രതീക്ഷയിലാണ് പോലീസ്.

English summary

In a shocking incident, Anuradha the Mayor of Chittoor, Andhra Pradesh was shot dead on Tuesday. Her husband Mohan who was also shot at is said to be in a critical condition. The police have launched an investigation and suspect that the killers may be from Karnataka.