ജമ്മു കശ്മീരിൽ സിആർപിഎഫ് ജവാൻ ആത്മഹത്യ ചെയ്തു; സമൂഹമാധ്യമങ്ങളിൽ വ്യാജ പ്രചാരണം

ദില്ലി: ജമ്മു കശ്മീരിലെ അനന്ത്നാഗിൽ സിആർപിഎഫ് ജവാൻ ആത്മഹത്യ ചെയ്തു. 33 കാരനായ സിആർപിഎഫ് ജവാനാണ് സ്വയം വെടിയുതിർത്ത് മരിച്ചത്. അനന്ത്നാഗിലെ സദാർ മേഖലയിലെ വസതിയിലാണ് എം അരവിന്ദ് എന്ന സിആർപിഎഫ് ജവാനെ മരിച്ച നിലയിൽ കണ്ടെത്തിയത്.

അവധിക്ക് നാട്ടിൽ പോയതിന് ശേഷം കഴിഞ്ഞ ഓഗസ്റ്റ് 14നാണ് അരവിന്ദ് ജോലി സ്ഥലത്തേയ്ക്ക് മടങ്ങിയെത്തിയത്. ഓഗസ്റ്റ് 20ന് അരവിന്ദിന്റെ ഭാര്യയും ഇവിടെ എത്തിയിരുന്നു. കുടുംബ പ്രശ്നങ്ങളാണ് ആത്മഹത്യയ്ക്ക് കാരണമെന്നാണ് പ്രാഥമിക നിഗമനം.

അരവിന്ദിന്റെ മൃതദേഹം ഉടൻ തന്നെ ജന്മനാട്ടിലേക്ക് അയക്കും. സംഭവത്തിൽ ദുരൂഹത ഇല്ലെന്നാണ് പ്രാഥമിക അന്വേഷണത്തിൽ വ്യക്തമായിരിക്കുന്നത്. കശ്മീരിലെ മോശം ജീവിതസാഹചര്യം മൂലമാണ് ജവാൻ ആത്മഹത്യ ചെയ്തതെന്ന തരത്തിൽ സോഷ്യൽ മീഡിയയിലൂടെ പ്രചാരണം നടന്നെങ്കിലും ഇത് തെറ്റാണെന്ന് അധികൃതർ വിശദീകരിച്ചിട്ടുണ്ട്. തമിഴ്നാട്ടിലെ കോയമ്പത്തൂർ സ്വദേശിയാണ് അരവിന്ദ്. സംഭവത്തിൽ അന്വേഷണത്തിന് ഉത്തരവിട്ടിട്ടുണ്ട്.

English summary

CRPF commandent commits suicide in Kashmir