പത്തുവര്‍ഷമായി ആടിനെപ്പോലും കൊന്നിട്ടില്ലെന്ന് അഖ്‌ലാഖിന്റെ മകന്‍

By Anwar Sadath

Updated: Thursday, October 8, 2015, 9:01 [IST]

ദാദ്രി: ഉത്തര്‍പ്രദേശിലെ ദാദ്രിയില്‍ ബീഫ് കഴിച്ചതിന്റെ പേരില്‍ കൊലചെയ്യപ്പെട്ട മുഹമ്മദ് അഖ്‌ലാഖിന്റെ മകന്‍ പറയുന്നു പത്തുവര്‍ഷമായി തങ്ങള്‍ ആടിനെപോലും കൊന്നിട്ടില്ലെന്ന്. ദാദ്രിയില്‍ നിലനില്‍ക്കുന്ന പ്രത്യേക മതസൗഹൃദ അന്തരീക്ഷം തകരരുത് എന്നാഗ്രിച്ചാണ് ഈദ് ദിനത്തില്‍ ആടിനെപോലും കൊല്ലുന്നത് ഒഴിവാക്കിയതെന്ന് ഇന്ത്യന്‍ വ്യോമസേനയില്‍ ഉദ്യോഗസ്ഥനായ സര്‍താജ് പറയുന്നു.

ആടുമാടുകളെ കൊല്ലാറില്ലെന്ന കാര്യം അഖ്‌ലാഖിന്റെ മകളുടെ ഭര്‍ത്താവും ശരിവെച്ചു. സംഭവദിവസം ഫ്രിഡ്ജില്‍ നിന്നും കണ്ടെടുത്തത് ആട്ടിറച്ചിയാണ്. മോദിനഗറില്‍ നിന്നും വാങ്ങിക്കൊണ്ടുവന്നതാണ് ഇതെന്ന് അദ്ദേഹം പറഞ്ഞു. ഇത് പിടിച്ചെടുത്താണ് ബീഫ് എന്ന് ആരോപിച്ചതും പിന്നീട് അഖ്‌ലാഖിനെ മര്‍ദ്ദിച്ചു കൊന്നതെന്നും അഖ്‌ലാഖിന്റെ മകളുടെ ഭര്‍ത്താവ് വസീം പറഞ്ഞു.

ഉത്തര്‍ പ്രദേശിലെ മോദിനഗര്‍ സ്വദേശിയാണ് വസീം. അഖ്‌ലാഖിന്റെ മൂത്തമകളെ വിവാഹം ചെയ്തിരിക്കുന്ന ഇയാള്‍ നോയ്ഡയില്‍ താമസിച്ചുവരികയായിരുന്നു. സപ്തംബര്‍ 27ന് ബക്രീദ് ആഘോഷങ്ങള്‍ക്ക് ശേഷം വസീം ദാദ്രിയില്‍ നിന്നും തിരിച്ചുപോയിരുന്നു. സപ്തംബര്‍ 28നാണ് രാജ്യത്തെ പിടിച്ചുലച്ച കൊലപാതകം നടന്നത്.

ഇരുനൂറോളം വരുന്ന ജനക്കൂട്ടം വീടിനകത്ത് കടന്നുചെന്ന് അഖ്‌ലാഖിനെ പുറത്തേക്ക് വലിച്ചിഴച്ചുകൊണ്ടുവന്ന് ക്രൂരമായി മര്‍ദ്ദിക്കുകയായിരുന്നു. ഇയാള്‍ പിന്നീട് മരിച്ചു. പിതാവിനെ അക്രമിക്കുന്നത് തടയാനെത്തിയ അഖ്‌ലാഖിന്റെ മകനും പരിക്കേറ്റു. ഇയാള്‍ ഗുരുതരമായ പരിക്കുകളോടെ ആശുപത്രിയില്‍ ചികിത്സയിലാണ്.