ഡല്‍ഹി നിയമസഭയിലെ മുസ്ലിം എംഎല്‍എമാരുടെ എണ്ണം കുറഞ്ഞു: വിജയിച്ചവരെല്ലാം എഎപിക്കാർ

ന്യൂഡല്‍ഹി: ഡല്‍ഹി നിയമസഭ തിരഞ്ഞെടുപ്പ് വോട്ടെണ്ണല്‍ കഴിഞ്ഞപ്പോള്‍ ഇത്തവണ വിജയിച്ച കയറാന്‍ സാധിച്ചത് നാല് മുസ്ലിം സ്ഥാനാർത്ഥികള്‍ക്ക്. വിജയിച്ച നാലുപേരും എ എ പി സ്ഥാനാർത്ഥികളാണ്. ഇമ്രാൻ ഹുസൈൻ (ബല്ലിമാരൻ), ആലി മുഹമ്മദ് ഇഖ്ബാൽ (മതിയ മഹൽ), അമാനത്തുള്ള ഖാൻ (ഓഖ്‌ല), ചൗധരി സുബൈർ അഹമ്മദ് (സീലംപൂർ) എന്നിവരാണ് വിജയിച്ച ന്യൂനപക്ഷ നേതാക്കള്‍. കഴിഞ്ഞ നിയമസഭയില്‍ 5 മുസ്ലിം എം എല്‍ എമാരാണ് ഉണ്ടായിരുന്നത്.

മാതിയ മഹലിൽ നിന്നും മത്സരിച്ച ആലി മുഹമ്മദ് ഇഖ്ബാലാണ് ഡല്‍ഹി നിയമസഭ തിരഞ്ഞെടുപ്പില്‍ ഏറ്റവും വലിയ ഭൂരിപക്ഷത്തില്‍ വിജയിച്ച സ്ഥാനാർത്ഥി. ബിജെപിയുടെ ദീപ്തി ഇന്തോറയെ 42724 വോട്ടുകൾക്കാണ് എ എ പി സ്ഥാനാർത്ഥി പരാജയപ്പെടുത്തിയത്. ആലി മുഹമ്മദ് ഇഖ്ബാലിന് 58120 വോട്ട് ലഭിച്ചപ്പോള്‍ ദീപ്തി ഇന്‍ഡോറയ്ക്ക് ലഭിച്ചത് 15396 വോട്ട് മാത്രമാണ്. കോണ്‍ഗ്രസ് സ്ഥാനാർത്ഥി ആസിം അഹമ്മദ് ഖാന്‍ 10295 വോട്ട് നേടി മൂന്നാം സ്ഥാനത്തും എത്തി.

തിരഞ്ഞെടുപ്പിലെ രണ്ടാമത്തെ ഉയർന്ന ഭൂരിപക്ഷത്തിനാണ് സീലം പൂരില്‍ നിന്നും ചൗധരി സുബൈർ അഹമ്മദ് വിജയിച്ചത്. ബി ജെ പിയുടെ അനിൽ കുമാർ ശർമ്മയെ 42477 വോട്ടുകൾക്ക് അദ്ദേഹം പരാജയപ്പെടുത്തി. എ എ പി സ്ഥാനാർത്ഥിക്ക് 79009 വോട്ട് ലഭിച്ചപ്പോള്‍ ബി ജെ പി സ്ഥാനാർത്ഥിക്ക് ലഭിച്ചത് കേവലം 36532 വോട്ട് മാത്രമാണ്. കോണ്‍ഗ്രസ് സ്ഥാനാർത്ഥി അബ്ദുള്‍ റഹ്മാന്‍ 16551 വോട്ടുമായി മൂന്നാം സ്ഥാനത്തായി. ഓഖ്‌ലയിൽ ബി ജെ പിയുടെ മനീഷ് ചൗധരിയെ 23,639 വോട്ടുകൾക്കാണ് എ എപിയുടെ അമാനത്തുള്ള ഖാൻ പരാജയപ്പെടുത്തിയത്.

അതേസമയം, മൂന്നോളം മുസ്ലിം സ്വാധീന മണ്ഡലങ്ങളില്‍ ഇത്തവണ വിജയം കൈവരിക്കാന്‍ ബി ജെ പിക്കും സാധിച്ചിട്ടുണ്ട്. മുസ്‌ലിം ആധിപത്യമുള്ള ഡല്‍ഹിയിലെ പ്രധാനപ്പെട്ട സീറ്റാണ് മുസ്തഫാബാദ്. ഇവിടെ ബിജെപിയുടെ മോഹൻ സിംഗ് ബിഷ്ത് എ എ പിയിലെ അദീൽ അഹമ്മദ് ഖാനെതിരെ 17578 വോട്ടുകൾക്കാണ് വിജയിച്ചത്. അസദുദ്ധീന്‍ ഒവൈസിയുടെ ഓൾ ഇന്ത്യ മജ്‌ലിസ്-ഇ-ഇത്തേഹാദുൽ മുസ്‌ലിമീൻ സ്ഥാനാർത്ഥി മൊഹമ്മദ് താഹിർ ഹുസൈൻ നേടിയ വോട്ടുകളാണ് എ എ പിയുടെ പരാജയം ഉറപ്പിച്ചത്. ബി ജെ പി - 85215, എ എ പി - 67637, എ ഐ എം ഐ എം - 33474, അലി മെഹ്ദി - 11763 എന്നിങ്ങനെയായിരുന്നു വോട്ടുനില.

വാസിപൂർ മണ്ഡലത്തിൽ ബി ജെ പിയിലെ പൂനം ശർമ്മ എ എ പിയിലെ രാജേഷ് ഗുപ്തയെ 11425 വോട്ടുകൾക്ക് പരാജയപ്പെടുത്തിയപ്പോള്‍ കസ്തൂർബ നഗർ മണ്ഡലത്തിൽ ബി ജെ പിയിലെ നീരജ് ബസോയ എ എ പിയുടെ അഭിഷേക് ദത്തിനെ 11048 വോട്ടുകൾക്കും മറികടന്നു. അതേസമയം, ഡല്‍ഹിയില്‍ ആകേയുള്ള 70 സീറ്റുകളിൽ 48 ഉം നേടിയാണ് ബി ജെ പി 27 വർഷങ്ങള്‍ക്ക് ശേഷം ഡല്‍ഹിയില്‍ അധികാരത്തിലെത്തിയത്. അധികാരം നഷ്ടപ്പെട്ട എ എ പിക്ക് 22 സീറ്റ് ലഭിച്ചു.