മുൻ ഇന്ത്യൻ ക്രിക്കറ്റ് താരം സുരേഷ് റെയ്നയും ഗായകൻ ഗുരു രാൻധാവയും മുംബൈയിൽ അറസ്റ്റിൽ

മുംബൈ; മുൻ ഇന്ത്യൻ ക്രിക്കറ്റ് താരം സുരേഷ് യെനയും പ്രശസ്ത ഗായകൻ ഗുരു രാൻധാവയും മുംബൈയിൽ അറസ്റ്റിൽ. മുംബൈ വിമാനത്താവളത്തിന് സമീപമുള്ള മുംബൈ ഡ്രാഗൺ ഫ്ളൈ ക്ലബിൽ നടന്ന റെയ്ഡിനിടെയാണ് ഇരുവരും അറസ്റ്റിലായത്. ഇരുവരേയും പിന്നീട് ജാമ്യത്തിൽ വിട്ടയച്ചു.

റെയ്ഡിൽ മുംബൈ ക്ലബിലെ ഏഴ് സ്റ്റാഫ് അംഗങ്ങൾ ഉൾപ്പെടെ 34 പേരെയാണ് അറസ്റ്റ് ചെയ്തത്. ബോളിവുഡ് താരമായ സുസ്സാൻ ഖാനും അറസ്റ്റിലായവരിൽ ഉൾപ്പെടുന്നു. കൊവവിഡ് മാനദണ്ഡങ്ങൾ ലംഘിച്ചതിനാണ് അറസ്റ്റ്. ഐപിസി സെക്ഷന്‍ 188, 269, 34 എന്നീ വകുപ്പുകളാണ് സുരേഷ് റെയ്‌ന ഉള്‍പ്പെടെയുള്ളവര്‍ക്കെതിരെ ചുമത്തിയത്.

കൊവിഡ് മാർഗനിർദ്ദേശങ്ങൾ പാലിക്കാതെയാണ് ക്ലബ് പ്രവർത്തിച്ചതെന്നും സമയപരിധി കഴിഞ്ഞും പ്രവർത്തിച്ചെന്നും പോലീസ് പറഞ്ഞു. പുതുവർഷത്തിന് മുന്നോടിയായി, മുൻകരുതൽ നടപടിയായി മഹാരാഷ്ട്ര സർക്കാർ സംസ്ഥാനത്തും പ്രത്യേകിച്ച് മുംബൈയിലും ശക്തമായ നിയന്ത്രണങ്ങൾ ഏർപ്പെടുത്തിയിട്ടുണ്ട്.

മാത്രമല്ല യുകെയിൽ പുതിയ കൊവിഡ് വൈറസ് വകഭേദം കണ്ടെത്തിയതിന്റെ പശ്ചാത്തലത്തിൽ മഹാരാഷ്ട്രയിൽ രാത്രികാല കർഫ്യൂ പ്രഖ്യാപിച്ചിട്ടുണ്ട്. രാത്രി 11 മുതൽ രാവിലെ 6 വരെ മുംബൈയിലും എല്ലാ മുനിസിപ്പൽ കോർപറേഷൻ പരിധികളിലുമാണ് കർഫ്യൂ പ്രഖ്യാപിച്ചിരിക്കുന്നത്. യൂറോപ്പിൽ നിന്നും പശ്ചിമേഷ്യൻ രാജ്യങ്ങളിൽ നിന്ന് വരുന്നവർ‌ക്ക് 14 ദിവസത്തെ നിർബന്ധിത ക്വാറന്റീനും നടപ്പാക്കും. മറ്റുള്ളവരും ഹോം ക്വാറന്റീൻ തുടരണമെന്ന് സർക്കാർ നിർദ്ദേശിച്ചിട്ടുണ്ട്.

English summary

cricketer Suresh Raina and singer Guru Randhawa were arrested in Mumbai