മുംബൈയിൽ ശക്തമായ മഴ തുടരുന്നു: സാഹചര്യം വിലയിരുത്തി മുഖ്യമന്ത്രി, നദികളിലെ ജലനിരപ്പ് ഉരുന്നു...

Published: Thursday, July 22, 2021, 23:41 [IST]

മുംബൈ: മഹാരാഷ്ട്രയിൽ ശക്തമായ മഴയും വെള്ളപ്പൊക്കവും തുടരുന്ന സാഹചര്യത്തിൽ സാഹചര്യം വിലയിരുത്തി മുഖ്യമന്ത്രി ഉദ്ധവ് താക്കറെ. ശക്തമായ മഴ തുടരുന്ന രത്നഗിരി, റായ്ഗഡ് ജില്ലകളിലാണ് മുഖ്യമന്ത്രി സന്ദർശനം നടത്തിയത്.ഈ സാഹചര്യത്തിൽ ജാഗ്രത പുലർത്താനും മുൻകരുതൽ നടപടികൾ സ്വീകരിക്കാനും ദുരന്ത നിവാരണ യൂണിറ്റുകൾക്കും ബന്ധപ്പെട്ട വകുപ്പുകൾക്കും മുഖ്യമന്ത്രി നിർദ്ദേശം നൽകിയിട്ടുണ്ട്.

അതേ സമയം നദികളിലെ ജലനിരപ്പ് നിരന്തരം ഉയരുകയാണെന്ന് പറഞ്ഞ താക്കറെ, എല്ലാ ഏജൻസികളും ജാഗ്രതയോടെയും ജാഗ്രതയോടെയും പ്രവർത്തിക്കണമെന്ന് മുന്നറിയിപ്പ് നൽകിയിട്ടുണ്ട്. അതേ സമയം ഈ പ്രദേശങ്ങളിലെ കൊവിഡ് രോഗികൾക്ക് ബദൽ സംവിധാനങ്ങൾ ഏർപ്പെടുത്താനും അദ്ദേഹം അധികാരികളോട് നിർദ്ദേശിച്ചു. ഇടതടവില്ലാതെ മഴ പെയ്യുന്ന സാഹചര്യത്തിൽ മഹാരാഷ്ട്രയിൽ ജാഗ്രതാ നിർദേശമാണ്. ഈ പ്രദേശങ്ങളിലെല്ലാം വെള്ളം കയറിക്കൊണ്ടിരിക്കുകയാണ്. അടുത്ത മൂന്ന് ദിവസത്തേക്ക് കൊങ്കൺ തീരത്ത് കാലാവസ്ഥാ വകുപ്പ് ചുവപ്പ്, ഓറഞ്ച് അലേർട്ടുകൾ പുറപ്പെടുവിച്ചിട്ടുണ്ട്.

രത്‌നഗിരി ജില്ലയിലെ ജഗ്‌ബുദി നദിയിലെ ജലനിരപ്പ് 9 മീറ്ററിലധികമാണ്. അപകട നിലയായി 7 മീറ്ററാണ് രേഖപ്പെടുത്തിയിട്ടുള്ളത്. 7 മീറ്ററിൽ അപകട നിലയുള്ള വസിഷ്ഠി നദിയിലെ ജലനിരപ്പ് 7.8 മീറ്ററിനു മുകളിലെത്തിയിട്ടുണ്ട്. കാജാലി നദിയിലെ ജലനിരപ്പ് 1.74 മീറ്ററിന് മുകളിലെത്തിയിട്ടുണ്ട്. കൂടാതെ കൊടാവലി, ശാസ്ത്രി, ബാവണ്ടി നദികൾ അപകടനിരപ്പും കവിഞ്ഞാണ് ഒഴുകുന്നത്.

ഖേദ്, ചിപ്ലൂൺ, ലാൻസ, രാജപൂർ, സംഗമേശ്വർ, ചുറ്റുമുള്ള ഗ്രാമങ്ങൾ എന്നിവിടങ്ങളിൽ കനത്ത മഴയാണ് തുടരുന്നത്. ഇതോടെ ജനങ്ങളെ സുരക്ഷിതമായ പ്രദേശങ്ങളിലേക്ക് മാറ്റിപ്പാർപ്പിക്കാൻ സംസ്ഥാന സർക്കാർ നിർദേശം നൽകിയിട്ടുണ്ട്. റായ്ഗഡ് ജില്ലയിൽ കുണ്ഡലിക നദി അപകടകരമായ നിലയിലാണ് ഒഴുകുന്നത്. കൂടാതെ അംബ, സാവിത്രി, പട്ടാൽഗംഗ, ഗാഡി, ഉൽഹാസ് നദികളുടെ സ്ഥിതിയും സമാനമാണ്.