ഞാൻ പാടുന്നൊരു വീഡിയോ കണ്ടു; ഡീപ് ഫേയ്ക്ക് ആശങ്ക ഉണ്ടാക്കുന്നതെന്ന് പ്രധാനമന്ത്രി

Updated: Friday, November 17, 2023, 17:55 [IST]

ന്യൂഡൽഹി: ആർട്ടിഫിഷ്യൽ ഇന്റലിജൻസ് ദുരുപയോഗം ചെയ്ത് ഡീപ് ഫേക്ക് വീഡിയോകൾ സൃഷ്‌ടിക്കുന്നത് വലിയ ആശങ്കയെന്ന് പ്രധാനമന്ത്രി നരേന്ദ്ര മോദി. ഇത്തരം വീഡിയോകൾ ഇന്റർനെറ്റിൽ പ്രചരിക്കുമ്പോൾ ഡീപ്ഫേക്കുകൾ കണ്ടെത്താനും മുന്നറിയിപ്പ് നൽകാനും ചാറ്റ് ജിപിടി ടീമിനോട് ആവശ്യപ്പെട്ടിട്ടുണ്ടെന്ന് പ്രധാനമന്ത്രി മോദി പറഞ്ഞു.

ആർട്ടിഫിഷ്യൽ ഇന്റലിജൻസ് ( എ ഐ) , ഡീപ് ഫെയ്ക് എന്നിവയെ പറ്റി മാധ്യമപ്രവർത്തകർ ജനങ്ങളെ ബോധവത്ക്കരിക്കണമെന്നും പ്രധാനമന്ത്രി പറഞ്ഞു. ബി ജെ പിയുടെ ദീപാവലി മിലൻ പരിപാടിയുടെ ഭാഗമായി പാർട്ടി ആസ്ഥാനത്ത് മാധ്യമങ്ങളെ കാണുകയായിരുന്നു അദ്ദേഹം, നടിമാരുടെ ഡീപ്പ് ഫേയ്ക്ക് വീഡിയോകൾ പ്രചരിക്കുന്ന സാഹചര്യത്തിലാണ് പ്രതികരണം.

താൻ പാട്ടുപാടുന്ന തരത്തി-ലുള്ള വീഡിയോയെക്കുറിച്ചും അദ്ദേഹം പറഞ്ഞു. അടുത്തിടെ ഞാൻ പാട്ടുപാടുന്ന ഒരു വീഡിയോ കാണാൻ ഇടയായി. എന്നെ ഇഷ്ടപ്പെടുന്നവർ ഫോർവേർഡ് ചെയ്തതാണ്, പ്രധാനമന്ത്രി പറഞ്ഞു. ഡീപ്പ് ഫേയ്ക്ക് വീഡിയോ നിർമിക്കാൻ എ ഐ ഉപയോഗിക്കുന്നത് വലിയ ആശങ്ക ഉണ്ടാക്കുന്നുണ്ട്.

ഡീപ്പ് ഫേയ്ക്കുകളെ പ്രത്യേക സൂചന നൽകി അടയാളപ്പെടുത്തണമെന്ന് ചാറ്റ് ജിപിടി ടീമിനോട് പറഞ്ഞിട്ടുണ്ട്. ഇന്റർനെറ്റിൽ പ്രചരിക്കുന്നവയ്ക്ക് മുന്നറിയിപ്പ് നൽകണം. എ ഐയുടെ ഇക്കാലത്ത് സാങ്കേതിക വിദ്യ ഉത്തരവാദിത്തോടെ ഉപയോഗിക്കേണ്ടത് സുപ്രധാനമാണ്. വിഷയത്തെ പറ്റി മാധ്യമങ്ങൾ ജനങ്ങളെ ബോധവത്ക്കരിക്കണം, പ്രധാനമന്ത്രി പറയുന്നു.

തെറ്റായ വിവരങ്ങൾ പ്രചരിപ്പിക്കുന്നത് തടയാൻ ഓൺലൈൻ പ്ലാറ്റ്‌ഫോമുകൾക്ക് "നിയമപരമായ ബാധ്യത" ഉണ്ടെന്ന് കേന്ദ്ര മന്ത്രി രാജീവ് ചന്ദ്രശേഖർ പറഞ്ഞു. സർക്കാരോ ഉപയോക്താവോ ശ്രദ്ധയിൽ പെടുത്തിയാൽ 36 മണിക്കൂറിനുള്ളിൽ ഇവ നീക്കം ചെയ്യണം. ഇല്ലെങ്കിൽ നിയമനടപടി നേരിടേണ്ടി വരുമെന്നും അദ്ദേഹം പറഞ്ഞു.

തെന്നിന്ത്യൻ നടി രശ്മിക മന്ദാന, ബോളിവുഡ് താരങ്ങളായ കത്രീന കെയ്ഫ്, കാജോൾ എന്നിവരുടേത് എന്ന പേരിൽ ഡീപ്പ് ഫേയ്ക്ക് വീഡിയോകൾ ഇന്റർനെറ്റിൽ വ്യാപകമായി പ്രചരിച്ചിരുന്നു. ആദ്യം രശ്മികയുടെ ഡീപ് ഫേയ്ക്ക് വീഡിയോ ആണ് പ്രചരിച്ചത്. വീഡിയോയിൽ യഥാർത്ഥ്യത്തിൽ ഉണ്ടായിരുന്നത് സാറ പട്ടേലായിരുന്നുയ സാറയുടെ മുഖത്തിന് പകരം രശ്മികയുടെ മുഖം വെച്ചാണ് വീഡിയോ തയ്യാറാക്കിയത്.

കത്രീനയുടേയും ഡീപ് ഫേയ്ക്കിറങ്ങി. ടൈഗർ 3 യിൽ നിന്നുള്ള ചിത്രമെന്ന പേരിലായിരുന്നു ഡീപ്പ് ഫേയ്ക്ക്. ഇൻഫ്ലുവൻസർ റോസി ബ്രീനിന്റെ വീഡിയോയിൽ മുഖം മോർഫ് ചെയ്താണ് കാജോളിന്റേതാണെന്ന രീതിയിൽ പ്രചരിച്ചത്.