രാജ്കുമാറിന് ക്രൂരമായി മര്ദനമേറ്റു, റീപോസ്റ്റുമോര്ട്ടില് നിര്ണായക വിവരങ്ങള് പുറത്ത്
കോട്ടയം: നെടുങ്കണ്ടം കസ്റ്റഡി മരണത്തില് നിര്ണായക വിവരങ്ങള് പുറത്ത്. രാജ്കുമാറിന് കസ്റ്റഡിയില് ക്രൂരമായി മര്ദനമേറ്റിരുന്നുവെന്നാണ് രണ്ടാം പോസ്റ്റുമോര്ട്ടം റിപ്പോര്ട്ടില് പറയുന്നത്. നേരത്തെ പോസ്റ്റുമോര്ട്ടം നടത്തിയപ്പോള് കണ്ടെത്താത്ത പരിക്കുകളും ഇതില് കണ്ടെത്തിയിട്ടുണ്ട്. കാലുകള് ബലമായി അകത്തിയപ്പോഴുണ്ടായ പരിക്കുകള് ശരീരത്തിലുണ്ട്. നെഞ്ചിന്റെയും വയറിന്റെയും പിന്നിലും പരിക്കുകളുണ്ട്.
ഈ പരിക്കുകള് മരണത്തിന് കാരണമായേക്കാമെന്നാണ് പോസ്റ്റ്മോര്ട്ടം റിപ്പോര്ട്ട്. രാജ്കുമാറിന് കസ്റ്റഡിയിലോ പുറത്തോ ഏറ്റ മര്ദനം അതുകൊണ്ടുതന്നെ മരണകാരണമായേക്കാമെന്നും കണ്ടെത്തലുണ്ട്. ന്യൂമോണിയ കാരണമാണ് രാജ്കുമാര് മരിച്ചതെന്നാണ് നേരത്തെയുണ്ടായിരുന്ന പോസ്റ്റുമോര്ട്ടം റിപ്പോര്ട്ടില് കണ്ടെത്തിയിരുന്നത്. എന്നാല് ദേഹത്ത് ആന്തരിക മുറിവുകളുണ്ടായിരുന്നുവെന്നും ഗുരുതരമായ അണുബാധയ്ക്ക് പിന്നാലെ ന്യൂമോണിയ കൂടി ബാധിച്ചതാണ് മരണകാരണമെന്ന് നേരത്തെ കണ്ടെത്തിയിരുന്നു.
അതേസമയം രാജ്കുമാറിന്റെ അന്തരികാവയവങ്ങള് പരിശോധനയ്ക്കായി എടുത്തിട്ടുണ്ട്. ഇത് വിദഗ്ധ പരിശോധനയ്ക്കായി അയക്കും. രാജ്കുമാറിന് ന്യൂമോണിയ ബാധ എത്രത്തോളമുണ്ടായിരുന്നുവെന്ന് ഇതിലൂടെ സ്ഥിരീകരിക്കാനാവും. കാഞ്ഞിരപ്പള്ളി താലൂക്കാശുപത്രിയില് വെച്ചാണ് പോസ്റ്റുമോര്ട്ടം നടത്തിയത്. മൃതദേഹം അഴുകിയ നിലയിലായിരുന്നു.
കേസില് സിബിഐ അന്വേഷണം ആവശ്യപ്പെട്ടുള്ള രാജ്കുമാറിന്റെ ബന്ധുക്കളുടെ ഹര്ജിയില് മുഴുവന് രേഖകളും ഹാജരാക്കണമെന്ന് ഹൈക്കോടതി നിര്ദേശിച്ചിരുന്നു. കസ്റ്റഡി കൊലയില് ഒന്നാം പ്രതി എസ്ഐ സാബു ഹൈക്കോടതിയില് ജാമ്യാപേക്ഷ നല്കിയിട്ടുണ്ട്. കോടതിയില് രാജ്കുമാറഇനെ കസ്റ്റഡിയിലെടുത്തത് ഇടുക്കി മുന് എസ്പിയും ഡിവൈഎസ്പിയും അറിഞ്ഞാണെന്ന് സാബുവിന്റെ അഭിഭാഷകന് കോടതിയില് വ്യക്തമാക്കിയിട്ടുണ്ട്. അപ്പോള് രാജ്കുമാറിനെ മര്ദിച്ച് കൊന്നത് ആരാണെന്നായിരുന്നു കോടതിയുടെ ചോദ്യം.
ശശി തരൂര് ബിജെപിയിലേക്ക് പോകുമോ? കോണ്ഗ്രസില് വഴിമുട്ടി, ജെയ്റ്റ്ലിക്ക് പകരക്കാരനായേക്കും!!