കോവിഡ് പ്രതിരോധം: പ്രധാനമന്ത്രിക്ക് മുന്നില്‍ 12 നിര്‍ദ്ദേശങ്ങളുമായി സിതാറാം യച്ചൂരി

കോവിഡ് 19 മഹാമാരിക്കെതിരെ പോരാാടും പാരായപ്പെടുത്താനും സ്വീകരിക്കേണ്ട നടപടികളെക്കുറിച്ച് സിപിഎം ജനറല്‍സെക്രട്ടറി സിതാറാം യച്ചൂരി പ്രധാനമന്ത്രിക്ക് കത്തയച്ചു. 12 നിര്‍ദ്ദേശങ്ങളാണ് കത്തില്‍ യച്ചൂരി പ്രധാനമന്ത്രിക്ക് മുന്നില്‍ വെക്കുന്നത്. ലോക്ക്ഡൗൺ സമയത്ത് വലിയൊരു വിഭാഗം ജനങ്ങൾ അനുഭവിക്കുന്ന കഷ്ടപ്പാടുകൾ പരിഹരിക്കുന്നതിന് കേന്ദ്രസർക്കാർ സ്വീകരിക്കേണ്ട വിവിധ നടപടികൾ പ്രതിപാദിച്ചുകൊണ്ട് ഞാൻ നേരത്തെ എഴുതിയതിനൊന്നും ഉത്തരം ലഭിച്ചിട്ടില്ല എന്ന് മാത്രമല്ല, അവയൊന്നും കിട്ടിയതായി അംഗീകരിച്ചിട്ടുപോലുമില്ല. ഇത് തീർത്തും വിചിത്രമാണെന്നും അദ്ദേഹം അഭിപ്രായപ്പെടുന്നു. സിതാറാം യച്ചൂരിയുടെ കത്തിന്‍റെ പൂര്‍ണ്ണ രൂപം ഇങ്ങനെ..

പ്രിയ പ്രധാനമന്ത്രിജി,

നിർഭാഗ്യവശാൽ, ഈ ലോക്ക്ഡൗൺ സമയത്ത് താങ്കൾക്ക് വീണ്ടും എഴുതാൻ ഞാൻ നിർബന്ധിതനാവുകയാണ്. ലോക്ക്ഡൗൺ സമയത്ത് വലിയൊരു വിഭാഗം ജനങ്ങൾ അനുഭവിക്കുന്ന കഷ്ടപ്പാടുകൾ പരിഹരിക്കുന്നതിന് കേന്ദ്രസർക്കാർ സ്വീകരിക്കേണ്ട വിവിധ നടപടികൾ പ്രതിപാദിച്ചുകൊണ്ട് ഞാൻ നേരത്തെ എഴുതിയതിനൊന്നും ഉത്തരം ലഭിച്ചിട്ടില്ല എന്ന് മാത്രമല്ല, അവയൊന്നും കിട്ടിയതായി അംഗീകരിച്ചിട്ടുപോലുമില്ല. ഇത് തീർത്തും വിചിത്രമാണ്.

നമ്മുടെ രാജ്യവും ഭൂരിപക്ഷം ജനങ്ങളും അഭിമുഖീകരിക്കുന്ന ഗുരുതരമായ പ്രശ്നങ്ങളിലേക്ക് താങ്കളുടെ ശ്രദ്ധ വീണ്ടും ക്ഷണിക്കാൻ ഞാൻ ആഗ്രഹിക്കുന്നു.

വെറും നാല് മണിക്കൂർ മുന്നറിയിപ്പുനൽകി നിങ്ങൾ പെട്ടെന്ന് പ്രഖ്യാപിച്ച നാൽപത് ദിവസത്തെ രാജ്യവ്യാപകമായ ലോക്ക്ഡൗണിന്റെ അവസാന ആഴ്ചയിൽ ഞങ്ങൾ ഇപ്പോൾ പ്രവേശിക്കുന്നു. പെട്ടെന്നുള്ള പൂട്ടിയിടലിന്റെ ഗുരുതരമായ പ്രത്യാഘാതങ്ങൾ നേരിടാൻ ജനങ്ങളും സംസ്ഥാന സർക്കാരുകളും തയാറെടുത്തിരുന്നില്ല.

1. ഇതരസംസ്ഥാന തൊഴിലാളികൾ: ലോക്ക്ഡൗണിനുശേഷം, ധാരാളം കുടിയേറ്റ തൊഴിലാളികൾ തങ്ങളുടെ ഉപജീവനമാർഗ്ഗവും പാർപ്പിടവും നഷ്ടമായതിനാൽ വീടുകളിലേക്ക് പോകാനുള്ള ത്വരയിൽ ധാരാളംപേരായി കൂട്ടം കൂടിയിരുന്നു. പകർച്ചവ്യാധിയുടെ സമൂഹവ്യാപനം തടയുന്നതിനായി ശാരീരിക അകലം പാലിക്കുകയെന്ന ലോക്ക്ഡൗണിന്റെ ലക്ഷ്യങ്ങളിലൊന്ന് ഇതിനാൽ തന്നെ നിരാകരിക്കപ്പെട്ടു. വിശപ്പും പോഷകാഹാരക്കുറവും വീടില്ലാത്തതും നമ്മുടെ കോടിക്കണക്കിന് ആളുകളുടെ ജീവിതത്തെ ബാധിക്കുന്നു. ലോക്ക്ഡൗൺ പ്രഖ്യാപിച്ചതുമുതൽ, കേന്ദ്രസർക്കാർ ആവശ്യക്കാർക്ക് സൗജന്യമായി ഭക്ഷണം നൽകണമെന്ന് ഞങ്ങൾ നിർദ്ദേശിച്ചിരുന്നു. നമ്മുടെ കേന്ദ്ര ഗോഡൗണുകളിൽ ഭക്ഷ്യധാന്യങ്ങളുടെ വലിയ ശേഖരം അഴുകുകയാണ്. ഇവ സൗജന്യവിതരണത്തിനായി സംസ്ഥാനങ്ങളിലേക്ക് അയയ്ക്കണം. ഈ ആവശ്യങ്ങളൊന്നും താങ്കൾ നയിക്കുന്ന സർക്കാർ പരിഗണിച്ചിട്ടില്ല.

2. തൊഴിലില്ലായ്മ: ഫെബ്രുവരി മുതൽ ഏപ്രിൽ വരെയുള്ള കാലയളവിൽ തൊഴിലില്ലാത്തവരുടെ എണ്ണം 340 ലക്ഷത്തിൽ നിന്ന് 880 ലക്ഷമായി ഉയർന്നതായി കണക്കാക്കപ്പെടുന്നു, അതായത് 540 ലക്ഷം പേർക്ക് ഉപജീവനമാർഗം നഷ്ടപ്പെട്ടു. ഇത് കൂടാതെ 680 ലക്ഷം പേർ കൂടി തൊഴിൽ മേഖലയിൽ നിന്ന് മാറിയിട്ടുണ്ട്. പകർച്ചവ്യാധി പടർന്നുപിടിച്ചതിനുശേഷം 12.2 കോടി ആളുകൾക്ക് ഉപജീവനമാർഗം നഷ്ടപ്പെട്ടു. മാർച്ച് ആദ്യം മുതൽ ഏപ്രിൽ 20 വരെയുള്ള ആറ് ആഴ്ചകളിൽ തൊഴിലില്ലായ്മ നിരക്ക് 7.5 ശതമാനത്തിൽ നിന്ന് 23.6 ശതമാനമായി ഉയർന്നു. ഉപജീവനമാർഗം നഷ്ടപ്പെട്ട എല്ലാവർക്കും അടുത്ത മൂന്ന് മാസത്തേക്ക് 7500 രൂപ വച്ച് കേന്ദ്രസർക്കാർ കൈമാറ്റം ചെയ്യേണ്ടത് അത്യാവശ്യമാണ്. തീർച്ചയായും,അതിസമ്പന്നരും കോർപ്പറേറ്റുകളും എടുത്ത 7.76 ലക്ഷം കോടിയുടെ വായ്പകൾ കഴിഞ്ഞ അഞ്ച് വർഷത്തിനുള്ളിൽ നിങ്ങളുടെ ഗവൺമെന്റിന് എഴുതിത്തള്ളാൻ കഴിയുമെങ്കിൽ, ഭൂരിപക്ഷം വരുന്ന ജനങ്ങളെയും സംരക്ഷിക്കുന്നതിനുള്ള ഫണ്ടുകൾക്ക് ഒരു കുറവും ഉണ്ടാകാൻ സാധ്യതയില്ലല്ലോ.

3. സഹകരണത്തോടെയുള്ള ഫെഡറലിസം : പകർച്ചവ്യാധിയെ നേരിടുന്നതിൽ സംസ്ഥാനങ്ങൾ യുദ്ധക്കളത്തിലാണ്. ഭക്ഷ്യധാന്യങ്ങളുടെയും മറ്റ് അവശ്യവസ്തുക്കളുടെയുമൊപ്പം മതിയായ സാമ്പത്തികസഹായവും അവർക്ക് ആവശ്യമാണ്. അത്തരമൊരു പിന്തുണ ഇതുവരെ അർത്ഥവത്തായ രീതിയിൽ കേന്ദ്രസർക്കാരിൽ നിന്ന് ലഭിച്ചിട്ടില്ല. രാജ്യവ്യാപകമായി പ്രഖ്യാപിച്ച ലോക്ക്ഡൗൺ കുടിയേറ്റ തൊഴിലാളികൾക്ക്വലിയ പ്രതിസന്ധിയാണ് സൃഷ്ടിച്ചത്. നിങ്ങൾ ഇപ്പോൾ സംസ്ഥാന സർക്കാരുകളോട് ജനങ്ങൾക്ക് അഭയം, ഭക്ഷണം എന്നിവ നൽകാനും ശാരീരിക അകലം ഉറപ്പാക്കാനും ലോക്ക്ഡൗൺ നിയന്ത്രണങ്ങൾ നടപ്പിലാക്കാനും ആവശ്യപ്പെടുന്നു. ഇത് തികച്ചും അന്യായമാണ്. ജിഎസ്ടി പിരിച്ചതിൽ സംസ്ഥാന സർക്കാരുകളുടെ കുടിശ്ശിക പോലും ഇതുവരെ അവർക്ക് നൽകിയിട്ടില്ല. ഫണ്ടുകൾ പിടിച്ചുവയ്ക്കാതെ ഉടൻ തന്നെ സംസ്ഥാനങ്ങൾക്ക് കൈമാറണം.

4. ധനകാര്യം: നിങ്ങളുടെ പേര് വഹിക്കുന്ന ഒരു സ്വകാര്യ ട്രസ്റ്റ് ഫണ്ടായി ആയിരക്കണക്കിന് കോടി രൂപ ശേഖരിക്കുന്നു. ഈ ഫണ്ട് സി‌എജിയോ സർക്കാർ നിയോഗിച്ച മറ്റേതെങ്കിലും ഓഡിറ്ററോ ഓഡിറ്റ് ചെയ്യില്ലെന്ന് ഔദ്യോഗികമായി പ്രഖ്യാപിച്ചു കഴിഞ്ഞു. പ്രധാനമന്ത്രിയുടെ ദുരന്ത നിവാരണ ഫണ്ടിലേക്ക് ഉദ്യോഗസ്ഥരും മറ്റും തങ്ങളുടെ ശമ്പളത്തിൽ നിന്നും സംഭാവന നൽകിയാലും തുക ഈ ഫണ്ടിലേക്ക് നിർബന്ധിതമായി മാറ്റുന്നു. പകർച്ചവ്യാധിക്കെതിരായ പോരാട്ടം ശക്തിപ്പെടുത്തുന്നതിനുള്ള പ്രവർത്തനങ്ങൾക്ക് ഈ ഫണ്ട് ഉടൻ വിന്യസിക്കണം.

5 അധികച്ചെലവ് അവസാനിപ്പിക്കുക: സാമ്പത്തിക ദുരിതം നിറഞ്ഞ ഈ ഗുരുതരമായ മെഡിക്കൽ എമർജൻസിയുടെ അവസ്ഥയിൽ പോലും പ്രധാനമന്ത്രിക്ക് ഒരു പുതിയ വസതിയും ഉൾപ്പെട്ട സെൻട്രൽ വിസ്ത പ്രോജക്റ്റ് പോലുള്ള അനാവശ്യമായ ചെലവുകളും മറ്റു പബ്ലിക് റിലേഷൻ വ്യായാമങ്ങളും തുടരാൻ കേന്ദ്രസർക്കാർ പദ്ധതിയിടുന്നു എന്നത് കുറ്റകരം എന്ന് വിശേഷിപ്പിക്കാവുന്ന നടപടിയാണ്. കഴിഞ്ഞ അഞ്ച് വർഷത്തിനിടയിൽ പൊതുജനാരോഗ്യ സംരക്ഷണം, വിദ്യാഭ്യാസം മുതലായവയ്ക്ക് പകരം പ്രതിമകൾ, ബുള്ളറ്റ് ട്രെയിനുകൾ, പ്രചാരണ പരിപാടികൾ എന്നിവയ്ക്കായി പണം ചെലവഴിച്ചാണ് ഈ സർക്കാരിന്റെ പാരമ്പര്യം. ഇത് ഉടൻ തന്നെ നിർത്തണം. പാൻഡെമിക്കിനെ നേരിടുന്നതിനുള്ള ആവശ്യകതകൾക്ക് മുൻഗണന നൽകണം.

6. പി‌പി‌ഇകളുടെ കുറവ്: ആളുകളെ വ്യാപകമായി പരിശോധിക്കുന്നതിനും പകർച്ചവ്യാധി നിയന്ത്രിക്കാനും പരാജയപ്പെടുത്താനും അത്യാവശ്യമായ ഞങ്ങളുടെ ഡോക്ടർമാർക്കും ആരോഗ്യ പ്രവർത്തകർക്കും വ്യക്തിഗത പരിരക്ഷാ ഉപകരണങ്ങൾ നൽകുന്നതിനും ലോക്ക് ഡൗൺ ഉപയോഗിക്കണമെന്ന് സാർവത്രികമായി അംഗീകരിക്കപ്പെട്ടിരിക്കുന്നു. നിർഭാഗ്യവശാൽ,മറ്റു പല രാജ്യങ്ങളുമായി താരതമ്യപ്പെടുത്തുമ്പോൾ ഇന്ത്യ വളരെക്കാലം ലീഡ് ഉണ്ടായിരുന്നിട്ടും, ആവശ്യമായ തയ്യാറെടുപ്പുകൾ നടത്തിയില്ല. ഇപ്പോൾ ഒരു മാസത്തെ ലോക്ക്ഡൗൺ പിന്നിടുമ്പോഴും നമ്മുടെ ടെസ്റ്റിംഗ് നിരക്കുകൾ ലോകത്തിലെ ഏറ്റവും താഴ്ന്നവയിലൊന്നായി തുടരുന്നു, ഇത് അയൽരാജ്യമായ പാക്കിസ്ഥാനേക്കാൾ കുറവാണ്. ആരോഗ്യ പ്രവർത്തകർക്ക് ആവശ്യമായ പിപിഇ ലഭ്യമല്ല. ചിലർ ദാരുണമായി വൈറസിന് അടിമപ്പെട്ടു. ഈ ഘട്ടത്തിൽ ടെസ്റ്റിംഗിനും സുരക്ഷയ്ക്കുമുള്ള ഉപകരണങ്ങൾ യുദ്ധകാലാടിസ്ഥാനത്തിൽ നൽകേണ്ടത് അത്യാവശ്യമാണ്.

7. യൂണിവേഴ്സൽ ഹെൽത്ത് കെയർ: കോവിഡ് പാൻഡെമിക്കിനെ നേരിടുന്നതിൽ കേന്ദ്രം ശ്രദ്ധ കേന്ദ്രീകരിക്കുമ്പോൾ, സാംക്രമികേതര രോഗങ്ങളാൽ ബുദ്ധിമുട്ടുന്നവർക്ക് വൈദ്യസഹായം ലഭിക്കാത്തതിനാൽ നടക്കാവുന്ന കോവിഡ് ഇതര മരണങ്ങൾ ഇന്ത്യക്ക് താങ്ങാൻ കഴിയില്ല. ലോക്ക്ഡൗൺ സമയത്ത് 3 ലക്ഷത്തിലധികം കുട്ടികളും ലക്ഷക്കണക്കിന് ഗർഭിണികളും ജീവൻരക്ഷാ മരുന്നുകളും വാക്സിനും ലഭിക്കാതെ ബുദ്ധിമുട്ടുന്നു.ഒരു ലക്ഷത്തിലധികം കാൻസർ രോഗികൾക്കും 3.5 ലക്ഷം പ്രമേഹരോഗികൾക്കും ആവശ്യമായ ചികിത്സ ലഭിച്ചിട്ടില്ല. മലേറിയ നിർമാർജ്ജനം, ടിബി ചികിത്സ തുടങ്ങിയ പരിപാടികൾ പോലും കഴിഞ്ഞ അഞ്ച് ആഴ്ചയിൽ വലിയ ഇടിവ് കാണിക്കുന്നു. രക്ത ബാങ്കുകളിൽ രക്ത വിതരണത്തിൽ വലിയ കുറവുണ്ടായതായി റിപ്പോർട്ടുകൾ ഉണ്ട്; ഇത് തലസീമിയ, ഹീമോഫീലിയ, സിക്കിൾ സെൽ ഡിസീസ് തുടങ്ങിയ രക്ത വൈകല്യമുള്ളവർക്ക് വലിയ പ്രയാസമുണ്ടാക്കും. തീർച്ചയായും, അത്തരമൊരു സാഹചര്യം അനുവദനീയമല്ല; അത് ഉടൻ തന്നെ ശരിയാക്കേണ്ടതുമാണ്.

8. ഭരണത്തിന്റെ മുൻ‌ഗണനകൾ: മധ്യപ്രദേശ് പോലുള്ള സംസ്ഥാനങ്ങളിൽ ധാരാളം മരണങ്ങളുണ്ടാക്കുന്ന ഗുരുതരമായ സാഹചര്യങ്ങൾ ഉരുത്തിരിഞ്ഞു വന്നത് ഒരു ആരോഗ്യ അടിയന്തരാവസ്ഥയുടെ നിർണായക സമയത്ത് ബിജെപി എല്ലാ മാനദണ്ഡങ്ങളും ലംഘിച്ച്‌ പ്രകടിപ്പിച്ച രാഷ്ട്രീയ അധികാരത്തിനായുള്ള നഗ്നമായ മോഹവുമായി നേരിട്ട് ബന്ധപ്പെട്ടിരിക്കുന്നു. തെരഞ്ഞെടുക്കപ്പെട്ട ഒരു സർക്കാരിനെ അട്ടിമറിച്ചതും ബിജെപി സർക്കാരിനെ സത്യപ്രതിജ്ഞ ചെയ്തതുമെല്ലാം അവിടെ ഒരു രാഷ്ട്രീയ നേതൃത്വം ഇല്ലാതാവുന്ന അവസ്ഥ ഉണ്ടാക്കിയിരിക്കുന്നു. ഇതിന്റെ വിലകൊടുക്കുന്നത്, അവിടത്തെ ജനങ്ങളും.

9. ദയനീയമായ ഭരണം: അവ്യക്തമായ പല ഉത്തരവുകൾ ഇറക്കുന്നതും, തുടർന്ന് ആ ഉത്തരവുകൾ റദ്ദാക്കലും ഇപ്പോൾ കേന്ദ്രസർക്കാരിന്റെ പതിവാണ്. നോട്ടുനിരോധനം നടപ്പാക്കിയപ്പോൾ തന്നെ അത്തരമൊരു മോശം ഭരണ മാതൃക ഞങ്ങൾ കണ്ടതാണ്. എടുത്തുചാടിയുള്ള പ്രതികരണങ്ങളിലൂടെ രാജ്യത്തെ രാഷ്ട്രീയ എക്സിക്യൂട്ടീവ് അതിന്റെ കഴിവില്ലായ്മ തെളിയിക്കുകയാണെന്ന് വ്യക്തം.

10. സാമൂഹിക ധ്രുവീകരണം: രാജ്യവും എല്ലാ ഇന്ത്യക്കാരും ഒന്നിച്ചാൽ മാത്രമേ ഈ മഹാമാരിക്കെതിരായ പോരാട്ടം വിജയിക്കാൻ കഴിയൂ. മുസ്‌ലിം ന്യൂനപക്ഷ സമുദായത്തെ മുഴുവൻ ലക്ഷ്യമിടുന്നതിനും സാമൂഹിക വിഭജനത്തിനും സാമുദായിക ധ്രുവീകരണത്തിനും ഇടയാക്കിയ തബ്ലീഗി ജമാഅത്ത് സംഘാടകരുടെ ഉത്തരവാദിത്തമില്ലായ്മ ക്ഷമിക്കാനാകാത്തതാണ്. സാമുദായിക വിദ്വേഷം പ്രചരിപ്പിക്കുമ്പോൾ ഇത് ഇന്ത്യയുടെ ശക്തിയെ ദുർബലപ്പെടുത്തുന്നു. ഇത്തരത്തിലുള്ള സാമുദായികവിദ്വേഷം നിറഞ്ഞ പ്രചാരണത്തിന്റെ ആഘാതം ഇന്ത്യൻ വംശജരായ ധാരാളം ആളുകൾ ജോലി ചെയ്യുകയും താമസിക്കുകയും ചെയ്യുന്ന പല രാജ്യങ്ങളിലും അവർക്ക് അനുഭവപ്പെടുന്നുണ്ട്. ഇത് നിറുത്തേണ്ടത് രാഷ്‌ട്രീയ നേതൃത്വത്തിന്റെ, അതായത് കേന്ദ്രസർക്കാറിന്റെ കടമയാണ്. അല്ലാത്തപക്ഷം പകർച്ചവ്യാധിക്കെതിരായ പോരാട്ടത്തിനും നമ്മുടെ രാജ്യത്തെ ജനങ്ങൾക്കും നൽകാവുന്ന ഏറ്റവും വലിയ അപമാനമായിരിക്കും ഇത്.

11. കുടിയേറ്റ തൊഴിലാളികളെ അവരുടെ വീടുകളിലേക്ക് തിരിച്ചയക്കുക: പകർച്ചവ്യാധി പൊട്ടിപ്പുറപ്പെട്ടപ്പോൾ വിദേശ രാജ്യങ്ങളിൽ കുടുങ്ങിയ ധാരാളം ഇന്ത്യക്കാരെ കേന്ദ്ര സർക്കാർ തിരിച്ചെത്തിച്ചു. അവരെ ഇന്ത്യയിലേക്ക് തിരികെ കൊണ്ടുവരാൻ പ്രത്യേക വിമാനങ്ങൾ സംഘടിപ്പിച്ചു. എന്നിരുന്നാലും, കുടിയേറ്റ തൊഴിലാളികളെ അവരുടെ വീടുകളിലേക്ക് തിരികെ കൊണ്ടുപോകുന്നതിന് , വിമാനങ്ങൾ പോയിട്ട് ലോക്ക് ഡൗൺ നിയന്ത്രണങ്ങൾ പാലിച്ച് പ്രത്യേക ട്രെയിനുകളും ബസുകളുമെങ്കിലും കേന്ദ്രസർക്കാർ ക്രമീകരിക്കാത്തത് അന്യായമാണ്. ഇത് ഉടൻ പരിഹരിക്കണം. നിരവധി ഇന്ത്യക്കാർ ഇപ്പോഴും വിദേശ രാജ്യങ്ങളിൽ തുടരുന്നു. ലോകത്തെ മറ്റ് പല രാജ്യങ്ങളും തങ്ങളുടെ പൗരന്മാരെ നമ്മുടെ രാജ്യത്ത് നിന്ന് തിരിച്ചുകൊണ്ടുപോകുന്നത് പോലെ കേന്ദ്രസർക്കാർ അവരുടെ തിരിച്ചുവരവിന് ഒരുക്കങ്ങൾ നടത്തണം.

12. അവസാനമായി, മിസ്റ്റർ. പ്രധാനമന്ത്രി, മറ്റു രാഷ്ട്രത്തലവന്മാരിൽ നിന്ന് വ്യത്യസ്തമായി, മാധ്യമങ്ങളെ അഭിമുഖീകരിക്കാനും ഇന്ത്യൻ ജനതയുടെ ആശങ്കകൾക്ക് മറുപടി നൽകാനും നിങ്ങൾ വലിയ മടിയാണ് കാണിച്ചത്. മിക്ക രാജ്യങ്ങളിലെയും നേതാക്കൾ പതിവായി പത്രസമ്മേളനങ്ങൾ നടത്തുകയും ചോദ്യങ്ങൾക്ക് ഉത്തരം നൽകുകയും ചെയ്യുന്നു. ഉത്തരവാദിത്തം നിറവേറ്റാനും സർക്കാർ കഴിവുറ്റതാണെന്നും ഈ സാഹചര്യം നിയത്രണത്തിൽ ആകിയിട്ടുണ്ടെന്നും ജനങ്ങൾക്ക് ആത്മവിശ്വാസം നൽകാനുള്ള ഒരേയൊരു മാർഗ്ഗമാണിത്. വാസ്തവത്തിൽ, ഇന്ത്യയിലെ പല സംസ്ഥാന സർക്കാരുകളും ഇത് ചെയ്യുന്നുമുണ്ട്. കേരളത്തിലെ എൽ‌ഡി‌എഫ് സർക്കാർ മുഖ്യമന്ത്രി ദിനംപ്രതി പത്രസമ്മേളനം നടത്തുകയും ജനങ്ങൾക്ക് ഈ വെല്ലുവിളിയെ നേരിടാൻ ആവശ്യമായ ആത്മവിശ്വാസംനൽകുന്നതിനായി സർക്കാർ സ്വീകരിച്ച നടപടികളുടെ രൂപരേഖ വിശദീകരിക്കുകയും ചെയ്യുന്നു. ജനങ്ങളോട് പുലർത്തേണ്ട ഉത്തരവാദിത്തം നിങ്ങളുടെ ഭരണത്തിനു കീഴിൽ ഇല്ലാതായിരിക്കുന്നു എന്ന് വേണം പറയാൻ.

ആത്മാർഥതയോടെ

സീതാറാം യെച്ചൂരി

English summary

covid: Sitaram Yachuri writes letter to Prime Minister