ഡിഎന്എ ടെസ്റ്റില് വിജയിക്കുമെന്ന് ഗീതയുടെ 'അച്ഛന്'
ദില്ലി: വര്ഷങ്ങള്ക്കു മുന്പ് പാക്കിസ്ഥാനില് അകപ്പെട്ടുപോയ ഗീതയുടെ അച്ഛനെന്ന് അവകാശപ്പെടുന്ന ജനാര്ദ്ദന് മഹാതോ വരാനിരിക്കുന്ന ഡിഎന്എ ടെസ്റ്റില് ആത്മവിശ്വാസം പ്രകടിപ്പിച്ചു. ഗീതയെ തിങ്കളാഴ്ച ഇന്ത്യയിലെത്തിക്കാനാണ് ഇന്ത്യാ പാക്കിസ്ഥാന് സര്ക്കാരുകളുടെ തീരുമാനം. ഇന്ത്യയില് എത്തിച്ചശേഷം നടത്തുന്ന ഡിഎന്എ ടെസ്റ്റിനുശേഷമാകും യുവതിയെ കുടുംബത്തിന് കൈമാറുക.
നിലവില് ബിഹാര് സ്വദേശികളായ ദമ്പതികളാണ് ഗീത തങ്ങളുടെ മകളാണെന്ന് അവകാശപ്പെട്ട് രംഗത്തെത്തിയിരിക്കുന്നത്. പഞ്ചാബില് ജോലി ചെയ്യവെ ഗീതയെ തങ്ങള്ക്ക് നഷ്ടമായെന്നാണ് ഇവര് പറയുന്നത്. ഏതുതരം ടെസ്റ്റുകള് വേണമെങ്കിലും നടത്താം. ഒന്നില് നിന്നും തനിക്ക് ഒളിച്ചോടേണ്ട ആവശ്യമില്ലെന്നും എല്ലാ ടെസ്റ്റുകളും തങ്ങള്ക്ക് അനുകൂലമായിരിക്കുമെന്നും ജനാര്ദ്ദന് മഹാതോ പറഞ്ഞു.
തിങ്കളാഴ്ച പാക്കിസ്ഥാനില് നിന്നുള്ള അഞ്ചംഗ സംഘത്തോടൊപ്പമാകും ഗീത ഇന്ത്യയില് എത്തുക. പാക്കിസ്ഥാനില് അകപ്പെട്ടശേഷം എദി എന്ന ചാരിറ്റി സംഘടനയ്ക്ക് കീഴിലായിരുന്നു ഗീത കഴിഞ്ഞിരുന്നത്. ഈ സംഘടനയിലെ അംഗങ്ങളാണ് ഗീതയ്ക്കൊപ്പം ഇന്ത്യയിലെത്തുക എന്നാണ് റിപ്പോര്ട്ട്. ഇവര് ഇന്ത്യയുടെ പ്രത്യേക അതിഥികളായിരിക്കുമെന്ന് വിദേശകാര്യമന്ത്രാലയം അറിയിച്ചു.
2001ലാണ് ഗീത ഇന്ത്യയില് നിന്നും പാക്കിസ്ഥാനിലേക്കുള്ള സംത്സോത എക്സ്പ്രസില് കയറി അബദ്ധത്തില് പാക്കിസ്ഥാനില് എത്തുന്നത്. വര്ഷങ്ങള് കഴിഞ്ഞ് ഗീതയുടെ ജീവിതവുമായി സാമ്യമുള്ള ബോളിവുഡ് സിനിമ ബജ് രംഗീ ഭായീജാന് പുറത്തിറങ്ങിയശേഷമാണ് ഗീതയുടെ മാതാപിതാക്കളെ കണ്ടെത്താനുള്ള ശ്രമം ഊര്ജിതമാക്കിയത്.