മുസ്ലീം സംവരണ പ്രീണനവുമായി കോണ്‍ഗ്രസ്

ദില്ലി: തിരഞ്ഞെടുപ്പ് പുരോഗമിക്കുമ്പോള്‍ മുസ്ലീം പ്രീണനവുമായി വീണ്ടും കോണ്‍ഗ്രസ്. തിരഞ്ഞെടുപ്പിനിടെ പുറത്തിറക്കിയ ഉപ പ്രകടന പത്രികയിലാണ് മുസ്ലീം വോട്ടുകള്‍ പിടിക്കാനുള്ള കോണ്‍ഗ്രസിന്റെ പുതിയ ശ്രമം.

പിന്നാക്ക മുസ്ലീങ്ങളെ ഉദ്ദേശിച്ചാണ് കോണ്‍ഗ്രസിന്റെ നീക്കം. ദളിത് ന്യൂനപക്ഷങ്ങളേയും ഇതുവഴി ലക്ഷ്യമിടുന്നുണ്ട്. നിലവിലെ സംവരണ വിഭാഗത്തില്‍ 4.5 ശതമാനം പിന്നാക്ക മുസ്ലീങ്ങളെ ഉള്‍പ്പെടുത്താന്‍ ശ്രമിക്കും എന്നാണ് കോണ്‍ഗ്രസ് തിരഞ്ഞെടുപ്പിനിടെ പുറത്തിറക്കിയ പ്രകടന പത്രികയില്‍ മുന്നോട്ട് വക്കുന്ന വാഗ്ദാനം.

കഴിഞ്ഞ മാര്‍ച്ച് 26 നാണ് കോണ്‍ഗ്രസ് ലോക്‌സഭ തിരഞ്ഞെടുപ്പിനുള്ള പ്രകടനപത്രിക പുറത്തിറക്കിയത്. അതില്‍ മുസ്ലീങ്ങള്‍ക്ക് പിന്നാക്ക സംവരണം എന്ന വാഗ്ദാനം മുന്നോട്ട് വച്ചിരുന്നെങ്കിലും പുതിയ പത്രികയില്‍ അത് കൂടുതല്‍ വ്യക്തമാക്കിയിട്ടുണ്ട്. യുപിഎ സര്‍ക്കാര്‍ ഇത് നേരത്തെ പ്രഖ്യാപിച്ചിരുന്നതാണെങ്കിലും വിഷയം ഇപ്പോള്‍ കോടതിയുടെ പരിഗണനിയിലാണ്.

തിരഞ്ഞെടുപ്പിനിടെ പുറത്തിറക്കിയ രണ്ടാം പ്രകടനപത്രികയില്‍ പറയുന്ന മറ്റൊരു കാര്യം ദളിത് ന്യൂനപക്ഷങ്ങള്‍ക്ക് പട്ടികജാതി സംവരണം ഏര്‍പ്പെടുത്തും എന്നതാണ്. നിലവില്‍ എല്ലാ ദളിത് ന്യൂനപക്ഷങ്ങളും പട്ടിക ജാതി വിഭാഗത്തിലല്ല ഉള്‍പ്പെടുന്നത്. ജാതി വ്യവസ്ഥയില്ലാത്ത മുസ്ലീം, ക്രിസ്ത്യന്‍ വിഭാഗങ്ങള്‍ക്ക് പട്ടിക ദാതി സംവരണം ലഭിക്കാന്‍ ഇത് ഇടവരുത്തും എന്നതാണ് പ്രധാന ആക്ഷേപം. ഇതിനെതിരെ ബിജെപി ശക്തമായി രംഗത്ത് വരികയും ചെയ്തിരുന്നു.

English summary

Congress sub-manifesto promises OBC quota for Muslims.