മോദിക്കെതിരെ അവകാശ ലംഘന നോട്ടീസ്; പിണറായി വിജയന്റെ വാക്കുകൾ വളച്ചൊടിച്ചെന്ന് ബിനോയ് വിശ്വം!

ദില്ലി: പ്രധാനമന്ത്രി നരേന്ദ്രമോദിക്കെതിരെ പാർലമെന്റിൽ അവകാശ ലംഘന നോട്ടീസ്. സിപിഐ രാജ്യസഭ പാർലമെന്ററി പാർട്ടി നേതാവ് ബിനോയ് വിശ്വമാണ് അവകാശ ലംഘന നോട്ടീസ് നൽകിയത്. രാഷ്ട്രപതിയുടെ നയപ്രഖ്യാപനത്തിന്മേലുള്ള നന്ദിപ്രമേയ ചർച്ചക്കിടെ കേരള മുഖ്യമന്ത്രി പിണറായി വിജയന്റെ പ്രസ്താവന തെറ്റായ രീതിയിൽ വ്യാഖ്യാനിച്ച് രാജ്യസഭയെ തെറ്റിദ്ധരിപ്പിച്ചുവെന്ന് നോട്ടീസിൽ വ്യക്തമാക്കി.

പൗരത്വ ഭേദഗതി നിയമത്തിനെതിരെയുള്ള സമരത്തിൽ തീവ്രവാദികളുണ്ടെന്ന് പിണറായി വിജയനും സമ്മതിച്ചതായാണ് പ്രധാനമന്ത്രി തന്റെ മറുപടി പ്രസംഗത്തിൽ പറഞ്ഞിരുന്നത്. സ്വന്തം രാഷ്ട്രീയ നേട്ടത്തിനായി പിണറായി വിജയന്റെ വാക്കുകൾ വളച്ചൊടിക്കുകയാണെന്ന് ബിനോയ് വിശ്വം പറയുന്നു. എസ്ഡിപിഐ എന്ന സംഘടനയ്ക്കെതിരായിരുന്നു പിണറായി വിജയൻ പറഞ്ഞതെന്നും മത്സരത്തിൽ നുഴഞ്ഞു കയറി കുഴപ്പങ്ങളുണ്ടാക്കാൻ ഈ സംഘടന ശ്രമിക്കുന്നു എന്ന വാക്കുകൾ പ്രധാനമന്ത്രി രാഷ്ട്രീയ ലാഭത്തിനായി വളച്ചൊടിച്ചെന്നും ബിനോയ് വിശ്വം പറഞ്ഞു.

മഹല്ല് കമ്മിറ്റികളുടെ നേതൃത്വത്തില്‍ നടക്കുന്ന പ്രക്ഷോഭങ്ങളില്‍ എസ്ഡിപിഐ നുഴഞ്ഞ് കയറുന്നത് ശ്രദ്ധിക്കണമെന്ന് പിണറായി വിജയൻ പറഞ്ഞിരുന്നു. പൗരത്വ നിയമത്തിനെതിരായ പ്രക്ഷോഭത്തിന്റെ പേരില്‍ തീവ്രവാദ സംഘങ്ങള്‍ കാര്യങ്ങള്‍ വഴി തിരിച്ച് വിടാന്‍ ശ്രമിക്കുകയാണെന്നും മുഖ്യമന്ത്രി പിണറായി വിജയന്‍ നിയമസഭയില്‍ പറഞ്ഞിരുന്നു. പൗരത്വ വിരുദ്ധ പ്രതിഷേധങ്ങളുടെ ഭാഗമായി അക്രമം അഴിച്ച് വിട്ടാല്‍ വച്ച് പൊറുപ്പിക്കില്ലെന്നും അദ്ദേഹം വ്യക്തമാക്കിയിരുന്നു.

English summary

CPI MP Binoy Viswam moves privilege motion against PM Modi