അഹിംസ പ്രചരിപ്പിക്കണമെന്ന് കമല്‍ഹാസനോട് ദലൈലാമ

ചെന്നൈ: സിനിമയിലൂടെ അഹിംസ പ്രചരിപ്പിക്കണമെന്ന് ഉലകനായകന്‍ കമല്‍ഹാസനോട് ടിബറ്റന്‍ ആത്മീയ നേതാവ് ദലൈലാമ. ചെന്നൈയിലെ ഇരുവരുടെയും കൂടിക്കാഴ്ചയ്ക്കാണ് ഇങ്ങനെയൊരു ഉപദേശം കമല്‍ഹാസന് ലഭിച്ചത്. ഭാരതം ലോകത്തിനു മുന്നില്‍ തെളിയിച്ചു കൊടുത്ത അഹിംസയുടെ സന്ദേശങ്ങള്‍ എല്ലാവരിലും എത്തണം. അതിനു പറ്റിയ മാര്‍ഗം സിനിമയാണ്.

സിനിമയിലൂടെ അഹിംസ പ്രചരിപ്പിക്കണമെന്നാണ് ദലൈലാമ പറഞ്ഞത്. ആത്മീയ കാര്യങ്ങളില്‍ കമല്‍ഹാസനു പ്രത്യേക താല്‍പ്പര്യമുണ്ട്. അതുകൊണ്ടുതന്നെയാണ് ദലൈലാമയുമായി ഒരു കൂടിക്കാഴ്ച നടത്തിയത്. സിനിമകളോ ടെലിവിഷന്‍ പരിപാടികളോ കാണാത്തയാളാണ് ദലൈലാമ.

എന്നിട്ടും സിനിമയോടു പ്രത്യേക താല്‍പ്പര്യം അദ്ദേഹം കാണിക്കുന്നുവെന്ന് കമല്‍ഹാസന്‍ പറഞ്ഞു. അബ്ദുള്‍കലാം സേവന പുരസ്‌കാര ചടങ്ങില്‍ പങ്കെടുക്കാന്‍ ചെന്നൈയിലെത്തിയതായിരുന്നു ദലൈലാമ. ആത്മീയ കാര്യങ്ങളെക്കുറിച്ച് ഒന്നും അറിയില്ലെങ്കിലും അതിനോട് പ്രത്യേക താല്‍പ്പര്യമാണെന്ന് താരം പറഞ്ഞു.

അഭിനയ രംഗത്തുള്ള തന്റെ കഴിവ് അഹിംസയുടെ പ്രചരണത്തിന് ഉപയോഗപ്പെടുത്തണമെന്നാണ് കമല്‍ഹാസനോട് ദലൈലാമ ഉപദേശിച്ചത്. തനിക്ക് ചെയ്യാന്‍ കഴിയുന്നത് ചെയ്യുമെന്ന് കമല്‍ഹാസന്‍ ദൈലലാമയോട് പറയുകയും ചെയ്തു. ദലൈലാമയെ കാണാന്‍ കമല്‍ഹാസനോടൊപ്പം ഗൗതമിയും ഉണ്ടായിരുന്നു.

English summary

Actor-filmmaker Kamal Haasan, who met the Dalai Lama, said the Tibetan spiritual leader suggested that he uses cinema as a medium to spread ahimsa.