വിഷ്ണുവിന്റെ വേഷം കെട്ടിയ ആള്ദൈവത്തിനെതിരെ കേസ്
കര്നാല്: ഭഗവാന് വിഷ്ണുവിന്റെ വേഷം കെട്ടി ഹിന്ദുമതവിശ്വാസികളുടെ വികാരം വ്രണപ്പെടുത്തിയെന്നുകാട്ടി ദേര സച്ചാ സൗധാ ചീഫ് ഗുര്മിത് റാം റഹീമിനെതിരെ പോലീസില് പരാതി. ഓള് ഇന്ത്യ ഹിന്ദു സ്റ്റുഡന്റ്സ് മൂവ്മെന്റാണ് പരാതിയുമായി രംഗത്തെത്തിയിരിക്കുന്നത്. വിഷ്ണുവേഷം കെട്ടിയ ഗുര്മിതിന്റെ വീഡിയോയും വിദ്യാര്ഥികള് തെളിവായി നല്കിയിട്ടുണ്ട്.
വിഷ്ണുവിന്റെ രീതിയിലുള്ള വേഷം കെട്ടി ഗുര്മിത് സിങ് ഒരു വീഡിയോ പുറത്തുവിട്ടിട്ടുണ്ടെന്നും ഇത് ഹിന്ദുക്കളുടെ മതവികാരത്തെ ബാധിക്കുന്നതാണെന്നും പരാതിയില് വിദ്യാര്ഥികള് വ്യക്തമാക്കിയിട്ടുണ്ട്. ഗുര്മിതിന്റെ വീഡിയോ സോഷ്യല് മീഡിയയിലൂടെയും മറ്റും വൈറലായതിനെ തുടര്ന്നാണ് വിദ്യാര്ഥികള് പരാതിയുമായി രംഗത്തെത്തിയത്.
ഗുര്മിത്തിനെ അനുകരിച്ചെന്ന് കാട്ടി അടുത്തിടെ സീരിയല് നടന് കിക്കു ഷര്ദയെ അറസ്റ്റ് ചെയ്തത് ഏറെ വിവാദത്തിനിടയാക്കിയിരുന്നു. ഗുര്മിത്തിനെ അനുകരിച്ചതിലൂടെ തങ്ങളുടെ വിശ്വാസത്തെ വ്രണപ്പെടുത്തിയെന്നുകാട്ടി ഒരുസംഘം പരാതി നല്കിയതിനെ തുടര്ന്നായിരുന്നു സീരിയല് നടനെ അറസ്റ്റ് ചെയ്തത്.
അതേ രീതിയിലുള്ള കേസ് തന്നെയാണ് ഗുര്മിത്തിനെതിരെയും ചുമത്തിയിട്ടുള്ളതെങ്കിലും ആള്ദൈവത്തെ അറസ്റ്റ് ചെയ്തേക്കില്ലെന്നാണ് റിപ്പോര്ട്ട്. ഭരണ തലത്തില് വന് സ്വാധീനമുള്ളയാളാണ് ഗുര്മിത്. തന്റെ തന്നെ നിര്മാണത്തിലൂടെ പുറത്തിറക്കിയ രണ്ടു സിനിമകളില് അഭിനയിച്ചും ഗുര്മിത് പേരെടുത്തിരുന്നു.