ഇറാൻ അനുകൂലികളെ നിരീക്ഷിക്കണം; സംസ്ഥാനങ്ങൾക്ക് കർശന നിർദ്ദേശവുമായി കേന്ദ്രം

ഇറാൻ-യുഎസ്-ഇസ്രായേൽ മേഖലയിൽ നിലനിൽക്കുന്ന യുദ്ധസാഹചര്യത്തിന്റെ പശ്ചാത്തലത്തിൽ ഇന്ത്യയിൽ കനത്ത സുരക്ഷാ ജാഗ്രത പ്രഖ്യാപിച്ചു. രാജ്യത്തെ ക്രമസമാധാന നില ഉറപ്പുവരുത്തുന്നതിന്റെ ഭാഗമായി കേന്ദ്ര ആഭ്യന്തര മന്ത്രാലയം എല്ലാ സംസ്ഥാനങ്ങൾക്കും കർശനമായ നിർദ്ദേശങ്ങൾ നൽകിക്കഴിഞ്ഞു. മേഖലയിലെ സംഘർഷങ്ങൾ മുതലെടുത്ത് രാജ്യത്ത് അസ്വസ്ഥതകൾ സൃഷ്ടിക്കാൻ നീക്കമുണ്ടാകാൻ സാധ്യതയുണ്ടെന്ന ഇന്റലിജൻസ് റിപ്പോർട്ടുകളെത്തുടർന്നാണ് കേന്ദ്രത്തിന്റെ ഈ മുന്നറിയിപ്പ്.

പ്രത്യേകിച്ച് ജൂത കേന്ദ്രങ്ങൾക്കും സ്ഥാപനങ്ങൾക്കും നേരെ ആക്രമണങ്ങൾ ഉണ്ടാകാൻ സാധ്യതയുണ്ടെന്ന വിലയിരുത്തലിനെത്തുടർന്ന് അവയ്ക്ക് സുരക്ഷ വർദ്ധിപ്പിക്കാൻ നിർദ്ദേശം നൽകിയിട്ടുണ്ട്. കൂടാതെ അൽ ഖ്വയ്ദ, ഐഎസ് തുടങ്ങിയ ഭീകരസംഘടനകളുടെ ആക്രമണസാധ്യതയും തള്ളിക്കളയാനാവില്ലെന്ന് ആഭ്യന്തര മന്ത്രാലയം മുന്നറിയിപ്പ് നൽകുന്നു. ആൾത്തിരക്കേറിയ സ്ഥലങ്ങളിൽ പരിശോധനകൾ കർശനമാക്കാനും, ക്രമസമാധാന ഏജൻസികളോട് ജാഗ്രത പാലിക്കാനും ആവശ്യപ്പെട്ടിട്ടുണ്ട്.

ഇറാനുമായി ബന്ധപ്പെട്ട പ്രതിഷേധങ്ങൾ രാജ്യത്ത് വർദ്ധിച്ചുവരുന്ന സാഹചര്യത്തിൽ, അവ സംഘർഷങ്ങളിലേക്ക് വഴിമാറുന്നില്ലെന്ന് ഉറപ്പുവരുത്താൻ സംസ്ഥാനങ്ങളോട് കേന്ദ്രം ആവശ്യപ്പെട്ടു. ഇറാനെ അനുകൂലിച്ച് തീവ്രരീതിയിൽ പ്രസംഗിക്കുന്നവരെയും സാമൂഹികവിരുദ്ധരെയും പ്രത്യേകം നിരീക്ഷിക്കണമെന്നും, ഇത്തരം പ്രവണതകൾ കണ്ടെത്തി അപ്പപ്പോൾ നടപടി സ്വീകരിക്കണമെന്നും നിർദ്ദേശത്തിൽ വ്യക്തമാക്കുന്നുണ്ട്. സോഷ്യൽ മീഡിയ പ്ലാറ്റ്‌ഫോമുകളിലെ നീക്കങ്ങൾ സൈബർ സെല്ലുകൾ വഴി സസൂക്ഷ്മം നിരീക്ഷിക്കാൻ സുരക്ഷാ ഏജൻസികൾക്ക് നിർദ്ദേശം നൽകി. എന്തെങ്കിലും തരത്തിലുള്ള വർഗീയ സംഘർഷങ്ങൾക്കോ അനിഷ്ട സംഭവങ്ങൾക്കോ ഇടനൽകാതെ സാഹചര്യം ശാന്തമായി കൈകാര്യം ചെയ്യണമെന്നാണ് കേന്ദ്ര സർക്കാരിന്റെ നിർദ്ദേശം. ജനങ്ങൾ ജാഗ്രത പാലിക്കണമെന്നും അഭ്യർത്ഥിക്കുന്നു.