മക്കളുടെ വിവാഹത്തിന് മുന്‍പ് മാതാപിതാക്കളുടെ ഒളിച്ചോട്ടം; തിരിച്ചെത്തി വീണ്ടും ഒളിച്ചോടി

By Anupama

Updated: Monday, March 2, 2020, 16:10 [IST]

സൂറത്ത് : മക്കളുടെ വിവാഹം നടക്കാനിരിക്കെ ഒളിച്ചോടിയ മാതാപിതാക്കളുടെ വാര്‍ത്ത നേരത്തെ സാമൂഹ്യമാധ്യമങ്ങളില്‍ ഏറെ വൈറലായിരുന്നു. ഇക്കഴിഞ്ഞ ജനുവരി പത്തിന് ഗുജറാത്തിലായിരുന്നു സംഭവം. വരന്റെ അച്ഛനും വധുവിന്റെ അമ്മയുമായിരുന്നു മക്കളുടെ വിവാഹത്തിന് ഒരാഴ്ച്ച മുന്‍പ് ഒളിച്ചോടിയത്. പിന്നാലെ ഇരുവരും വീട്ടില്‍ തിരിച്ചെത്തിയെങ്കിലും രണ്ടാമതും ഒളിച്ചോടിയെന്നാണ് പുതിയ കാര്യം.

46 വയസ്സുള്ള ഹിമ്മത്ത് പാണ്ഡെയും 43 കാരിയായ ശോഭന റാവലുമായിരുന്നു മക്കളുടെ വിവാഹത്തിന് മുന്‍പ് ഒളിച്ചോടിയത്. ഈ വര്‍ഷം ജനുവരിയില്‍ നടത്താനിരുന്ന മക്കളുടെ വിവാഹത്തിന് ആഴ്ച്ചകള്‍ക്ക് മുമ്പായിരുന്നു മാതാപിതാക്കളുടെ ഒളിച്ചോട്ടം.

ഈ ശനിയാഴ്ച്ചയാണ് രണ്ടാമതും ഇരുവരും വീട് വിട്ട് പോയതെന്നും സൂറത്തിലെ ഒരു വാടക വീട്ടിലാണ് ഇപ്പോള്‍ താമസിക്കുന്നതെന്നും വൃത്തങ്ങള്‍ പറയുന്നു.

ആദ്യം ഒളിച്ചോടിയപ്പോള്‍ ഇരുവരേയും കാണാനില്ലെന്ന് ബന്ധുക്കള്‍ പൊലീസില്‍ പരാതി നല്‍കിയിരുന്നു. പന്നാലെ ഹിമ്മത്ത് പാണ്ഡെയും ശോഭനാ റാവലും പൊലീസ് സ്റ്റേഷനില്‍ ഹാജരാവുകയായിരുന്നു. എന്നാല്‍ ഇത്തവണ പരാതിയുമായി ആരും പൊലീസ് സ്റ്റേഷനിലത്തെിയില്ല.

പാണ്ഡെയും റാവലും നേരത്തെ തന്നെ പരസ്പരം അറിയുമായിരുന്നുവെന്നും ചെറുപ്പത്തില്‍ ഇരുവരും ഗുജറാത്തിലെ കട്ടര്‍ഗ്രാമം പ്രദേശത്തായിരുന്നു താമസിച്ചിരുന്നതെന്നും റാവലിന്റെ വിവാഹത്തിന് ശേഷം നവ്‌സാരിയിലേക്ക് താമസം മാറുകയായിരുന്നുവെന്നും ബന്ധുക്കളിലൊരാള്‍ പറഞ്ഞു.