1968ൽ വിമാനപകടം; 56 വർഷങ്ങൾക്ക് ശേഷം മലയാളി സൈനികന്റെ ഉൾപ്പെടെ 4 സൈനികരുടെ മൃതദേഹങ്ങൾ കണ്ടെത്തി

56 വർഷങ്ങൾക്ക് മുൻപ് വിമാനപകടത്തിൽ കാണാതായ നാല് സൈനികരുടെ മൃതദേഹങ്ങൾ കണ്ടെത്തി. ഇതിൽ മലയാളി സൈനികന്റെ മൃതദേഹം ഉണ്ട്. പത്തനംതിട്ട ഇലന്തൂർ സ്വദേശി തോമസ് ചെറിയാന്റെ മൃതദേഹമാണ് കണ്ടെത്തിയത്. 21 വയസ്സായിരുന്നു അദ്ദേഹത്തിന് അപകടത്തിൽ പെടുമ്പോൾ. തിരിച്ചറിയൽ രേഖകളിൽ നിന്നാണ് തോമസ് ചെറിയാന്റെതാണ് മൃതദേഹമെന്ന് മനസ്സിലായത്. മൃതദേഹം കണ്ടെത്തിയ വിവരം സൈന്യം ബന്ധുക്കളെ അറിയിച്ചു.

1968 ഫെബ്രുവരിയിൽ ആണ് IAF AN-12 എന്ന വിമാനം അപകടത്തിൽ പെട്ടത്. 102 പേരാണ് വിമാനത്തിൽ ഉണ്ടായിരുന്നത്. ചണ്ഡീഗഡിൽ നിന്ന് പറന്നുയർന്ന വിമാനം റോ​ഹ്താങ് ചുരത്തിന് സമീപം മോശം കാലാവസ്ഥയെ തുടർന്ന് കാണാതാവുകയായിരുന്നു. നീണ്ട 56 വർഷങ്ങൾക്ക് ശേഷമാണ് മൃതദേഹം കണ്ടെത്തുന്നത്. മരണപ്പെട്ട സൈനികരുടെ മൃതദേഹാവശിഷ്ടങ്ങൾ കണ്ടെത്താനുള്ള തിരം​ഗ മൗണ്ടൻ റെസ്ക്യൂ പ്രതിനിധികളുമായി സഹകരിച്ച് ഇന്ത്യൻ‌ ആർമിയുടെ ഡോ​ഗ്ര സ്കൗട്സിന്റെ നേതൃത്വത്തിൽ നടത്തിയ തിരച്ചിലിലാണ് മൃതദേഹങ്ങൾ കണ്ടെത്തിയത്.

സെപ്റ്റംബർ 29 ന് കണ്ടെടുത്ത മൃതദേഹങ്ങളിൽ മൂന്ന് മൃതദേഹങ്ങൾ കേടുകൂടാതെയിരിക്കുകയാണെന്നും നാലാമത്തെ മൃത​ദേഹത്തിന്റെ അവശിഷ്ടങ്ങൾ മഞ്ഞുവീഴ്ചയുള്ള മലയിൽ നിന്ന് കണ്ടെത്തിയതായുമാണ് വിവരം.

" അസാധാരണമായ ഒരു സംഭവ വികാസത്തിൽ 1968 ൽ റോഹ്താങ് പാസിൽ തകർന്ന AN -12 വിമാനത്തിൽ നിന്ന് ഉദ്യോ​ഗസ്ഥരുടെ മൃതദേഹാവശിഷ്ടങ്ങൾ വീണ്ടെടുക്കുന്നതിനുള്ള നടന്നുകൊണ്ടിരിക്കുന്ന തിരച്ചിൽ, രക്ഷാദൗത്യം ​ഗണ്യമായ പുരോ​ഗതി കൈവരിച്ചു, " ഒരു ഉദ്യോ​ഗസ്ഥൻ പറഞ്ഞു.

2003 ൽ അടൽ ബിഹാരി വാജ്പേയി ഇൻസ്റ്റിറ്റ്യൂട്ട് ഓഫ് മൗണ്ടനീറിം​ഗിലെ പർവതാരോഹകർ ഈ അവശിഷ്ടങ്ങൾ കണ്ടെത്തി. ഇത് വർഷങ്ങളായി ഇന്ത്യൻ സൈന്യത്തിന്റെ പ്രത്യേകിച്ച് ഡോ​ഗ്ര സ്കൗട്ടുകളുടെ ഒന്നിലധികം പര്യവേഷണങ്ങൾ നടന്നു. 2005, 2006, 2013, 2019 വർഷങ്ങളിൽ ദോ​ഗ്ര സ്കൗട്ടുകൾ തിരച്ചിലിൽ മുൻപന്തിയിൽ ആയിരുന്നു. 2019 ഓടെ കാണാതായവരുടെ അഞ്ച് മൃതദേഹങ്ങൾ മാത്രമെ വീണ്ടെടുക്കാനായുള്ളൂ..